ನವದೆಹಲಿ: ವಿದೇಶಗಳಲ್ಲಿ ಮಾತ್ರವಲ್ಲ, ಇದೀಗ ಭಾರತದಲ್ಲೂ ದಿನೇ ದಿನೇ ಮಂಕಿಪಾಕ್ಸ್ ಪ್ರಕರಣಗಳು ಹೆಚ್ಚು ವರದಿಯಾಗುತ್ತಿವೆ. ಹೀಗಾಗಿ, ಎಚ್ಚೆತ್ತಿರುವ ಕೇಂದ್ರ ಸರ್ಕಾರ ಪರಿಸ್ಥಿತಿ ಇನ್ನಷ್ಟು ಬಿಗಡಾಯಿಸುವ ಮುನ್ನವೇ ಮಂಕಿಪಾಕ್ಸ್ ವೈರಸ್ ವಿರುದ್ಧ ಲಸಿಕೆ ಅಭಿವೃದ್ಧಿಪಡಿಸಲು ಆಸಕ್ತಿ ಇರುವ ಲಸಿಕೆ ತಯಾರಕರಿಂದ ಟೆಂಡರ್ಗೆ ಆಹ್ವಾನ ನೀಡಿದೆ.
ಮಂಕಿಪಾಕ್ಸ್ ವಿರುದ್ಧ ಲಸಿಕೆ ಅಭಿವೃದ್ಧಿ ಮತ್ತು ರೋಗನಿರ್ಣಯ ಮಾಡಲು ಡಯಾಗ್ನೋಸ್ಟಿಕ್ ಕಿಟ್‌ಗಳ ಅಭಿವೃದ್ಧಿಗೆ ಜಂಟಿ ಸಹಯೋಗದಲ್ಲಿ ಕೆಲಸ ಮಾಡಲು ಅನುಭವಿ ಲಸಿಕೆ ತಯಾರಕರು, ಇನ್-ವಿಟ್ರೋ ಡಯಾಗ್ನೋಸ್ಟಿಕ್ (IVD) ಕಿಟ್ ತಯಾರಕರಿಂದ ಕೇಂದ್ರ ಸರ್ಕಾರವು ಆಸಕ್ತಿಯ ಅಭಿವ್ಯಕ್ತಿಯನ್ನು (EOI) ಆಹ್ವಾನಿಸಿದೆ. EOI ಸಲ್ಲಿಸಲು ಆಗಸ್ಟ್ 10 ಕೊನೆಯ ದಿನಾಂಕವಾಗಿದೆ.
ಮಂಕಿಪಾಕ್ಸ್ ರೋಗದ ವಿರುದ್ಧ ಲಸಿಕೆ ಅಭಿವೃದ್ಧಿಪಡಿಸಲು ಅಥವಾ ಮಂಕಿಪಾಕ್ಸ್ ವೈರಸ್ ರೋಗನಿರ್ಣಯಕ್ಕಾಗಿ ಡಯಾಗ್ನೋಸ್ಟಿಕ್ ಕಿಟ್ ತಯಾರಿಕೆಗೆ ಅನುಭವಿ ಔಷಧಿ, ಫಾರ್ಮಾ, ಲಸಿಕೆ, ಐವಿಡಿ ತಯಾರಕರೊಂದಿಗೆ ಆರ್ & ಡಿ ಕೈಗೊಳ್ಳಲು ವ್ಯಾಖ್ಯಾನಿಸಲಾದ ಒಪ್ಪಂದದಡಿಯಲ್ಲಿ ಕೈಜೋಡಿಸಲು ಸಂಸ್ಥೆ ತಯಾರಿದೆ ಎಂದು ಐಸಿಎಂಆರ್ ತಿಳಿಸಿದೆ.
