ವಾರಾಣಸಿ: ವ್ಯಕ್ತಿಯೊಬ್ಬ ಆರು ಮಕ್ಕಳನ್ನು ಬೈಕ್ನಲ್ಲಿ ಕೂರಿಸಿಕೊಂಡು ಟ್ರಾಫಿಕ್ ನಿಯಮಗಳನ್ನು ಉಲ್ಲಂಘಿಸಿ ಹೋಗುತ್ತಿರುವ ಚಿತ್ರವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಚಿತ್ರದಲ್ಲಿ ಬೈಕ್ ಸವಾರನ ಹಿಂದೆ ನಾಲ್ವರು ಮಕ್ಕಳು ಹಾಗೂ ಮುಂದೆ ಇಬ್ಬರು ಮಕ್ಕಳು ಕುಳಿತಿರುವುದು ಕಂಡು ಬಂದಿದೆ.
ಇದು ವಾರಾಣಸಿಯ ಚಿತ್ರವಾಗಿದ್ದು, ಈ ಬಗ್ಗೆ ಮಾಹಿತಿ ನೀಡಿರುವ ಕೊತ್ವಾಲಿ ಪೊಲೀಸ್ ಠಾಣೆಯ ಪ್ರಭಾರಿ ಆಶಿಶ್ ಮಿಶ್ರಾ, ಮಂಗಳವಾರ ಸಂಜೆ ಕೊತ್ವಾಲಿ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಹೋಗುತ್ತಿದ್ದ ಬೈಕ್ನಲ್ಲಿ ಹೋಗುತ್ತಿದ್ದ ಸವಾರನನ್ನು ತಡೆದು, ಛೀಮಾರಿ ಹಾಕಲಾಗಿದೆ. ಒಂದೇ ಬೈಕ್ನಲ್ಲಿ 6 ಮಕ್ಕಳನ್ನು ಕರೆದುಕೊಂಡು ಹೋಗುತ್ತಿದ್ದ ಆತ, ತನ್ನ ಮಕ್ಕಳ ಜೊತೆಗೆ ಇತರ ಮಕ್ಕಳ ಪ್ರಾಣಕ್ಕೂ ಅಪಾಯ ತಂದೊಡ್ಡಿದ್ದ.
ಬೈಕ್ ಸವಾರನಿಗೆ ನಮ್ಮ ಸಿಬ್ಬಂದಿ ದಂಡ ಹಾಕಲು ರಶೀದಿ ಬರೆಯಲು ಹೋದಾಗ ಹಿಂದೆ ಕುಳಿತಿದ್ದ ಮಕ್ಕಳು ಪೊಲೀಸ್ ಅಂಕಲ್ ದಯವಿಟ್ಟು ನಮ್ಮ ತಂದೆಯನ್ನು ಈ ಬಾರಿ ಬಿಟ್ಟುಬಿಡಿ. ಇನ್ನು ಮುಂದೆ ಹೀಗಾಗುವುದಿಲ್ಲ ಎಂದು ಮನವಿ ಮಾಡಿಕೊಂಡಿದ್ದಾರೆ ಎಂದು ತಿಳಿಸಿದರು.
ಮಕ್ಕಳ ಮನವಿಗೆ ಕರಗಿದ ಆಶಿಶ್ ಮಿಶ್ರಾ ಅವರು, ಮಕ್ಕಳನ್ನು ಬೈಕ್ನಿಂದ ಇಳಿಸಿ ಅವರ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು ಆಟೋ ವ್ಯವಸ್ಥೆ ಮಾಡಿ ತಂದೆಯೊಂದಿಗೆ ಮನೆಗ ಕಳುಹಿಸಿದ್ದಾರೆ. ಟ್ರಾಫಿಕ್ ನಿಯಮಗಳನ್ನು ಉಲ್ಲಂಘಿಸಿ, ಬೈಕ್ ಸವಾರಿ ಮಾಡಿದ ವ್ಯಕ್ತಿಗೆ ಇನ್ನು ಮುಂದೆ ಸರಿಯಾಗಿ ಟ್ರಾಫಿಕ್ ನಿಯಮಗಳನ್ನು ಪಾಲಿಸುವಂತೆ ಎಚ್ಚರಿಕೆ ನೀಡಿ ಬಿಡಲಾಯಿತು. ವಾರಾಣಸಿಯಲ್ಲಿ ವೈರಲ್ ಆಗಿರುವ ಈ ಫೋಟೋ ಇದೀಗ ಹೆಚ್ಚು ಚರ್ಚೆಯಾಗುತ್ತಿದೆ.
ಇದನ್ನೂ ಓದಿ : ಬೆಂಗಳೂರು: ಬೈಕ್ ನಂಬರ್‌ಪ್ಲೇಟ್ಗೆ ಮಾಸ್ಕ್ ತೊಡಿಸಿದ್ದ ಸವಾರನ ವಿರುದ್ಧ ಪ್ರಕರಣ ದಾಖಲು
ಏನ್ ಹೇಳುತ್ತೆ ಟ್ರಾಫಿಕ್ ರೂಲ್ಸ್: ಟ್ರಾಫಿಕ್ ರೂಲ್ಸ್ ಉಲ್ಲಂಘನೆ ಮಾಡುವವರಿಗೆ ಹೊಸ ಕಾನೂನಿನ ಪ್ರಕಾರ ಭಾರಿ ದಂಡ ಬೀಳುವುದು ಕನ್ಫರ್ಮ್. ತುರ್ತಾಗಿ ಆ್ಯಂಬುಲೆನ್ಸ್ಗೆ ದಾರಿ ಬಿಡದಿದ್ದರೆ 10 ಸಾವಿರ ದಂಡ ವಿಧಿಸುವ ನಿಯಮವಿದ್ದು, ಲೈಸನ್ಸ್ ಇಲ್ಲದೆ ಪ್ರಯಾಣಿಸಿದರೆ 5 ಸಾವಿರ ರೂ. ದಂಡ ಪಾವತಿಸಬೇಕಾಗುತ್ತದೆ. ಕುಡಿದು ವಾಹನ ಚಲಾಯಿಸಿದರೆ ಬರೋಬ್ಬರಿ 10 ಸಾವಿರ ರೂ. ದಂಡವಿದೆ. ಇದರ ಜತೆಗೆ ಅಪ್ರಾಪ್ತರು ವಾಹನ ಚಲಾಯಿಸಿದರೆ ಅವರನ್ನು ಬಾಲಾಪರಾಧ ಕಾನೂನು ಪ್ರಕಾರ ವಿಚಾರಣೆ ನಡೆಸುವ ಜತೆಗೆ ಅವರ ಪೋಷಕರನ್ನು ಹೊಣೆಗಾರರನ್ನಾಗಿ ಮಾಡಿ 3 ವರ್ಷ ಶಿಕ್ಷೆ ಹಾಗೂ 25 ಸಾವಿರ ರೂ. ದಂಡ ವಿಧಿಸಲಾಗುತ್ತದೆ.
ಇದರ ಜತೆಗೆ ಅಪಾಯಕಾರಿಯಾಗಿ ಡ್ರೈವ್ ಮಾಡುವುದು, ಓವರ್ ಸ್ಪೀಡ್, ಹೆಲ್ಮೆಟ್ ಹಾಕಿಕೊಳ್ಳದೇ ಡ್ರೈವ್ ಮಾಡಿದರೆ ದಂಡ ವಿಧಿಸಲು ಹೊಸ ಕಾನೂನಿನಲ್ಲಿ ಅವಕಾಶ ಕಲ್ಪಿಸಿ ಕೊಡಲಾಗಿದೆ.
