ಹೇರ್​ಕಟ್​ ಮಾಡಲು ನಿರಾಕರಣೆ: ಗುಂಡಿಕ್ಕಿ ಕ್ಷೌರಿಕನ ಹತ್ಯೆ

ಬಾಕಿ ಹಣ ಪಾವತಿಸದೇ ಹೇರ್​ಕಟ್​ ಮಾಡಲ್ಲ ಎಂದ ಕ್ಷೌರಿಕನ ಮೇಲೆ ಗುಂಡು ಹಾರಿಸಿ ಕೊಲೆ ಮಾಡಿರುವ ಘಟನೆ ಉತ್ತರ ಪ್ರದೇಶದಲ್ಲಿ ನಡೆದಿದೆ.

ಬುಲಂದ್‌ಶಹರ್ (ಉತ್ತರ ಪ್ರದೇಶ): ಕೂದಲು ಕತ್ತರಿಸಲು ನಿರಾಕರಿಸಿದ್ದಕ್ಕಾಗಿ ವ್ಯಕ್ತಿಯೊಬ್ಬ ಕ್ಷೌರಿಕನ ಮೇಲೆ ಗುಂಡು ಹಾರಿಸಿ ಕೊಂದಿರುವ ಘಟನೆ ಉತ್ತರ ಪ್ರದೇಶದ ಬುಲಂದ್‌ಶಹರ್ ಜಿಲ್ಲೆಯಲ್ಲಿ ನಡೆದಿದೆ.

ಮೃತ ಕ್ಷೌರಿಕನನ್ನು ಅಗೌತಾ ಪಟ್ಟಣದ ಭೈನಸ್ರೋಳಿ ಗ್ರಾಮದ ಇರ್ಫಾನ್​ ಎಂದು ಗುರುತಿಸಲಾಗಿದೆ. ಸಮೀರ್ ಎಂಬಾತ ಹಾಗೂ ಆತನ ಮೂವರು ಸ್ನೇಹಿತರು ಯಾವಾಗಲು ಇರ್ಫಾನ್​ ಅಂಗಡಿಯಲ್ಲಿಯೇ ಕ್ಷೌರ ಮಾಡಿಸಿಕೊಳ್ಳಲು ಬರುತ್ತಿದ್ದರು ಹಾಗೂ ಬಾಕಿ ಹಣವನ್ನು ಉಳಿಸಿಕೊಂಡಿದ್ದರು. ನಿನ್ನೆ ಕೂಡ ಹೇರ್​ಕಟ್​ ಮಾಡಿಸಿಕೊಳ್ಳಲು ಈ ನಾಲ್ವರು ಬಂದಿದ್ದಾರೆ. ಆದರೆ ಇರ್ಫಾನ್​, ಮೊದಲು ಬಾಕಿ ಹಣ ಪಾವತಿಸಿ, ಆಮೇಲೆ ಕ್ಷೌರ ಮಾಡುವೆ ಎಂದು ಹೇಳಿದ್ದಾನೆ. ಇದರಿಂದ ಕೋಪಗೊಂಡ ಸಮೀರ್​​ ತನ್ನ ಪರವಾನಗಿ ಪಡೆದ ಪಿಸ್ತೂಲಿನಿಂದ ಇರ್ಫಾನ್ ಮೇಲೆ ಹಾಗೂ ಆತನ ಸಹೋದರ ಇಮ್ರಾನ್​ ಕಾಲಿಗೆ ಗುಂಡು ಹಾರಿಸಿದ್ದಾನೆ.

ಇದನ್ನೂ ಓದಿ: Drug war: ಮೂವರನ್ನು ಕೊಂದು, ಹೆಣಗಳನ್ನು ನೇತುಹಾಕಿದ್ದು ಯಾಕೆ ಗೊತ್ತಾ?

ಇರ್ಫಾನ್ ಸ್ಥಳದಲ್ಲೇ ಮೃತಪಟ್ಟಿದ್ದು, ಇಮ್ರಾನ್​​ನನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ನಾಲ್ವರು ಆರೋಪಿಗಳ ಪೈಕಿ ಇಬ್ಬರನ್ನು ಬಂಧಿಸಿದ್ದು, ಉಳಿದವರಿಗಾಗಿ ಶೋಧ ನಡೆಸುತ್ತಿರುವುದಾಗಿ ಹಿರಿಯ ಪೊಲೀಸ್ ವರಿಷ್ಠಾಧಿಕಾರಿ ಸಂತೋಷ್ ಕುಮಾರ್ ಸಿಂಗ್ ಹೇಳಿದ್ದಾರೆ.