ಕೊರೊನಾ ಭೀತಿ: ಐದು ಮೀಟರ್ ಅಂತರದಿಂದ ''ಚಿಕಿತ್ಸೆ'' ನೀಡಿದ್ದ ವೈದ್ಯ ಎತ್ತಂಗಡಿ

ಸುಮಾರು ಐದು ಮೀಟರ್ ಅಂತರದಿಂದ ರೋಗಿಗೆ ಚಿಕಿತ್ಸೆ ನೀಡಿದ್ದ ವೈದ್ಯ ಎತ್ತಂಗಡಿಯಾದ ಘಟನೆ ತಮಿಳುನಾಡಿನ ವಿಲ್ಲುಪುರಂ ಎಂಬಲ್ಲಿ ನಡೆದಿದೆ.

ವಿಲ್ಲುಪುರಂ(ತಮಿಳುನಾಡು): ಕೊರೊನಾ ಭೀತಿಯಿಂದ ವೈದ್ಯನೊಬ್ಬ ಸುಮಾರು ಐದು ಮೀಟರ್ ದೂರದಿಂದ ರೋಗಿಗೆ ಚಿಕಿತ್ಸೆ ನೀಡಿ ಎತ್ತಂಗಡಿಯಾದ ಘಟನೆ ವಿಲ್ಲುಪುರಂ ಜಿಲ್ಲೆಯ ಕಂದಮಂಗಳಂ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ನಡೆದಿದೆ.

ಜೂನ್​ 9ರಂದು ರೋಗಿಯೊಬ್ಬ ಗಂಟಲು ನೋವಿನ ಹಿನ್ನೆಲೆ ವೈದ್ಯರ ಬಳಿ ಬಂದಿದ್ದನು. ಈ ವೇಳೆ ವೈದ್ಯ 5 ಮೀಟರ್ ದೂರದಿಂದಲೇ ಟಾರ್ಚ್​ ಹಾಯಿಸಿ ರೋಗಿಯ ಗಂಟಲು ತಪಾಸಣೆ ನಡೆಸಿದ್ದರು.

ಈ ಸನ್ನಿವೇಶವನ್ನು ಮತ್ತೊಬ್ಬ ರೋಗಿ ತನ್ನ ಮೊಬೈಲ್​ ಫೋನ್​ನಿಂದ ರೆಕಾರ್ಡ್​ ಮಾಡಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿತ್ತು. ಇದು ವಿಲ್ಲುಪುರಂ ಆರೋಗ್ಯ ಇಲಾಖೆಯ ಗಮನಕ್ಕೆ ಬಂದಿದ್ದು, ವೈದ್ಯನಿಗೆ ನೋಟಿಸ್ ನೀಡಿ, ಬೇರೆ ಆಸ್ಪತ್ರೆಗೆ ಎತ್ತಂಗಡಿ ಮಾಡಿದೆ.