ನವದೆಹಲಿ: ದೇಹಕ್ಕೆ ಮುದನೀಡುವ ಸ್ಪಾ ಮಸಾಜ್ ಸೋಗಿನಲ್ಲಿ ನಡೆಯುತ್ತಿದ್ದ ಅಂತಾರಾಷ್ಟ್ರೀಯ ಸೆಕ್ಸ್ ದಂಧೆಯನ್ನು ಪೊಲೀಸರು ಭೇದಿಸಿದ್ದಾರೆ. 7 ವಿದೇಶಿಯರು ಸೇರಿದಂತೆ 12 ಯುವತಿ ಮತ್ತು ಓರ್ವ ಸಿಬ್ಬಂದಿಯನ್ನು ಬಂಧಿಸಲಾಗಿದೆ. ನಗರದ ರಿಷಭ್ ವಿಹಾರ್ದಲ್ಲಿರುವ ಸ್ಪಾ ಮಸಾಜ್ ಸೆಂಟರ್ನಲ್ಲಿ ಸೆಕ್ಸ್ ದಂಧೆ ನಡೆಯುತ್ತಿರುವ ಬಗ್ಗೆ ಮಾಹಿತಿ ಪೊಲೀಸರಿಗೆ ಲಭಿಸಿತ್ತು. ತಂಡ ರಚಿಸಿದ ಪೊಲೀಸ್ ಅಧಿಕಾರಿಗಳು ಇಂದು ಸೆಂಟರ್ ಮೇಲೆ ದಾಳಿ ನಡೆಸಿದರು.
ಗ್ರಾಹಕನಂತೆ ತೆರಳಿ ದಾಳಿ: ಸ್ಪಾ ಮಸಾಜ್ ಕೇಂದ್ರದಲ್ಲಿ ನಡೆಯುತ್ತಿದ್ದ ಕರ್ಮಕಾಂಡವನ್ನು ಬಯಲಿಗೆಳೆಯಲು ಯೋಜನೆ ರೂಪಿಸಿದ ಪೊಲೀಸರು, ಓರ್ವನನ್ನು ರಹಸ್ಯವಾಗಿ ಇಲಾಖೆಯಿಂದಲೇ ಮಸಾಜ್ ಕೇಂದ್ರಕ್ಕೆ ಕಳುಹಿಸಿದ್ದರು. ಅಲ್ಲಿದ್ದ ಸಿಬ್ಬಂದಿ ಥಾಯ್ಲೆಂಡ್ನ ಯುವತಿಯಿಂದ ಮಸಾಜ್ಗೆ 2 ಸಾವಿರ ರೂಪಾಯಿ ಚಾರ್ಜ್ ಮಾಡಿದ್ದಾರೆ. ಗ್ರಾಹಕ ಮತ್ತು ಯುವತಿ ಕೋಣೆಯೊಳಗೆ ಹೋಗಿ ಮಸಾಜ್ ಮಾಡುವಾಗ, 3 ಸಾವಿರ ನೀಡಿದಲ್ಲಿ "ಹೆಚ್ಚುವರಿ ಸೇವೆ" ನೀಡುವುದಾಗಿ ಯುವತಿ ಹೇಳಿದ್ದಾಳೆ.
ಹಣ ನೀಡಿದ ಗ್ರಾಹಕ ಬಳಿಕ ಪೊಲೀಸರಿಗೆ ತನ್ನಲ್ಲಿದ್ದ ಮೊಬೈಲ್ನಿಂದ ಮಿಸ್ಡ್ ಕಾಲ್ ನೀಡಿ ಸೂಚನೆ ನೀಡಿದ್ದಾನೆ. ತಕ್ಷಣವೇ ಪೊಲೀಸರು ಕೇಂದ್ರದ ಮೇಲೆ ದಾಳಿ ಮಾಡಿ ಕರ್ಮಕಾಂಡವನ್ನು ಬಯಲಿಗೆಳೆದಿದ್ದಾರೆ. ಕೇಂದ್ರದಲ್ಲಿದ್ದ ಸಿಬ್ಬಂದಿ, 7 ವಿದೇಶಿ ಯುವತಿಯರು ಸೇರಿ 13 ಮಂದಿಯನ್ನು ಬಂಧಿಸಲಾಗಿದೆ.
ಥಾಯ್ಲೆಂಡ್ ರಾಯಭಾರ ಕಚೇರಿಗೆ ಮಾಹಿತಿ: ಬಂಧಿತ ವಿದೇಶಿ ಯುವತಿಯರೆಲ್ಲರೂ ಥಾಯ್ಲೆಂಡ್ ಮೂಲದವರಾಗಿದ್ದಾರೆ. ಭಾರತಕ್ಕೆ ಬರಲು ಅವರ ಬಳಿ ಯಾವುದೇ ದೃಢೀಕೃತ ದಾಖಲೆಗಳಿಲ್ಲ. ಅಕ್ರಮ ವಲಸೆ ಕಾಯ್ದೆಯಡಿ ದೂರು ದಾಖಲಿಸಿಕೊಳ್ಳಲಾಗಿದೆ. ಈ ಬಗ್ಗೆ ಥಾಯ್ಲೆಂಡ್ ರಾಯಭಾರ ಕಚೇರಿಗೆ ಮಾಹಿತಿ ನೀಡಲಾಗಿದೆ. ಸ್ಪಾ ಕೇಂದ್ರ ನಡೆಸುತ್ತಿರುವ ಮಾಲೀಕ ಆಶಿಶ್ ಚೋಪ್ರಾ ಎಂಬುವರ ಸೆರೆಗೆ ಪೊಲೀಸರು ಶೋಧ ನಡೆಸುತ್ತಿದ್ದಾರೆ.
