ಮಾಲ್ಢಾ(ಪಶ್ಚಿಮ ಬಂಗಾಳ): ವ್ಯಕ್ತಿಯೊಬ್ಬ ಪಿಸ್ತೂಲ್ ಹಿಡಿದು ಶಾಲೆಯೊಂದರ ತರಗತಿ ಕೊಠಡಿಗೆ ನುಗ್ಗಿ ಕೆಲಕಾಲ ಆತಂಕ ಸೃಷ್ಟಿಸಿದ ಘಟನೆ ಇಂದು ಮಾಲ್ಡಾದಲ್ಲಿ ನಡೆದಿದೆ. ಮಾಲ್ಡಾದ ಮುಚ್ಚಿಯ ಚಂದ್ರ ಮೋಹನ್ ಪ್ರೌಢಶಾಲೆಯಲ್ಲಿ ಈ ಘಟನೆ ನಡೆದಿದ್ದು, ಮಾಹಿತಿ ತಿಳಿದ ಪೊಲೀಸರು ಸ್ಥಳಕ್ಕೆ ಧಾವಿಸಿ ದೇವ್ ವಲ್ಲಭ ಎಂಬ ವ್ಯಕ್ತಿಯನ್ನು ಬಂಧಿಸಿದ್ದಾರೆ.
ಬುಧವಾರ ಮಧ್ಯಾಹ್ನ ತರಗತಿ ನಡೆಯುತ್ತಿರುವ ವೇಳೆ ಕೈಯಲ್ಲಿ ಪಿಸ್ತೂಲ್ ಹಿಡಿದ ವ್ಯಕ್ತಿ ಏಕಾಏಕಿ ತರಗತಿಯ ಕೊಠಡಿಗೆ ನುಗ್ಗಿ ಎಲ್ಲರನ್ನು ಬೆದರಿಸಿದ್ದಾನೆ. ಇದರಿಂದ ವಿದ್ಯಾರ್ಥಿಗಳು ಭಯದಿಂದ ಕೂಗಾಡಿದ್ದಾರೆ. ಶಿಕ್ಷಕರೂ ಸಹ ಬೆಚ್ಚಿಬಿದ್ದು, ಸ್ಥಳೀಯ ಪೊಲೀಸ್ ಠಾಣೆಗೆ ವಿಷಯ ತಿಳಿಸಿದ್ದಾರೆ. ತಕ್ಷಣ ಪೊಲೀಸರು ಸ್ಥಳಕ್ಕೆ ಧಾವಿಸಿದ್ದಾರೆ. ಈ ವೇಳೆ ಡಿಎಸ್ಪಿ ಅಜರುದ್ದೀನ್ ಖಾನ್ ತಮ್ಮ ಜೀವವನ್ನು ಪಣಕ್ಕಿಟ್ಟು ಯಾವುದೇ ಅನಾಹುತ ಆಗದಂತೆ ವ್ಯಕ್ತಿಯನ್ನು ಸೆರೆ ಹಿಡಿದಿದ್ದಾರೆ.
ಈ ಬಗ್ಗೆ ಶಾಲೆಯ ಶಿಕ್ಷಕ ದೇಬಾಶಿಸ್ ಶೀಲ್ ಮಾತನಾಡಿ, ಆ ವ್ಯಕ್ತಿಯ ಹೆಸರು ದೇವ್ ವಲ್ಲಭ. ಅವರ ಪತ್ನಿ ಮತ್ತು ಮಗ ಸುಮಾರು ಒಂದು ವರ್ಷದಿಂದ ಕಾಣೆಯಾಗಿದ್ದಾರೆ. ವ್ಯಕ್ತಿ ತನ್ನ ಹೆಂಡತಿ ಮತ್ತು ಮಕ್ಕಳನ್ನು ಹುಡುಕಲು ಹಲವಾರು ಬಾರಿ ಪೊಲೀಸರನ್ನು ಮತ್ತು ಮಾಧ್ಯಮದವರನ್ನು ಸಂಪರ್ಕಿಸಿದ್ದನು. ಆದರೆ ಯಾರೂ ಆತನಿಗೆ ಸಹಾಯ ಮಾಡಿರಲಿಲ್ಲ, ಇಂದು ಶಾಲೆಯ ಮುಖ್ಯ ಗೇಟಿನ ಪಕ್ಕದ ಸಣ್ಣ ಬಾಗಿಲಿನಿಂದ ಶಾಲೆಗೆ ಪ್ರವೇಶಿಸಿದ ವ್ಯಕ್ತಿ ಬ್ಯಾಗ್‌ನಿಂದ ಪಿಸ್ತೂಲ್ ಹೊರತೆಗೆದು ತರಗತಿಯ ವಿದ್ಯಾರ್ಥಿಗಳಲ್ಲಿ ಆತಂಕ ಸೃಷ್ಟಿಸಿದ್ದ. ಆತನ ಬ್ಯಾಗ್‌ನಲ್ಲಿ ಕೆಲವು ಪೆಟ್ರೋಲ್ ಬಾಂಬ್‌ಗಳೂ ಕೂಡ ಪತ್ತೆಯಾಗಿವೆ. ಈ ವ್ಯಕ್ತಿ ಮಾನಸಿಕ ಅಸ್ವಸ್ಥನಾಗಿದ್ದಾನೆ ಎಂದು ಹೇಳಿದರು.
ಘಟನೆಯ ವೇಳೆ ತರಗತಿಯಲ್ಲಿದ್ದ ಶಿಕ್ಷಕಿ ಪ್ರತೀಕ್ಷಾ ಮಂಡಲ್ ಮಾತನಾಡಿ, ಏಕಾಏಕಿ ವ್ಯಕ್ತಿಯೊಬ್ಬ ತರಗತಿಗೆ ನುಗ್ಗಿ ನನಗೆ ಪಿಸ್ತೂಲು ತೋರಿಸಿ ನನ್ನನ್ನು ಮತ್ತು ವಿದ್ಯಾರ್ಥಿಗಳನ್ನು ಇದ್ದಲ್ಲೇ ಇರುವಂತೆ ಬೆದರಿಸಿದ ಎಂದು ಹೇಳಿದರು. ದೇಬ್ ಬಲ್ಲಭ್ ಅವರ ಮನೆ ಮುಚ್ಚಿಯ ಗ್ರಾಮ ಪಂಚಾಯತ್‌ನ ನೆಮುವಾ ಗ್ರಾಮದಲ್ಲಿದೆ. ಅವರ ಪತ್ನಿ ರೀಟಾ ವಲ್ಲಭ ಅವರು ಹಳೆಯ ಮಾಲ್ಡಾ ಪಂಚಾಯತ್ ಸಮಿತಿಯ ಬಿಜೆಪಿ ಸದಸ್ಯರಾಗಿದ್ದರು. ಆತನ ಹೆಂಡತಿ ರೀಟಾ ಮತ್ತು ಮಗ ರುದ್ರ ಕೆಲವು ವರ್ಷಗಳ ಹಿಂದೆ ಮನೆ ಬಿಟ್ಟು ಹೋಗಿದ್ದರು. ಪೊಲೀಸರು ತನಿಖೆಯಲ್ಲಿ ವ್ಯಕ್ತಿಯು ಮಾನಸಿಕ ಅಸ್ವಸ್ಥನಾಗಿದ್ದಾನೆ ಎಂದು ತಿಳಿಸಿದ್ದಾರೆ.
ಈ ಕುರಿತು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಮಾತನಾಡಿ, ನಾವು ಆ ವ್ಯಕ್ತಿಯನ್ನು ಸೆರೆ ಹಿಡಿದಿದ್ದೇವೆ. ಆತನ ಬಳಿ ಇದ್ದ ಎಲ್ಲಾ ವಸ್ತುಗಳನ್ನು ವಶಕ್ಕೆ ತೆಗೆದುಕೊಂಡಿದ್ದೇವೆ. ಎಲ್ಲಾ ವಿದ್ಯಾರ್ಥಿಗಳು ಮತ್ತು ಶಿಕ್ಷಕರು ಸುರಕ್ಷಿತವಾಗಿದ್ದಾರೆ ಎಂದು ತಿಳಿಸಿದರು. ಇನ್ನು ಶಾಲೆಯಲ್ಲಿ ಯಾವುದೇ ಅಹಿತಕರ ಘಟನೆ ನಡೆಯದಂತೆ ಕರ್ತವ್ಯ ಪ್ರಜ್ಞೆ ಮೆರೆದ ಪೊಲೀಸರ ಕಾರ್ಯಕ್ಕೆ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಅವರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ:ಭ್ರೂಣಲಿಂಗ ಪತ್ತೆ ಪರೀಕ್ಷೆ ನಡೆಸುತ್ತಿದ್ದ ಗ್ಯಾಂಗ್ ಬಂಧನ
