ಕುನೋ ಕಾಡಲ್ಲಿ ಹಂಟಿಂಗ್​ ಶುರು.. 24 ತಾಸಲ್ಲೇ ಮೊದಲ ಬೇಟೆಯಾಡಿದ ಚೀತಾಗಳು

ನಮೀಬಿಯಾದಿಂದ ಬಂದು ಕುನೋ ಕಾಡಿಗೆ ತೆರಳಿದ 24 ತಾಸಲ್ಲೇ 2 ಚೀತಾಗಳು ಮೊದಲ ಬೇಟೆಯಾಡಿವೆ. ಈ ಬಗ್ಗೆ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಕುನೋ (ಮಧ್ಯಪ್ರದೇಶ): ನಮೀಬಿಯಾದಿಂದ ತಂದಿರುವ 2 ಚೀತಾಗಳು ಕ್ವಾರಂಟೈನ್​ ಅವಧಿ ಮುಗಿಸಿ ಕುನೋ ರಾಷ್ಟ್ರೀಯ ಉದ್ಯಾನವನಕ್ಕೆ ಹೋದ 24 ಗಂಟೆಗಳಲ್ಲೇ ಅವುಗಳು ಮೊದಲ ಬೇಟೆಯಾಡಿವೆ. ಈ ಬಗ್ಗೆ ಅರಣ್ಯಾಧಿಕಾರಿಗಳು ಮಾಹಿತಿ ನೀಡಿದ್ದು, ಚೀತಾಗಳು ಆಹಾರವನ್ನು ಹುಡುಕಿಕೊಂಡು ಹೋಗಿ ಬೇಟೆಯಾಡಿವೆ. ಯಾವ ಪ್ರಾಣಿಯನ್ನು ಬಲಿ ಪಡೆದಿವೆ ಎಂಬ ಬಗ್ಗೆ ವಿವರ ಸಿಕ್ಕಿಲ್ಲ ಎಂದು ಹೇಳಿದ್ದಾರೆ.

ಸೆಪ್ಟೆಂಬರ್ 17 ರಂದು ಪ್ರಧಾನಿ ನರೇಂದ್ರ ಮೋದಿ ಅವರ ಜನ್ಮದಿನದ ಹಿನ್ನೆಲೆ ನಮೀಬಿಯಾದಿಂದ ತರಲಾಗಿದ್ದ 5 ಚೀತಾಗಳನ್ನು ಕೊನೋ ರಾಷ್ಟ್ರೀಯ ಉದ್ಯಾನವನದಲ್ಲಿ ಬಿಡುಗಡೆ ಮಾಡಲಾಗಿತ್ತು. ಅವುಗಳು ಇಲ್ಲಿಯ ವಾತಾವರಣಕ್ಕೆ ಹೊಂದಿಕೊಳ್ಳಲು ಕಾಡಿನ ಒಂದು ಪ್ರದೇಶದಲ್ಲಿ ವೈದ್ಯರ ನಿಗಾದಲ್ಲಿ ಕ್ವಾರಂಟೈನ್​ ಮಾಡಲಾಗಿತ್ತು.

ನಿನ್ನೆ 2 ಚೀತಾಗಳನ್ನು ದಟ್ಟಾರಣ್ಯಕ್ಕೆ ಬಿಡಲಾಗಿತ್ತು. ಕಾಡಿಗೆ ಎಂಟ್ರಿ ಕೊಟ್ಟಿದ್ದ ಜಗತ್ತಿನ ಅತಿವೇಗದ ಪ್ರಾಣಿಗಳು ಬೇಟೆಯಾಡಿವೆ. ಈ ಮೂಲಕ ಅವುಗಳು ಭಾರತದ ವಾತಾವರಣಕ್ಕೆ ಹೊಂದಿಕೊಳ್ಳುತ್ತಿವೆ ಎಂಬುದನ್ನು ತೋರಿಸಿಕೊಟ್ಟಿವೆ. ದೇಶದಲ್ಲಿ ಅಳಿದು ಹೋಗಿದ್ದ ಚೀತಾ ಸಂತತಿಯನ್ನು ಮರಳಿ ಸೃಜಿಸಲು ಪ್ರಧಾನಿ ಮೋದಿ ಅವರು ಇಚ್ಛಿಸಿದ್ದು, ನಮೀಬಿಯಾದಿಂದ 5 ಪ್ರಾಣಿಗಳನ್ನು ತರಲಾಗಿದೆ. ಇವುಗಳು ವಿಶ್ವದಲ್ಲಿಯೇ ಅತ್ಯಂತ ವೇಗದ ಪ್ರಾಣಿ ಎಂಬ ಖ್ಯಾತಿ ಹೊಂದಿವೆ. ಗಂಟೆಗೆ 100-120 ಕಿಮೀ ವೇಗದಲ್ಲಿ ಓಡುತ್ತವೆ.