ಅನಂತನಾಗ್: ಪ್ರೀತಿಯ ತಂದೆ ಎದ್ದು ಬಂದು ಮುದ್ದು ಮಾಡುತ್ತಿಲ್ಲವೇಕೆ ಎಂದು ಆ ಮಗು ನೋಡುತ್ತಲೇ ಇತ್ತು. ಪುಟ್ಟ ಮಗುವಿನ ಕಣ್ಣುಗಳಲ್ಲಿ ಸಾವಿರ ಪ್ರಶ್ನೆಗಳಿದ್ದವು. ತಂದೆ ಬಾರದ ಲೋಕಕ್ಕೆ ತೆರಳಿದ್ದಾರೆ ಎಂಬುದನ್ನು ಊಹಿಸಲೂ ಆಗದ ವಯಸ್ಸದು. ಆದರೆ ಈ ದೃಶ್ಯವನ್ನು ಕಂಡವರ ಕಣ್ಣುಗಳು ತುಂಬಿಬಂದವು.
ಹೌದು, ಜಮ್ಮು ಮತ್ತು ಕಾಶ್ಮೀರದ ಅನಂತ್ನಾಗ್ನಲ್ಲಿ ಉಗ್ರನ ಪೈಶಾಚಿಕ ದಾಳಿಯಿಂದ ಹುತಾತ್ಮರಾದ ಪೊಲೀಸ್ ಅಧಿಕಾರಿಗೆ ಅಂತಿಮ ನಮನ ಸಲ್ಲಿಸಿದ ಸಂದರ್ಭ ಕಲ್ಲೆದೆಯನ್ನೂ ಕರಗಿಸುವಂತಿತ್ತು ಈ ದೃಶ್ಯ. ಉಗ್ರನ ದಾಳಿಯಿಂದ ತೀವ್ರವಾಗಿ ಗಾಯಗೊಂಡು ಭಾನುವಾರ ಆಸ್ಪತ್ರೆಯಲ್ಲಿ ಹುತಾತ್ಮರಾದ ಎಸ್ಹೆಚ್ಒ ಅರ್ಷದ್ ಖಾನ್ ಅವರ ಮಗ ತಂದೆಯ ಪಾರ್ಥಿವ ಶರೀರವನ್ನೇ ನೋಡುತ್ತಿದ್ದ ದೃಶ್ಯ ಮನಕಲಕುವಂತಿತ್ತು.
'ಅಪ್ಪಾ ಎದ್ದೇಳು' ಎಂಬರ್ಥದಲ್ಲಿ ತಂದೆಯ ಪಾರ್ಥಿವ ಶರೀರವನ್ನೇ ನೋಡುತ್ತಿದ್ದ ಮಗುವನ್ನು ಶ್ರೀನಗರದ ಎಸ್ಎಸ್ಪಿ ಡಾ. ಎಂ.ಹಸೀಬ್ ಮುಘಲ್ ಎತ್ತಿಕೊಂಡು ಹೋದರು. ಆಗಲೂ ಮಗು ತಂದೆಯ ಶರೀರವನ್ನೇ ನೋಡುತ್ತಿತ್ತು.
ಜೂನ್ 12ರಂದು ಅನಂತನಾಗ್ನಲ್ಲಿ ಸಿಆರ್ಪಿಎಫ್ ಯೋಧರ ಮೇಲೆ ಉಗ್ರನೊಬ್ಬ ದಾಳಿ ನಡೆಸಿದ್ದ. ಸ್ಥಳದಲ್ಲೇ ಐವರು ಯೋಧರು ಹುತಾತ್ಮರಾಗಿದ್ದರು. ಏಮ್ಸ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಎಸ್ಹೆಚ್ಒ ಅರ್ಷದ್ ಖಾನ್ ಚಿಕಿತ್ಸೆ ಫಲಿಸದೆ ಭಾನುವಾರ ಹುತಾತ್ಮರಾದರು. ನಿನ್ನೆ ಸೇನಾ ಗೌರವದೊಂದಿಗೆ ಅವರ ಅಂತ್ಯಕ್ರಿಯೆ ನೆರವೇರಿತು.
