ಕಿಡ್ನಾಪರ್ಸ್​​ ಕಾರಿನ​ ಮೇಲೆ ಜಿಗಿದ ಪೊಲೀಸ್​ ಪೇದೆ.. ಸಿನಿಮೀಯ ಸ್ಟೈಲ್​​ನಲ್ಲಿ ಅಪರಾಧಿಗಳ ಬಂಧನ

ಅಪಹರಣಕಾರರನ್ನ ಸಿನಿಮೀಯ ರೀತಿಯಲ್ಲಿ ಬೆನ್ನಟ್ಟಿ ಬಂಧನ ಮಾಡುವಲ್ಲಿ ತಮಿಳುನಾಡು ಪೊಲೀಸರು ಯಶಸ್ವಿಯಾಗಿದ್ದು, ಘಟನೆಯ ದೃಶ್ಯಾವಳಿ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

ಚೆನ್ನೈ(ತಮಿಳುನಾಡು): ಸಿನಿಮಾಗಳಲ್ಲಿ ನಡೆಯುವ ಕೆಲವೊಂದು ರೀಲ್​​ ಘಟನೆಗಳು ನಿಜ ಜೀವನದಲ್ಲೂ ಸಂಭವಿಸಿ ಬಿಡುತ್ತವೆ. ಸದ್ಯ ಅಂತಹದೊಂದು ಘಟನೆ ತಮಿಳುನಾಡಿನಲ್ಲಿ ನಡೆದಿದ್ದು, ಇದರ ದೃಶ್ಯಾವಳಿ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

ಚೆನ್ನೈನ ಹ್ಯಾರಿಂಗ್ಟನ್​​ ರಸ್ತೆಯ ಚೆಟ್ಟತ್​​ನಲ್ಲಿ ವಾಸವಾಗಿದ್ದ 80 ವರ್ಷದ ನಿವೃತ್ತ ಸಬ್ ​ಇನ್ಸ್​​ಪೆಕ್ಟರ್​​ನನ್ನ ದುಷ್ಕರ್ಮಿಗಳ ಗುಂಪು ಅಪರಹಣ ಮಾಡಿದ್ದು, ಪೊರೂರು ಪ್ರದೇಶಕ್ಕೆ ಕರೆದೊಯ್ದಿದ್ದಾರೆ. ತದನಂತರ ಅವರ ಮಗ ಬಶೀರ್​ಗೆ ಕರೆ ಮಾಡಿ 5 ಕೋಟಿ ರೂಪಾಯಿಗೆ ಬೇಡಿಕೆ ಇಟ್ಟಿದ್ದಾರೆ. ಆದರೆ, ಕೊನೆಯದಾಗಿ 25 ಲಕ್ಷ ರೂಪಾಯಿಗೆ ಅಪಹರಣಗೊಂಡಿರುವ ವ್ಯಕ್ತಿಯನ್ನ ರಿಲೀಸ್ ಮಾಡಲು ಒಪ್ಪಿಕೊಂಡಿದ್ದಾರೆ. ಮಂಗಳವಾರ ರಾತ್ರಿ ನಗದಿನೊಂದಿಗೆ ಎಮಗೂರಿಗೆ ಬರುವಂತೆ ಬಶೀರ್​​ಗೆ ಸೂಚನೆ ನೀಡಿದ್ದಾರೆ. ಇದಕ್ಕೆ ಸಂಬಂಧಿಸಿದಂತೆ ಬಶೀರ್​​​ ಕಾನತ್ತೂರು ಪೊಲೀಸ್ ಠಾಣೆಯಲ್ಲಿ ಮಾಹಿತಿ ನೀಡಿದ್ದಾನೆ.

ಅಪಹರಣಕಾರರ ಬಂಧಿಸಲು ವಿಶೇಷ ತಂಡ ರಚನೆ ಮಾಡಿರುವ ಪೊಲೀಸರು, ಎಮಗೂರಿನ ವಿವಿಧ ಸ್ಥಳಗಳಲ್ಲಿ ಅಡಗಿಕೊಂಡಿದ್ದಾರೆ. ಅಪಹರಣಕಾರರು ಸ್ಥಳಕ್ಕೆ ಬರುತ್ತಿದ್ದಂತೆ ಬಶೀರ್​​ ಅವರಿಗೆ ನಗದು ನೀಡಿದ್ದಾರೆ. ಈ ವೇಳೆ, ಅಪಹರಣಕಾರನನ್ನ ರಿಲೀಸ್​ ಮಾಡಿದ್ದಾರೆ. ತಕ್ಷಣವೇ ಕಾರ್ಯ ಪ್ರವೃತ್ತರಾಗಿರುವ ಪೊಲೀಸರು ಕಿಡ್ನಾಪರ್ಸ್ ಕಾರು ಸುತ್ತುವರೆದಿದ್ದಾರೆ. ಈ ವೇಳೆ ಸ್ಥಳದಿಂದ ಪರಾರಿಯಾಗಲು ಯತ್ನಿಸಿದ್ದು, ವೇಗವಾಗಿ ಕಾರು ಚಲಾವಣೆ ಮಾಡಿಕೊಂಡು ಹೋಗಲು ಮುಂದಾಗಿದ್ದಾರೆ. ತಕ್ಷಣವೇ ಹೆಡ್​​ಕಾನ್ಸ್​​ಟೇಬಲ್​ ಶರವಣ ಕುಮಾರ್​ ಕಾರಿನ ಮೇಲೆ ಜಿಗಿದಿದ್ದಾರೆ. ಆತನನ್ನ ಕಾರಿನ ಮುಂಭಾಗದಲ್ಲಿಟ್ಟುಕೊಂಡು ಅಪಹರಣಕಾರರು ಸುಮಾರು ಮೂರು ಕಿಲೋ ಮೀಟರ್​ ದೂರ ಚಲಿಸಿದ್ದಾರೆ. ಈ ವೇಳೆ ಪೊಲೀಸರು ಅವರನ್ನ ಬೆನ್ನಟ್ಟಿ ಅರೆಸ್ಟ್​ ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ.

ಸಿನಿಮೀಯ ಸ್ಟೈಲ್​​ನಲ್ಲಿ ಕಾರಿನ ಮೇಲೆ ಜಿಗಿದಿರುವ ಶರವಣ ಕುಮಾರ್​ಗೆ ಸಣ್ಣಪುಟ್ಟ ಗಾಯಗಳಾಗಿವೆ. ಆದರೆ, ಅವರ ಧೈರ್ಯಕ್ಕೆ ಇನ್ನಿಲ್ಲದ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಘಟನೆಯ ದೃಶ್ಯಾವಳಿ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ಸಾಮಾಜಿಕ ಜಾಲತಾಣದಲ್ಲಿ ವೈರಲ್​​ ಆಗಿದೆ. ಅಪಹರಣಕಾರರಿಂದ ಇದೀಗ 25 ಲಕ್ಷ ರೂ. ನಗದು, ಕಾರು, ಪಿಸ್ತೂಲ್​ ಹಾಗೂ ಚಾಕು ವಶಕ್ಕೆ ಪಡೆದುಕೊಂಡಿದ್ದಾರೆ.