2019 ಮತ್ತು 2022 ರಲ್ಲಿ ಕ್ರಮವಾಗಿ ಮಂಕಿಪಾಕ್ಸ್‌ಗೆ ಒಂದು ಲಸಿಕೆ (MVA-BN) ಮತ್ತು ಒಂದು ನಿರ್ದಿಷ್ಟ ಚಿಕಿತ್ಸೆಯನ್ನು (ಟೆಕೊವಿರಿಮ್ಯಾಟ್) ಅನುಮೋದಿಸಲಾಗಿತ್ತು. ಆದರೆ ಅದು ವ್ಯಾಪಕವಾಗಿ ಲಭ್ಯವಿಲ್ಲ. 2019 ರಲ್ಲಿ ಮಂಕಿಪಾಕ್ಸ್ ತಡೆಗಟ್ಟುವಿಕೆಗಾಗಿ ತಯಾರಿಸಿದ ಅಟೆನ್ಯೂಯೇಟೆಡ್ ವ್ಯಾಕ್ಸಿನಿಯಾ ವೈರಸ್ (ಅಂಕಾರಾ ಸ್ಟ್ರೈನ್) ಆಧಾರಿತ ಹೊಸ ಲಸಿಕೆಯನ್ನು ಅನುಮೋದಿಸಲಾಗಿದೆ. ಇದು ಎರಡು-ಡೋಸ್ ಲಸಿಕೆಯಾಗಿದ್ದು, ಹೆಚ್ಚು ಲಭ್ಯವಿಲ್ಲ. ಮಂಕಿಪಾಕ್ಸ್‌ನ ತಡೆಗಟ್ಟುವಿಕೆ ಮತ್ತು ನಿಯಂತ್ರಣಕ್ಕಾಗಿ ವ್ಯಾಕ್ಸಿನೇಷನ್‌ನ ಕಾರ್ಯಸಾಧ್ಯತೆ ಮತ್ತು ಸೂಕ್ತತೆಯನ್ನು ನಿರ್ಣಯಿಸಲು ವೈಜ್ಞಾನಿಕ ಅಧ್ಯಯನಗಳು ನಡೆಯುತ್ತಿವೆ ಎಂದು ಐಸಿಎಂಆರ್ ಹೇಳಿದೆ.
ವಿಶ್ವ ಆರೋಗ್ಯ ಸಂಸ್ಥೆ ಮಂಕಿಪಾಕ್ಸ್‌ನಿಂದ ಬಳಲುತ್ತಿರುವವರು, ಆರೋಗ್ಯ ಕಾರ್ಯಕರ್ತರು, ಕೆಲವು ಲ್ಯಾಬ್ ಕೆಲಸಗಾರರು ಮತ್ತು ಲೈಂಗಿಕ ಕಾರ್ಯಕರ್ತೆಯರೂ ಒಳಗೊಂಡಂತೆ ಹೆಚ್ಚಿನ ಅಪಾಯದಲ್ಲಿರುವವರಿಗೆ ಉದ್ದೇಶಿತ ವ್ಯಾಕ್ಸಿನ್ ನೀಡಲು ಶಿಫಾರಸು ಮಾಡಿದೆ. ಅದಲ್ಲದೆ ಸಂಸ್ಥೆಯ ಮುಖ್ಯಸ್ಥ ಟೆಡ್ರೊಸ್ ಅಧಾನೊಮ್ ಘೆಬ್ರೆಯೆಸಸ್, ಈ ಸಮಯದಲ್ಲಿ ನಾವು ಮಂಕಿಪಾಕ್ಸ್ ವಿರುದ್ಧ ಸಾಮೂಹಿಕ ಲಸಿಕೆಯನ್ನು ಶಿಫಾರಸು ಮಾಡುವುದಿಲ್ಲ ಎಂದು ಬುಧವಾರ ಹೇಳಿಕೆ ನೀಡಿದ್ದಾರೆ.
ಇದನ್ನೂ ಓದಿ: ಲೈಂಗಿಕ ಸಂಪರ್ಕದಿಂದ ಮಂಕಿಪಾಕ್ಸ್ ಹರಡುತ್ತದಾ? ಇಲ್ಲಿದೆ ಮಾಹಿತಿ
