ಪುಣೆ (ಮಹಾರಾಷ್ಟ್ರ): ವಿಚಾರವಾದಿ, ಮೌಢ್ಯವಿರೋಧಿ ಹೋರಾಟಗಾರ ಡಾ.ನರೇಂದ್ರ ದಾಭೋಲ್ಕರ್‌ ಹತ್ಯೆ ಪ್ರಕರಣದ ಆರೋಪಿಗಳಾದ ಸಚಿನ್‌ ಅಂದೂರೆ ಮತ್ತು ಶರದ್‌ ಕಳಸ್ಕರ್ನನ್ನು ಪ್ರತ್ಯಕ್ಷದರ್ಶಿಯಾದ ಪೌರ ಕಾರ್ಮಿಕರೊಬ್ಬರು ಗುರುತಿಸಿದ್ದು, ನ್ಯಾಯಾಲಯದಲ್ಲಿ ಸಾಕ್ಷ್ಯ ನುಡಿದಿದ್ದಾರೆ ಎಂದು ವಿಶೇಷ ಸರ್ಕಾರಿ ಅಭಿಯೋಜಕರು ತಿಳಿಸಿದ್ದಾರೆ.
ಮಹಾರಾಷ್ಟ್ರ ಅಂಧಶ್ರದ್ಧಾ ನಿರ್ಮೂಲನಾ ಸಮಿತಿ ಸ್ಥಾಪಿಸಿದ್ದ ಡಾ. ನರೇಂದ್ರ ದಾಭೋಲ್ಕರ್‌ ಅವರನ್ನು 2013ರ ಆ.20ರಂದು ಗುಂಡಿಟ್ಟು ಕೊಲೆ ಮಾಡಲಾಗಿತ್ತು. ಮನೆಯಿಂದ ವಾಕಿಂಗ್ಗೆಂದು ಬಂದಿದ್ದಾಗ ದಾಭೋಲ್ಕರ್‌ ಅವರ ಮೇಲೆ ಗುಂಡು ಹಾರಿಸಲಾಗಿತ್ತು. ಈ ಪ್ರಕರಣದಲ್ಲಿ ಸಚಿನ್‌ ಅಂದೂರೆ, ಶರದ್‌ ಕಳಸ್ಕರ್ ಸೇರಿ ಇತರ ಆರೋಪಿಗಳನ್ನು ಬಂಧಿಸಲಾಗಿದೆ. ಇದೀಗ ಇಲ್ಲಿನ ಪಾಲಿಕೆಯ ಪೌರ ಕಾರ್ಮಿಕ ಕಿರಣ್ ಕಾಂಬ್ಳೆ ಎಂಬುವವರು ಪುಣೆ ನ್ಯಾಯಾಲಯದಲ್ಲಿ ಸಾಕ್ಷ್ಯ ಹೇಳಿದ್ದಾರೆ.
'ನಾನು ನನ್ನ ಕೆಲಸ ಮುಗಿದ ಬಳಿಕ ಡಿವೈಡರ್ ಮೇಲೆ ಕುಳಿತಿದ್ದೆ. ಆಗ ಪಟಾಕಿ ಶಬ್ದದಂತೆ ಕೇಳಿ ಆ ಕಡೆ ತಿರುಗಿ ನೋಡಿದೆ. ಆಗ ಇಬ್ಬರು ವ್ಯಕ್ತಿಗಳು ಸೇರಿ ಒಬ್ಬ ವ್ಯಕ್ತಿಯ ಮೇಲೆ ಗುಂಡು ಹಾರಿಸುತ್ತಿದ್ದರು. ನಂತರ ಆ ಒಬ್ಬರೂ ವ್ಯಕ್ತಿಗಳು ನಾನು ಕುಳಿತಿದ್ದ ಕಡೆಯೇ ಓಡಿ ಬಂದರು. ನಂತರ ಪೊಲೀಸ್ ಚೌಕ್ ಸಮೀಪ ಬಂದು ಅಲ್ಲಿ ನಿಲ್ಲಿಸಿದ್ದ ಬೈಕ್ ತೆಗೆದುಕೊಂಡು ಪರಾರಿಯಾದರು. ನಾನು ಘಟನೆ ನಡೆದ ಸ್ಥಳಕ್ಕೆ ಹೋಗಿ ನೋಡಿದಾಗ ರಕ್ತದ ಮಡುವಿನಲ್ಲಿ ಒಬ್ಬ ವ್ಯಕ್ತಿ ಬಿದ್ದಿದ್ದರು' ಎಂದು ಪ್ರತ್ಯಕ್ಷದರ್ಶಿ ಕಿರಣ್ ಕಾಂಬ್ಳೆ ಸಾಕ್ಷ್ಯ ನುಡಿದ್ದಾರೆ ಎಂದು ವಿಶೇಷ ಸರ್ಕಾರಿ ಅಭಿಯೋಜಕ ಸೂರ್ಯವಂಶಿ ಹೇಳಿದ್ದಾರೆ.
ಅಲ್ಲದೇ, ಈ ಬಗ್ಗೆ ಪೊಲೀಸ್ ಹೇಳಿಕೆ ನೀಡಲು ಯಾಕೆ ತಡ ಮಾಡಲಾಗಿದೆ ಎಂದು ಪ್ರತ್ಯಕ್ಷದರ್ಶಿಗೆ ನ್ಯಾಯಾಲಯ ಪ್ರಶ್ನೆಯೂ ಮಾಡಿದೆ. ಈ ಸಂಬಂಧ ಮಾ.23ರಂದು ಮರು ವಿಚಾರಣೆ ನಡೆಯಲಿದೆ ಎಂದೂ ಸೂರ್ಯವಂಶಿ ತಿಳಿಸಿದ್ದಾರೆ.
ಇದನ್ನೂ ಓದಿ: ಭೀಕರ ರಸ್ತೆ ಅಪಘಾತ: ಸೋಶಿಯಲ್ ಮೀಡಿಯಾ ಸ್ಟಾರ್ ಗಾಯತ್ರಿ ದುರ್ಮರಣ
