ಪೋರ್ಟ್ ಬ್ಲೇರ್ (ಅಂಡಮಾನ್ ಮತ್ತು ನಿಕೋಬಾರ್): ಮೊಟ್ಟ ಮೊದಲ ಬಾರಿಗೆ ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳಿಗೆ ಸಂಪರ್ಕ ಒದಗಿಸುವ ಜಲಾಂತರ್ಗಾಮಿ ಆಪ್ಟಿಕಲ್ ಫೈಬರ್ ಕೇಬಲ್ ಯೋಜನೆಯನ್ನು ಪ್ರಧಾನಿ ನರೇಂದ್ರ ಮೋದಿ ಇಂದು ಉದ್ಘಾಟಿಸಿದರು.
2,312 ಕಿಲೋ ಮೀಟರ್ ಅಂತರದಲ್ಲಿ ಚೆನ್ನೈ - ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳಿಗೆ (CANI) ಅತಿ ವೇಗದ ಬ್ರಾಡ್‌ಬಾಂಡ್ ಸಂಪರ್ಕವನ್ನು ಒದಗಿಸುವ ಜಲಾಂತರ್ಗಾಮಿ ಆಪ್ಟಿಕಲ್ ಫೈಬರ್ ಕೇಬಲ್ ಯೋಜನೆಗೆ 2018ರ ಡಿಸೆಂಬರ್ 30 ರಂದೇ ಪಿಎಂ ಮೋದಿ ಅಡಿಪಾಯ ಹಾಕಿದ್ದರು.
ವಿಡಿಯೋ ಕಾನ್ಫರೆನ್ಸ್ ಮೂಲಕ ಯೋಜನೆಯನ್ನು ಉದ್ಘಾಟಸಿದ ಬಳಿಕ ಮಾತನಾಡಿದ ಪ್ರಧಾನಿ, ನಮ್ಮ ಈ ಪ್ರಯತ್ನ ಅಂಡಮಾನ್ ಮತ್ತು ನಿಕೋಬಾರ್ಗೆ ಹಾಗೂ ಅಲ್ಲಿನ ಜನರಿಗೆ ಹೊಸ ಸೌಲಭ್ಯಗಳನ್ನು ಮಾತ್ರ ಕಲ್ಪಿಸಿಲ್ಲ, ವಿಶ್ವದ ನಕ್ಷೆಯಲ್ಲಿ ಪ್ರಮುಖ ಸ್ಥಾನವನ್ನೂ ನೀಡುತ್ತದೆ ಎಂದು ನಾನು ಭಾವಿಸುತ್ತೇನೆ ಎಂದು ಹೇಳಿದರು.
ಈ ಯೋಜನೆಯು ಚೆನ್ನೈನಿಂದ ಪೋರ್ಟ್ ಬ್ಲೇರ್ ಮತ್ತು ಇತರ ಏಳು ದ್ವೀಪಗಳಾದ ಸ್ವರಾಜ್ ಡೀಪ್ (ಹ್ಯಾವ್ಲಾಕ್), ಲಾಂಗ್ ಐಲ್ಯಾಂಡ್, ರಂಗತ್, ಹಟ್ ಬೇ (ಲಿಟಲ್ ಅಂಡಮಾನ್), ಕಮೋರ್ಟಾ, ಕಾರ್ ನಿಕೋಬಾರ್ ಮತ್ತು ಕ್ಯಾಂಪ್ಬೆಲ್ ಬೇ (ಗ್ರೇಟ್ ನಿಕೋಬಾರ್)ಗೆ ಸಂಪರ್ಕವನ್ನು ