ಸುಲ್ತಾನ್‌ಪುರ(ಉತ್ತರ ಪ್ರದೇಶ): ನಿಷ್ಠಾವಂತ ಶ್ವಾನವೊಂದು ತನ್ನ ಮಾಲೀಕನ ಜೀವ ಉಳಿಸಿದೆ. ಗಲಾಟೆವೊಂದರಲ್ಲಿ ವ್ಯಕ್ತಿಯೋರ್ವ ಗುಂಡಿನ ದಾಳಿ ನಡೆಸಿದಾಗ ಶ್ವಾನ ಅಡ್ಡ ಬಂದು ತನ್ನ ಮಾಲೀಕನ ಜೀವ ಉಳಿಸಿ ಪ್ರಾಣಬಿಟ್ಟಿರುವ ಮನಕಲಕುವ ಘಟನೆ ಸುಲ್ತಾನ್ಪುರ್ ಜಿಲ್ಲೆಯ ವಿಕ್ವಜಿತ್‌ಪುರ ಗ್ರಾಮದಲ್ಲಿ ನಡೆದಿದೆ.
ಗ್ರಾಮದ ನಿವಾಸಿ ವಿಶಾಲ್ ಶ್ರೀವಾಸ್ತವ್ ಅಲಿಯಾಸ್ ಶನಿ ಕಳೆದ ಹಲವು ವರ್ಷಗಳಿಂದ ಗ್ರಾಮದಲ್ಲಿ ಗೋಶಾಲೆ ನಡೆಸುತ್ತಿದ್ದಾರೆ. ಭಾನುವಾರ ಗೋಶಾಲೆಯ ಆವರಣದಲ್ಲಿಯೇ ಹುಲ್ಲು ಇಡಲು ಕೊಟ್ಟಿಗೆ ನಿರ್ಮಿಸುತ್ತಿದ್ದರು. ಈ ವೇಳೆ ಪಕ್ಕದ ರಾಂಬರಣ್ ವರ್ಮಾ ಪಿಜಿ ಕಾಲೇಜಿನ ಮ್ಯಾನೇಜರ್ ಅನಿಲ್ ವರ್ಮಾ ತನ್ನ ಚಾಲಕನೊಂದಿಗೆ ಕೊಟ್ಟಿಗೆಯೊಳಗೆ ನುಗ್ಗಿದ್ದಾರೆ. ಬಳಿಕ ಕೊಟ್ಟಿಗೆ ನಿರ್ಮಾಣ ಮಾಡದಂತೆ ವಿಶಾಲ್ಗೆ ಅನಿಲ್ ಧಮ್ಕಿ ಹಾಕಿದ್ದಾರೆ. ಈ ವೇಳೆ ಇಬ್ಬರ ಮಧ್ಯೆ ಕಲಹ ಉಂಟಾಗಿದೆ. ಇವರ ಜಗಳ ನೋಡು-ನೋಡುತ್ತಿದ್ದಂತೆ ವಿಕೋಪಕ್ಕೆ ತಿರುಗಿದೆ. ಕೋಪಗೊಂಡ ಅನಿಲ್ ವರ್ಮಾ ತನ್ನ ಬಳಿ ಇರುವ ಪರವಾನಿಗೆ ಪಡೆದ ಗನ್ನಿಂದ ವಿಶಾಲ್ ಮೇಲೆ ಗುಂಡು ಹಾರಿಸಿದ್ದಾರೆ ಎಂದು ಹೇಳಲಾಗುತ್ತಿದೆ.
ಓದಿ: ಪಕ್ಕದ ಮನೆ ಮುಂದೆ ಶೌಚ.. ಶ್ವಾನ ಹೊಡೆದು ಕೊಂದ ಶಿಕ್ಷಕ, ತಡೆಯಲು ಬಂದವರಿಗೆ ಗನ್ನಿಂದ ಬೆದರಿಕೆ!
ವಿಶಾಲ್ನ ಸಾಕು ನಾಯಿ ಮ್ಯಾಕ್ಸ್ ಕೂಡ ಅಲ್ಲಿತ್ತು. ಮಾಲೀಕನ ಮೇಲೆ ಗುಂಡಿನ ದಾಳಿ ನಡೆಯುತ್ತಿರುವುದನ್ನು ಕಂಡ ಮ್ಯಾಕ್ಸ್ ಅಡ್ಡ ಬಂದಿದೆ. ಈ ವೇಳೆ ಮ್ಯಾಕ್ಸ್ಗೆ ಗುಂಡು ತಗುಲಿದೆ. ಘಟನೆ ಬಳಿಕ ಅನಿಲ್ ವರ್ಮಾ ಸ್ಥಳದಿಂದ ಪರಾರಿಯಾಗಿದ್ದಾನೆ. ಇದಾದ ನಂತರ ವಿಶಾಲ್ ತನ್ನ ಸಹಚರರೊಂದಿಗೆ ಸಾಕು ನಾಯಿ ಮ್ಯಾಕ್ಸ್ ಅನ್ನು ಜಿಲ್ಲಾ ಪಶು ಆಸ್ಪತ್ರೆಗೆ ಕರೆದೊಯ್ದರು. ಅಲ್ಲಿ ಮ್ಯಾಕ್ಸ್ನ ಸ್ಥಿತಿ ಗಂಭೀರವಾಗಿದೆ ಎಂದು ವೈದ್ಯರು ಹೇಳಿದರು. ಬಳಿಕ ಕೆಲವು ಗಂಟೆಗಳ ನಂತರ ಶ್ವಾನ ಮ್ಯಾಕ್ಸ್ ಚಿಕಿತ್ಸೆ ಫಲಿಸದೇ ಸಾವನ್ನಪ್ಪಿದೆ. ವೈದ್ಯರ ನಿರ್ಲಕ್ಷ್ಯದಿಂದ ಶ್ವಾನ ಸಾವನ್ನಪ್ಪಿದೆ ಎಂಬ ಆರೋಪ ಕೇಳಿ ಬಂದಿದೆ.
ವಿಶಾಲ್ ಶ್ರೀವಾಸ್ತವ್ ನೀಡಿದ ದೂರಿನ ಮೇರೆಗೆ ಪಿ ಜಿ ಕಾಲೇಜಿನ ಮ್ಯಾನೇಜರ್ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ. ಮರಣೋತ್ತರ ಪರೀಕ್ಷೆ ವರದಿ ಬಂದ ನಂತರ ಆರೋಪಿಯನ್ನು ತನಿಖೆಗೆ ಒಳಪಡಿಸುವುದಾಗಿ ಪೊಲೀಸರು ಹೇಳಿದ್ದಾರೆ.
