ನವದೆಹಲಿ: ದೇಶದಲ್ಲಿ ಕೊರೊನಾ ಸೋಂಕಿತರ ಸಂಖ್ಯೆ ಕೆಲವು ತಿಂಗಳುಗಳಿಂದ ಇಳಿಕೆಯಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಹೊಸ ಮಾರ್ಗಸೂಚಿಯನ್ನು ಕೇಂದ್ರ ಸರ್ಕಾರ ಬಿಡುಗಡೆ ಮಾಡಿದೆ. ಕಂಟೇನ್ಮೆಂಟ್ ಝೋನ್ಗಳನ್ನು ಹೊರತುಪಡಿಸಿ ಎಲ್ಲಾ ರಾಜ್ಯಗಳು ಹಾಗೂ ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಫೆಬ್ರವರಿ 1ರಿಂದ ಮಾರ್ಗಸೂಚಿಗಳು ಜಾರಿಗೆ ಬರುವಂತೆ ಕೇಂದ್ರ ಸರ್ಕಾರ ಆದೇಶ ಹೊರಡಿಸಿದೆ.
ಸಿನಿಮಾ ಹಾಲ್ಗಳು ಮತ್ತು ಥಿಯೇಟರ್ಗಳಲ್ಲಿ ಈವರೆಗೆ ಶೇ.50ರಷ್ಟು ಆಸನಗಳ ಭರ್ತಿಗೆ ಮಾತ್ರ ಅವಕಾಶ ನೀಡಲಾಗಿತ್ತು. ಈಗ ಹೊಸ ಮಾರ್ಗಸೂಚಿಯಂತೆ ಹೆಚ್ಚುವರಿ ಆಸನಗಳ ಭರ್ತಿಗೆ ಅವಕಾಶ ಕಲ್ಪಿಸಲಾಗಿದೆ.
ಸದ್ಯಕ್ಕೆ ಕ್ರೀಡಾಪಟುಗಳಿಗೆ ಮಾತ್ರ ಬಳಕೆಗೆ ಅವಕಾಶ ನೀಡಲಾಗಿದ್ದ ಈಜುಕೊಳಗಳಲ್ಲಿ ಹೊಸ ಮಾರ್ಗಸೂಚಿಯ ಪ್ರಕಾರ ಸಾರ್ವಜನಿಕರಿಗೂ ಅವಕಾಶ ಒದಗಿಸಲಾಗಿದೆ.
ಮಾರ್ಗಸೂಚಿಯಲ್ಲಿನ ಅಂಶಗಳು ಇಂತಿವೆ:
- ಮಾರ್ಗಸೂಚಿ ಅನ್ವಯ ಜನರ ಮಿತಿಯಿಲ್ಲದೆ ಸಭೆ, ಸಮಾರಂಭಕ್ಕೆ ಅವಕಾಶ
- ಅಂತಾರಾಷ್ಟ್ರೀಯ ಪ್ರಯಾಣಿಕರ ನಿರ್ಬಂಧದಲ್ಲಿ ಮತ್ತಷ್ಟು ಸಡಿಲಿಕೆ
- ಅಂತಾರಾಜ್ಯ ಪ್ರಯಾಣ, ಸರಕು ಸಾಗಣೆಗೆ ಯಾವುದೇ ಅನುಮತಿ ಅವಶ್ಯಕತೆಯಿಲ್ಲ.
- ವಸ್ತು ಪ್ರದರ್ಶನಾಲಯಗಳಿಗೆ ಈ ಮೊದಲಿದ್ದ ನಿಯಮಗಳಲ್ಲಿ ಸಡಿಲಿಕೆ
- ಶಾಲೆ, ಕಾಲೇಜು, ಹೋಟೆಲ್ಗಳನ್ನು ಮಾರ್ಗಸೂಚಿಯನ್ವಯ ನಡೆಸಲು ಅವಕಾಶ
- ವೃದ್ಧರು, ರೋಗಿಗಳು, ಮಕ್ಕಳು, ಗರ್ಭಿಣಿಯರಿಗೆ ಮುನ್ನೆಚ್ಚರಿಕೆಗೆ ಸೂಚನೆ
