ಹೈದರಾಬಾದ್(ತೆಲಂಗಾಣ): ಫ್ರೆಂಚ್ ಏರೋಸ್ಪೇಸ್ ಮೇಜರ್ ಸಫ್ರಾನ್ ಬುಧವಾರ ತನ್ನ ಅತಿದೊಡ್ಡ ಮತ್ತು ಮೊದಲ ವಿಮಾನ ಎಂಜಿನ್ MRO (ನಿರ್ವಹಣೆ, ದುರಸ್ತಿ, ಕೂಲಂಕುಷ ಪರೀಕ್ಷೆ) ಸೌಲಭ್ಯವನ್ನು ಹೈದರಾಬಾದ್ನಲ್ಲಿ ಸ್ಥಾಪಿಸುವುದಾಗಿ ಘೋಷಿಸಿತು. 1,200 ಕೋಟಿ (USD 150 ಮಿಲಿಯನ್) ರೂ.ಗಳ ಹೂಡಿಕೆಯಲ್ಲಿ ಈ ಸೌಲಭ್ಯವನ್ನು ಸ್ಥಾಪಿಸಲಾಗುವುದು ಮತ್ತು ರಾಜ್ಯದಲ್ಲಿ ಸುಮಾರು 1,000 ಉದ್ಯೋಗಗಳನ್ನು ಸೃಷ್ಟಿಸುವ ನಿರೀಕ್ಷೆಯಿದೆ. ಹೈದರಾಬಾದ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಮತ್ತು ತೆಲಂಗಾಣ ವಾಯುಯಾನ ಪರಿಸರ ವ್ಯವಸ್ಥೆಗೆ ಎಂಆರ್ಒ ಉತ್ತೇಜನ ನೀಡಲಿದೆ ಎಂದು ಅಧಿಕೃತ ಪತ್ರಿಕಾ ಪ್ರಕಟಣೆಯಲ್ಲಿ ಕಂಪನಿ ತಿಳಿಸಿದೆ.
ಸಫ್ರಾನ್ ಗ್ರೂಪ್ ತನ್ನ ಎಂಆರ್ಒ ಸ್ಥಾಪನೆಗಾಗಿ ಹೈದರಾಬಾದ್ ನಗರವನ್ನು ಆಯ್ಕೆ ಮಾಡುವ ನಿರ್ಧಾರವನ್ನು ತೆಲಂಗಾಣ ಐಟಿ ಮತ್ತು ಕೈಗಾರಿಕೆಗಳ ಸಚಿವ ಕೆಟಿ ರಾಮರಾವ್ ಸ್ವಾಗತಿಸಿದ್ದಾರೆ. ಇದು ಭಾರತೀಯ ಮತ್ತು ವಿದೇಶಿ ವಾಣಿಜ್ಯ ವಿಮಾನಯಾನ ಸಂಸ್ಥೆಗಳು ಬಳಸುವ ತನ್ನ ಮಾರುಕಟ್ಟೆ-ಪ್ರಮುಖ ಲೀಪ್ 1A ಮತ್ತು ಲೀಪ್ 1B ಏರೋ-ಎಂಜಿನ್‌ಗಳನ್ನು ಕೂಲಂಕಷವಾಗಿ ಪರಿಶೀಲಿಸುತ್ತದೆ ಎಂದರು.
ಓದಿ: ಸಫ್ರಾನ್ ಗ್ರೂಪ್ ಕಂಪನಿಗೆ ರಾಜನಾಥ್ ಸಿಂಗ್ ಭೇಟಿ: ರಫೇಲ್ ಬಗ್ಗೆ ಮಾಹಿತಿ ಪಡೆದ ರಕ್ಷಣಾ ಸಚಿವ
ಇತ್ತೀಚೆಗೆ, ಸಫ್ರಾನ್ ಇಲ್ಲಿ ಎರಡು ಮೆಗಾ ಏರೋಸ್ಪೇಸ್ ಪ್ರಾಜೆಕ್ಟ್‌ಗಳನ್ನು ಅನುಕ್ರಮವಾಗಿ ಸ್ಥಾಪಿಸಿದೆ. ಸಫ್ರಾನ್ ಎಲೆಕ್ಟ್ರಿಕಲ್ ಮತ್ತು ಪವರ್ ಫ್ಯಾಕ್ಟರಿ ಉತ್ಪಾದಿಸುವ ಎಂಜಿನ್ ವೈರ್ ಹಾರ್ನೆಸ್ ಮತ್ತು ಸಫ್ರಾನ್ ಏರ್‌ಕ್ರಾಫ್ಟ್ ಎಂಜಿನ್ ಫ್ಯಾಕ್ಟರಿ ಲೀಪ್ ಎಂಜಿನ್‌ಗಳಿಗೆ ನಿರ್ಣಾಯಕ ಏರೋ-ಎಂಜಿನ್ ಭಾಗಗಳನ್ನು ತಯಾರಿಸುತ್ತಿದೆ.
ಹೈದರಾಬಾದ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಹೊಂದಿಕೊಂಡಿರುವ ಈ ಎರಡೂ ಕಾರ್ಖಾನೆಗಳನ್ನು ಸಚಿವ ಕೆ ಟಿ ರಾಮರಾವ್ ಇಂದು ಉದ್ಘಾಟಿಸಿದ್ದಾರೆ. ಈ ಸಂದರ್ಭದಲ್ಲಿ ಸಫ್ರಾನ್ ಗ್ರೂಪ್ ಸಿಇಒ ಒಲಿವಿಯರ್ ಆಂಡ್ರೀಸ್ ಮತ್ತು ಸಫ್ರಾನ್ ಏರ್‌ಕ್ರಾಫ್ಟ್ ಇಂಜಿನ್ ಸಿಇಒ ಜೀನ್ ಪಾಲ್ ಅಲರಿ ಉಪಸ್ಥಿತರಿದ್ದರು.
