ಕೊರ್ಬಾ(ಛತ್ತೀಸಗಢ): ಭಾರತೀಯ ಚಿತ್ರರಂಗದಲ್ಲಿ ಹೊಸ ಸಂಚಲನ ಸೃಷ್ಟಿ ಮಾಡಿರುವ ಕೆಜಿಎಫ್ ಚಾಪ್ಟರ್ 2 ಸಿನಿಮಾದಲ್ಲಿ ಅಕ್ರಮವಾಗಿ ಮೈನಿಂಗ್ ಮಾಡುವ ಮೂಲಕ ಚಿನ್ನ ಹೊರತೆಗೆಯುವ ಕಥೆ ಹೊಂದಿದೆ. ಇದೊಂದು ಕಾಲ್ಪನಿಕ ಸ್ಟೋರಿ. ಆದರೆ, ಛತ್ತೀಸಗಢದ ಕೊರ್ಬಾದಲ್ಲಿರುವ ಬೃಹತ್ ಕಲ್ಲಿದ್ದಲು ಗಣಿಯಲ್ಲಿ ಸಂಚಲನ ಮೂಡಿಸುವ ವಿಡಿಯೋ ತುಣುಕವೊಂದು ಹೊರಬಿದ್ದಿದೆ. ಇದನ್ನ ಕೆಜಿಎಫ್ ಭಾಗ 3 ಹಗರಣ ಎಂದು ಕರೆಯಲಾಗ್ತಿದೆ.
ಏಷ್ಯಾದ ಅತಿದೊಡ್ಡ ಕಲ್ಲಿದ್ದಲು ಗಣಿಯಾಗಿರುವ ಛತ್ತೀಸಗಢದ ಕೊರ್ಬಾದಲ್ಲಿರುವ ಗೆವ್ರಾ ಮೈನ್ಸ್‌ನ ದೃಶ್ಯ ಇದಾಗಿದೆ ಎಂದು ಹೇಳಲಾಗ್ತಿದೆ. ಸಾವಿರಾರು ಕಾರ್ಮಿಕರು, ನೂರಾರು ವಾಹನಗಳಲ್ಲಿ ಅಕ್ರಮವಾಗಿ ಕಲ್ಲಿದ್ದಲು ಕದಿಯುವ ಕೆಲಸ ಮಾಡ್ತಿದ್ದಾರೆ. ಈ ಕಳ್ಳತನದ ವಿಡಿಯೋ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದ್ದು, ಇದನ್ನ ಕೆಜಿಎಫ್ ಭಾಗ 3 ಹಗರಣ ಎಂದು ಕರೆಯಲಾಗ್ತಿದೆ. ಆದರೆ, ವಿಡಿಯೋ ಎಲ್ಲಿಂದ ವೈರಲ್ ಆಗಿದೆ ಎಂಬುದರ ಬಗ್ಗೆ ಸ್ಪಷ್ಟವಾದ ಯಾವುದೇ ರೀತಿಯ ಮಾಹಿತಿ ಲಭ್ಯವಾಗಿಲ್ಲ. ಇದಕ್ಕೆ ಸಂಬಂಧಿಸಿದಂತೆ ಬಿಜೆಪಿಯ ಒಪಿ ಚೌಧರಿ ಟ್ವೀಟ್ ಮಾಡಿದ್ದು, ಈ ವಿಡಿಯೋ ಕೊರ್ಬಾದು ಎಂದು ತಿಳಿಸಿದ್ದಾರೆ.
ತನಿಖೆಗೆ ಆದೇಶ: ವಿಡಿಯೋ ವೈರಲ್ ಆಗುತ್ತಿದ್ದಂತೆ ಬಿಲಾಸ್ಪುರ ಐಜಿ ತನಿಖೆಗೆ ಆದೇಶ ಹೊರಡಿಸಿದ್ದಾರೆ. ವೈರಲ್ ಆಗಿರುವ ವಿಡಿಯೋ ಯಾವ ಗಣಿಗೆ ಸಂಬಂಧಿಸಿದ್ದು, ಇಲ್ಲಿ ಭದ್ರತೆ ನಿಯೋಜನೆ ಮಾಡಲಾಗಿದ್ರೂ, ಇಷ್ಟೊಂದು ಸಂಖ್ಯೆಯಲ್ಲಿ ಜನರು ಗಣಿಯೊಳಗೆ ನುಗ್ಗಿರುವುದು ಹೇಗೆ? ಎಂಬೆಲ್ಲ ಪ್ರಶ್ನೆ ಮುಂದಿಟ್ಟುಕೊಂಡು ತನಿಖೆ ನಡೆಸಲು ಸೂಚನೆ ನೀಡಲಾಗಿದೆ.
ವೈರಲ್ ಆಗಿರುವ ವಿಡಿಯೋ ನೋಡಿ ಎಲ್ಲರೂ ಅಚ್ಚರಿ ವ್ಯಕ್ತಪಡಿಸಿದ್ದು, ವಿಡಿಯೋ ತುಣುಕಿಗೆ ಕೆಜಿಎಫ್ ಚಿತ್ರದ ಹಿನ್ನೆಲೆ ಸಂಗೀತ ಅಳವಡಿಕೆ ಮಾಡಲಾಗಿದೆ. ವಿಡಿಯೋದಲ್ಲಿ ಲಕ್ಷಾಂತರ ಜನರು ಕಲ್ಲಿದ್ದಲು ಸಾಗಣೆ ಮಾಡ್ತಿದ್ದಾರೆ. ಕೊರ್ಬಾದಲ್ಲಿರುವ ಕಲ್ಲಿದ್ದಲು ಗಣಿ ಕೋಲ್ ಇಂಡಿಯಾ ಲಿಮಿಟೆಡ್ನ ಅತಿದೊಡ್ಡ ಕಂಪನಿಯಾಗಿದ್ದು, ದೇಶಕ್ಕೆ ಶೇ. 20ರಷ್ಟು ಕಲ್ಲಿದ್ದಲು ಇಲ್ಲಿಂದ ರವಾನೆಯಾಗುತ್ತದೆ.
