ನವದೆಹಲಿ: ಭಾರತ-ಚೀನಾ ಗಡಿಯಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಇಂಡೋ-ಟಿಬೇಟಿಯನ್ ಬಾರ್ಡರ್ ಪೊಲೀಸ್ (ಐಟಿಬಿಪಿ) ಪಡೆಗಳ ಸಿಬ್ಬಂದಿ ಹಾಗೂ ನಿವೃತ್ತ ಅಧಿಕಾರಿಗಳಿಗೆ ಮೊದಲ ಬಾರಿಗೆ ಇಂಟರ್ನೆಟ್ ಆಧಾರಿತ ಆನ್ಲೈನ್ ಮದ್ಯ ವಿತರಣಾ ಸೇವೆಯನ್ನು ಪ್ರಾರಂಭಿಸಲಾಗಿದೆ.
ಕೇಂದ್ರೀಕೃತ ಮದ್ಯ ನಿರ್ವಹಣಾ ವ್ಯವಸ್ಥೆ (ಸಿಎಲ್ಎಂಎಸ್) ಅನ್ನು ಆರಂಭ ಮಾಡಲಾಗಿದ್ದು, ಸಿಬ್ಬಂದಿಯು ಆನ್ಲೈನ್ ಮೂಲಕ ಈ ಸೇವೆಯನ್ನು ಪಡೆಯಬಹುದಾಗಿದೆ. ಸಿಬ್ಬಂದಿಗೆ ಬೇಕಾದ ಬ್ರಾಂಡ್ಗಳು ತಾವಿರುವ ಸ್ಥಳದಲ್ಲಿ ದೊರೆಯದ ಕಾರಣದಿಂದ ಈ ಸೇವೆಯನ್ನು ಪ್ರಾರಂಭ ಮಾಡಲಾಗಿದೆ. ಇದಕ್ಕೂ ಮೊದಲು ಬೇರೆ ಪಡೆಗಳಿಗೆ ಅವಕಾಶ ನೀಡಲಾಗಿತ್ತು.
ಈ ಮೊದಲು ಸೇನಾ ಸಿಬ್ಬಂದಿ ಮತ್ತು ಅಧಿಕಾರಿಗಳು ನಿಗದಿಪಡಿಸಿದ ಸೇನಾ ಘಟಕಗಳಿಂದ ಮಾತ್ರವೇ ಮದ್ಯ ಖರೀದಿಸಲು ಅವಕಾಶವಿತ್ತು. ಈಗ ಮದ್ಯದ ಮಾರಾಟ ಘಟಕಗಳಿಂದ ದೂರ ಇರುವವರಿಗೂ ಕೂಡಾ ಮದ್ಯವನ್ನು ನೀಡುವ ಸಲುವಾಗಿ ಆನ್ಲೈನ್ ವ್ಯವಸ್ಥೆಯನ್ನು ಜಾರಿಗೆ ತರಲಾಗಿದೆ.
ಇದನ್ನೂ ಓದಿ: ನವದೆಹಲಿಯಲ್ಲಿ ಭಾರಿ ಮಂಜು: ತಾಪಮಾನ 6 ಡಿಗ್ರಿ ಸೆಲ್ಸಿಯಸ್ಗೆ ಕುಸಿತ
ಇಂಡೋ-ಟಿಬೇಟಿಯನ್ ಬಾರ್ಡರ್ ಪೊಲೀಸ್ನ ಮುಖ್ಯಸ್ಥ ಎಸ್.ಎಸ್. ಜೈಸ್ವಾಲ್ ಕೇಂದ್ರೀಕೃತ ಮದ್ಯ ನಿರ್ವಹಣಾ ವ್ಯವಸ್ಥೆಯನ್ನು ಅನಾವರಣಗೊಳಿಸಿದ್ದು, ತಮ್ಮ ಅಧಿಕೃತ ವೆಬ್ಸೈಟ್ನಲ್ಲಿ ಆನ್ಲೈನ್ ಮೂಲಕ ಮದ್ಯ ಖರೀದಿಗೆ ಅವಕಾಶ ಮಾಡಿಕೊಡಲಾಗಿದೆ.
ಮದ್ಯ ಖರೀದಿ ಮಾಡುವವರು ಮೊದಲಿಗೆ ಖಾತೆಯೊಂದನ್ನು ಸೃಷ್ಟಿಸಿ, ತಮಗೆ ಹತ್ತಿರವಿರುವ ಘಟಕವನ್ನು ಆಯ್ಕೆ ಮಾಡಿಕೊಂಡು, ಹಣ ಪಾವತಿಸಿ, ತಮಗೆ ಬೇಕಾದ ಮದ್ಯವನ್ನು ಖರೀದಿ ಮಾಡಬಹುದಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
