ಕೇವಲ 10 ದಿನಗಳ ಅಂತರದಲ್ಲಿ ಗಂಡ-ಹೆಂಡ್ತಿ, ಇಬ್ಬರು ಮಕ್ಕಳು ಕೊರೊನಾಗೆ ಬಲಿ!

ಕೊರೊನಾದಿಂದಾಗಿ ಗಂಡ, ಹೆಂಡ್ತಿ ಮತ್ತು ಇಬ್ಬರು ಮಕ್ಕಳು ಸೇರಿದಂತೆ ನಾಲ್ವರು ಸಾವನ್ನಪ್ಪಿರುವ ಘಟನೆ ಹರಿಯಾಣದ ಫರೀದಾಬಾದ್​ನಲ್ಲಿ ನಡೆದಿದೆ.

ಫರೀದಾಬಾದ್​: ಒಂದೇ ಕುಟುಂಬದ ನಾಲ್ವರು ಕೋವಿಡ್​ ಸೋಂಕಿಗೆ ಬಲಿಯಾಗಿರುವ ಘಟನೆ ಫ್ರಾಂಟಿಯರ್​ ಕಾಲೋನಿಯಲ್ಲಿ ನಡೆದಿದೆ.

ಮಹಿಪಾಲ್​ ಕುಟುಂಬ ಕಾಲೋನಿಯಲ್ಲಿ ವಾಸಿಸುತ್ತಿತ್ತು. ಇವರ ಕುಟುಂಬ ಸೋಂಕಿನಿಂದ ಬಳಲುತ್ತಿತ್ತು. ಏಪ್ರಿಲ್​ 23ರಂದು ಕೊರೊನಾದಿಂದಾಗಿ ಮಹಿಪಾಲ್​ ಸಾವನ್ನಪ್ಪಿದ್ದಾರೆ. ಮೂರು ದಿನಗಳ ನಂತರ ಆಕೆಯ ಪತ್ನಿ ಭಾರತಿಯೂ ಸಹ ಕೋವಿಡ್​ ಸೋಂಕಿಗೆ ಬಲಿಯಾಗಿದ್ದಾರೆ ಎಂದು ಸ್ಥಳೀಯರು ತಿಳಿಸಿದ್ದಾರೆ.

ಇದಾದ ಬಳಿಕ ಅವರಿಬ್ಬರ ಮಕ್ಕಳಾದ ವಿಪುಲ್​ ಮತ್ತು ರೋಹಿತ್​ಗೆ ಕೊರೊನಾ ಸೋಂಕು ದೃಢಪಟ್ಟಿತ್ತು. ಇಬ್ಬರನ್ನೂ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ವಿಪುಲ್​ ನಾಲ್ಕೈದು ದಿನಗಳ ಹಿಂದೆ ಮೃತಪಟ್ಟಿದ್ದ. ಆದ್ರೆ ಕಿರಿಯ ಮಗ ರೋಹಿತ್ ಸಹ​ ಶುಕ್ರವಾರ ಮೃತ ಪಟ್ಟಿದ್ದಾನೆ ಎಂದು ಸ್ಥಳೀಯರು ಹೇಳಿದ್ದಾರೆ.

ಆಸ್ಪತ್ರೆಯವರು ಐದು ಲಕ್ಷ ಬಿಲ್​ ಮಾಡಿದ್ದಾರೆ. ಆದ್ರೆ ಕಾಲೋನಿ ಜನ ಸೇರಿ ಎರಡೂವರೆ ಲಕ್ಷ ಹೊಂದಿಸಿದ್ದರು. ಆದ್ರೂ ಸಹ ಆಸ್ಪತ್ರೆಯವರು ರೋಹಿತ್​ ಶವ ನೀಡಲು ನಿರಾಕರಿಸಿದ್ದಾರೆ ಎಂದು ಕಾಲೋನಿಯ ಅಜಯ್​ ರಾಥೋಡ್​ ಆರೋಪಿಸಿದ್ದಾರೆ.