ಐಸಿಯು ವಾರ್ಡ್​ಗೆ ಶೂ ಧರಿಸಿ ಹೋಗಲು ಬಿಡಲಿಲ್ಲ ಎಂದು ಆಸ್ಪತ್ರೆ ಕೆಡವಲು ಬುಲ್ಡೋಜರ್‌​ ಕರೆಸಿದ ಮೇಯರ್!

Lucknow Mayor called Bulldozer to Hospital: ಉತ್ತರ ಪ್ರದೇಶದ ಲಖನೌ ಮಹಾನಗರ ಪಾಲಿಕೆ ಮೇಯರ್ ಸುಷ್ಮಾ ಖಾರ್ಕವಾಲ್​ ಅವರು ತಮಗೆ ಶೂ ಧರಿಸಿ ಐಸಿಯು ಘಟಕಕ್ಕೆ ತೆರಳಲು ಬಿಡಲಿಲ್ಲ ಎಂಬ ಕೋಪದಿಂದ ಸ್ಥಳಕ್ಕೆ ಬುಲ್ಡೋಜರ್‌ಗಳನ್ನು ಕರೆಸಿದ್ದರು ಎಂದು ವರದಿಯಾಗಿದೆ.

ಲಖನೌ (ಉತ್ತರ ಪ್ರದೇಶ): ಖಾಸಗಿ ಆಸ್ಪತ್ರೆಯ ತುರ್ತು ನಿಗಾ ಘಟಕದಲ್ಲಿ (ಐಸಿಯು) ಶೂ ಧರಿಸಿ ಹೋಗುವುದನ್ನು ತಡೆದಿದ್ದಕ್ಕೆ ಉತ್ತರ ಪ್ರದೇಶ ರಾಜಧಾನಿ ಲಖನೌ ಮಹಾನಗರ ಪಾಲಿಕೆ ಮೇಯರ್​ ರೊಚ್ಚಿಗೆದ್ದ ಘಟನೆ ಸೋಮವಾರ ನಡೆದಿದೆ. ಆಸ್ಪತ್ರೆಯನ್ನೇ ಕೆಡವಲು ಪಾಲಿಕೆ ಕಚೇರಿಯಿಂದ ಬುಲ್ಡೋಜರ್‌​ಗಳನ್ನು ಸ್ಥಳಕ್ಕೆ ಕರೆಸಿ ಮೇಯರ್​ ತಮ್ಮ 'ಪವರ್​' ತೋರಿಸಿದ್ದಾರೆ.

ಬಿಜ್ನೋರ್​ನಲ್ಲಿರುವ ವಿನಾಯಕ್ ಆಸ್ಪತ್ರೆಗೆ ಸುಷ್ಮಾ ಖಾರ್ಕವಾಲ್​ ಭೇಟಿ ನೀಡಿದ್ದರು. ಐಸಿಯು ಘಟಕದಲ್ಲಿ ದಾಖಲಾಗಿದ್ದ ಪಾಲಿಕೆಯ ನೌಕರರನ್ನು ನೋಡಲು ಅವರು​ ಬಂದಿದ್ದರು. ಈ ವೇಳೆ, ಮೇಯರ್​ ಸುಷ್ಮಾ ಹಾಗೂ ಅವರ ಜೊತೆಗೆ ಬಂದಿದ್ದ ಇತರ ಸಿಬ್ಬಂದಿ ಶೂ ಧರಿಸಿ ಐಸಿಯು ವಾರ್ಡ್​ಗೆ ಹೋಗುತ್ತಿದ್ದರು. ಇದನ್ನು ಗಮನಿಸಿದ ಆಸ್ಪತ್ರೆ ವೈದ್ಯರು ಮತ್ತು ಸಿಬ್ಬಂದಿ ಶೂ ಧರಿಸುವುದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಶೂ ಧರಿಸಿ ಹೋಗುವುದರಿಂದ ಸೋಂಕು ಹರಡುವ ಭೀತಿಯಿಂದ ಆಸ್ಪತ್ರೆಯವರು ಅವಕಾಶ ನೀಡಿಲ್ಲ ಎಂದು ಹೇಳಲಾಗುತ್ತಿದೆ.

ಇದೇ ವಿಚಾರವಾಗಿ ಮೇಯರ್​ ಹಾಗೂ ಆಸ್ಪತ್ರೆಯ ಸಿಬ್ಬಂದಿ ನಡುವೆ ಸಾಕಷ್ಟು ವಾಗ್ವಾದ ನಡೆದಿದೆ. ತಮ್ಮ ಜೊತೆಗೆ ಅಸಭ್ಯವಾಗಿ ವರ್ತಿಸಿದರು ಎಂದು ಸುಷ್ಮಾ ಆಸ್ಪತ್ರೆಯ ಆಡಳಿತ ಮಂಡಳಿ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಸಿಟ್ಟಿಗೆದ್ದ ಮೇಯರ್​ ಆಸ್ಪತ್ರೆಯ ಕಟ್ಟಡವನ್ನೇ ಕೆಡವಲು ಮುಂದಾಗಿದ್ದಾರೆ. ಇದಕ್ಕಾಗಿ ತಕ್ಷಣವೇ ತಮ್ಮ ಪಾಲಿಕೆ ಕಚೇರಿಯಿಂದ ಜಾರಿದಳ ಹಾಗೂ ಬುಲ್ಡೋಜರ್​ ಬರಬೇಕೆಂದು ನಿರ್ದೇಶನ ನೀಡಿದ್ದಾರೆ.

ಮೇಯರ್ ಸೂಚನೆಯಂತೆ ಕ್ಷಣದಲ್ಲೇ ಬುಲ್ಡೋಜರ್​ಗಳು​ ಸ್ಥಳಕ್ಕೆ ಆಗಮಿಸಿವೆ. ಇದರಿಂದ ಅಲ್ಲೋಲ ಕಲ್ಲೋಲ ಉಂಟಾಗಿದೆ. ಮತ್ತೊಂದೆಡೆ, ಜಾರಿ ದಳ ಕೂಡ ಸ್ಥಳಕ್ಕೆ ಬಂದು ಆಸ್ಪತ್ರೆಯ ಆಡಳಿತ ಮಂಡಳಿಯಿಂದ ಅತಿಕ್ರಮಣ ಮಾಡಲಾಗಿದೆ ಎಂಬುದನ್ನು ಗುರುತಿಸಿದೆ. ಈ ವಿಷಯ ತಿಳಿದ ಪೊಲೀಸರು ಸ್ಥಳಕ್ಕೆ ಆಗಮಿಸಿ ಪರಿಸ್ಥಿತಿ ತಿಳಿಗೊಳಿಸಿದ್ದಾರೆ.

ಇದರ ನಡುವೆ ಸದ್ಯಕ್ಕೆ ಬುಲ್ಡೋಜರ್‌ಗಳ ಕ್ರಮ ಸಾಧ್ಯವಾಗದಿದ್ದರೂ ಮುಂದಿನ ದಿನಗಳಲ್ಲಿ ಅತಿಕ್ರಮಣದ ವಿರುದ್ಧದ ಕ್ರಮ ಜರುಗಿಸಲಾಗುತ್ತದೆ ಎಂದು ಆಸ್ಪತ್ರೆಯ ಗೇಟ್‌ನಲ್ಲಿ ಎಚ್ಚರಿಕೆ ಪತ್ರವನ್ನು ಜಾರಿ ದಳ ಅಂಟಿಸಿದೆ. ಈ ಕುರಿತು ಮೇಯರ್​ ಸುಷ್ಮಾ ಖಾರ್ಕವಾಲ್ ಪ್ರತಿಕ್ರಿಯಿಸಿದ್ದು, ''ಶೂ ಧರಿಸಿ ಐಸಿಯು ವಾರ್ಡ್​ ಒಳಗೆ ಹೋಗಲು ಮುಂದಾಗಿದ್ದೆವು ಎಂಬುದು ಆಧಾರರಹಿತ ಆರೋಪ. ಈ ಕುರಿತು ಆಸ್ಪತ್ರೆಯ ಆಡಳಿತ ಮಂಡಳಿ ಸಂಪೂರ್ಣವಾಗಿ ಸುಳ್ಳು ಹೇಳುತ್ತಿದೆ'' ಎಂದು ಹೇಳಿದ್ದಾರೆ.

ಮುಂದುವರೆದು ಮಾತನಾಡಿದ ಅವರು, ''ನಮ್ಮ ನಿವೃತ್ತ ನೌಕರರೊಬ್ಬರು ಆಸ್ಪತ್ರೆಯಲ್ಲಿ ದಾಖಲಾಗಿದ್ದಾರೆ. ಚಿಕಿತ್ಸೆ ಹಾಗೂ ವೈದ್ಯಕೀಯ ವರದಿ ಬಗ್ಗೆ ಕುಟುಂಬಸ್ಥರು ನಮನಕ್ಕೆ ತಂದಿದ್ದರು. ಈ ಬಗ್ಗೆ ನಾನು ಆಡಳಿತ ಮಂಡಳಿಗೆ ದೂರು ನೀಡಲು ಬಂದಿದ್ದೆ'' ಎಂದು ಸ್ಪಷ್ಟನೆ ನೀಡಿದ್ದಾರೆ. ಇದೇ ವೇಳೆ, ಬುಲೋಜ್ಡರ್​ಗಳನ್ನು ಕರೆಸಿ ಕ್ರಮಕ್ಕೆ ಮುಂದಾಗಿದ್ದನ್ನು ನಿರಾಕರಿಸಿರುವ ಮೇಯರ್​, ''ಆಸ್ಪತ್ರೆಯಿಂದ ಅತಿಕ್ರಮಣವಾಗಿದ್ದು, ಈ ಕುರಿತು ತನಿಖೆ ನಡೆಸಲಾಗುವುದು'' ಎಂದರು.

ಇದನ್ನೂ ಓದಿ: ಹೆದ್ದಾರಿಗೆ ಅಡ್ಡಿಯಾಗಿದ್ದ ಮಂದಿರ - ಮಜಾರ್ ತೆರವು: ಮತ್ತೆ ಯೋಗಿ ನಾಡಲ್ಲಿ ಬುಲ್ಡೋಜರ್ ಘರ್ಜನೆ