ಟಿಕ್​ಟಾಕ್​ ವಿಡಿಯೋಗಳಿಗೆ ಯಾರೂ ಲೈಕ್​ ಮಾಡ್ತಿಲ್ಲ ಅಂತ ಯುವಕ ಆತ್ಮಹತ್ಯೆ

ತಾನು ಮಾಡಿದ ಟಿಕ್​ಟಾಕ್​ ವಿಡಿಯೋಗಳಿಗೆ ಯಾರೂ ಲೈಕ್​ ಮಾಡುತ್ತಿಲ್ಲ ಎಂದು ಬೆಸರಗೊಂಡಿದ್ದ ಯುವಕ ಆತ್ಮಹತ್ಯೆ ಮಾಡಿಕೊಂಡ ಘಟನೆ ಉತ್ತರಪ್ರದೇಶದ ನೋಯ್ಡಾದಲ್ಲಿ ನಡೆದಿದೆ.

ನೊಯ್ಡಾ (ಉತ್ತರಪ್ರದೇಶ): ತಾನು ಮಾಡುತ್ತಿರುವ ಟಿಕ್​ಟಾಕ್​ ವಿಡಿಯೋಗಳಿಗೆ ಯಾರೂ ಲೈಕ್​ ಮಾಡುತ್ತಿಲ್ಲ ಎಂದು ಖಿನ್ನತೆಗೆ ಒಳಗಾದ ಯುವಕ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

ನೊಯ್ಡಾದ 39ನೇ ಸೆಕ್ಟಾರ್​ನ ಸಲಾರ್ಪುರದಲ್ಲಿ ವಾಸಿಸುತ್ತಿದ್ದ 18 ವರ್ಷದ ಯುವಕ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ ಎಂಬುದು ಪೊಲೀಸರ ಆರಂಭಿಕ ತನಿಖೆಯಲ್ಲಿ ತಿಳಿದುಬಂದಿದೆ. ಇದಕ್ಕೆ ಪೂರಕ ಎಂಬಂತೆ, ಈತ ಚೀನಾ ಮೂಲದ ಟಿಕ್​ಟಾಕ್​ ಆ್ಯಪ್​ನಲ್ಲಿ ಸಕ್ರಿಯನಾಗಿ ವಿಡಿಯೋ ಮಾಡುತ್ತಿದ್ದ ಎಂದು ಸ್ಥಳೀಯರು ಹೇಳಿದ್ದಾರೆ.

ಘಟನೆ ಬಗ್ಗೆ ಮಾಹಿತಿ ಬರುತ್ತಿದ್ದಂತೆ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಒಳಗಿನಿಂದ ಬೋಲ್ಟ್ ಹಾಕಿದ ಬಾಗಿಲು ಮುರುದಿದ್ದಾರೆ. ಕೋಣೆ ಒಳಗೆ ಫ್ಯಾನ್​ಗೆ ನೇಣು ಬಿಗಿದುಕೊಂಡಿರುವ ಸ್ಥಿತಿಯಲ್ಲಿ ಯುವಕನ ದೇಹ ಕಂಡುಬಂದಿದೆ. ಪೊಲೀಸರು ಸ್ಥಳೀಯರನ್ನು ಈ ಬಗ್ಗೆ ವಿಚಾರಿಸಿದಾಗ, 'ಟಿಕ್​ಟಾಕ್​ ವಿಡಿಯೋಗಳಿಗೆ ಲೈಕ್​ ಬಾರದಿದ್ದಕ್ಕೆ ಯುವಕ ಕೆಲ ದಿನಗಳಿಂದ ಬೇಸರಕ್ಕೆ ಒಳಗಾಗಿದ್ದ' ಎಂದಿದ್ದಾರೆ.

ಸ್ಥಳದಲ್ಲಿ ಯಾವುದೇ ಡೆತ್​ ನೋಟ್​ ಕಂಡು ಬಂದಿಲ್ಲ. ಈ ಬಗ್ಗೆ ಪ್ರಕರಣ ದಾಖಲಿಸಿಕೊಂಡು ಹೆಚ್ಚಿನ ತನಿಖೆ ನಡೆಸುತ್ತಿರುವುದಾಗಿ ನೋಯ್ಡಾ ಹೆಚ್ಚುವರಿ ಪೊಲೀಸ್ ಆಯುಕ್ತ ರಣವಿಜಯ್ ಸಿಂಗ್ ತಿಳಿಸಿದ್ದಾರೆ.