ಅಹಮದಾಬಾದ್ (ಗುಜರಾತ್): ರೈತರು ಸ್ಮಾರ್ಟ್ಫೋನ್(smartphone) ಖರೀದಿಸಲು ಗುಜರಾತ್ ಸರ್ಕಾರವು1,500ರೂ. ಆರ್ಥಿಕ ನೆರವು (Gujarat government supports farmers) ನೀಡಲು ನಿರ್ಧರಿಸಿದೆ ಎಂದು ರಾಜ್ಯ ಕೃಷಿ ಇಲಾಖೆಯು ಅಧಿಸೂಚನೆ ಹೊರಡಿಸಿದೆ.
ಹೆಚ್ಚಿನ ಕ್ಷೇತ್ರಗಳು ಡಿಜಿಟಲೀಕರಣವಾಗುತ್ತಿದೆ. ಕೃಷಿ ಕ್ಷೇತ್ರದಲ್ಲಿಯೂ ಡಿಜಿಟಲ್‌ ಸೇವೆಗಳ ಪ್ರಭುತ್ವ ಬೆಳೆಯುತ್ತಿದ್ದು, ಕೃಷಿ ಆದಾಯವನ್ನು ಹೆಚ್ಚಿಸಲು ವಿವಿಧ ಉದ್ದೇಶಗಳಿಗೆ ಬಳಸಬಹುದಾದ ಸ್ಮಾರ್ಟ್ಫೋನ್ ಖರೀದಿಸುವಂತೆ ರೈತರನ್ನು ಉತ್ತೇಜಿಸುವುದು ಈ ಯೋಜನೆಯ ಪ್ರಮುಖ ಉದ್ದೇಶವಾಗಿದೆ ಎಂದು ಕೃಷಿ ಇಲಾಖೆಯು ಹೊರಡಿಸಿದ ಅಧಿಸೂಚನೆಯಲ್ಲಿ ಉಲ್ಲೇಖಿಸಿದೆ.
ಈ ಯೋಜನೆಯ ಪ್ರಯೋಜನ ಪಡೆಯಲು ಸ್ಮಾರ್ಟ್ಫೋನ್ ಒಟ್ಟು ಮೊತ್ತದ ಶೇ .10 ಭಾಗ ಅಂದರೆ ₹1,500 ಸಹಾಯ ಪಡೆಯಲು ಐ–ಖೆದುತ್‌ ಪೋರ್ಟಲ್‌ನಲ್ಲಿ(i-khedut portal) ಅರ್ಜಿ ಸಲ್ಲಿಸಬಹುದು ಎಂದು ರಾಜ್ಯ ಕೃಷಿ, ರೈತ ಕಲ್ಯಾಣ ಮತ್ತು ಸಹಕಾರ ಇಲಾಖೆ ಶನಿವಾರ ಹೊರಡಿಸಿದ ಸರ್ಕಾರದ ನಿರ್ಣಯ (ಜಿಆರ್)ದಲ್ಲಿ ತಿಳಿಸಿದೆ.
ಈ ಆರ್ಥಿಕ ನೆರವು ಸ್ಮಾರ್ಟ್ಫೋನ್ ಖರೀದಿಸಲು ಮಾತ್ರ ಸಂಬಂಧಿಸಿದೆ. ಚಾರ್ಜರ್‌, ಇಯರ್‌ಫೋನ್‌, ಪವರ್ಬ್ಯಾಂಕ್ ಮೊದಲಾದ ಬಿಡಿಭಾಗಗಳಿಗಾಗಿ ಅರ್ಜಿ ಸಲ್ಲಿಸುವಂತಿಲ್ಲ ಎಂದು ಪ್ರಕಟಣೆಯಲ್ಲಿ ವಿವರಿಸಿದೆ. ಅರ್ಜಿಯನ್ನು ಅನುಮೋದಿಸಿದ ನಂತರ, ಫಲಾನುಭವಿ ರೈತರು ಸ್ಮಾರ್ಟ್‌ಫೋನ್‌ನ ಖರೀದಿ ಬಿಲ್‌ನ ಪ್ರತಿ, ಮೊಬೈಲ್ ಐಎಂಇಐ(IMEI) ಸಂಖ್ಯೆ ಇತ್ಯಾದಿಗಳನ್ನು ಒದಗಿಸಬೇಕಾಗುತ್ತದೆ ಎಂದು ಜಿಆರ್ ಪ್ರಕಟಣೆ ಮಾಹಿತಿ ನೀಡಿದೆ.
ಇದನ್ನೂ ಓದಿ: Dedication of Thief : ದಿನಕ್ಕೆ ಒಂದೇ ಬಾರಿ ಊಟ, ತೂಕ ಇಳಿಸಿಕೊಂಡು ಕಳ್ಳ ಕದ್ದಿದ್ದು ಬರೋಬ್ಬರಿ 37 ಲಕ್ಷ ರೂ.!
ಇದರಿಂದ ರಾಜ್ಯ ಸರ್ಕಾರದ ವಿವಿಧ ಯೋಜನೆಗಳಿಗೆ ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸಲು, ರೈತರಿಗಿರುವ ಸೌಲಭ್ಯಗಳ ಬಗ್ಗೆ ತಿಳಿಯಲು ನೆರವಾಗಲಿದೆ.
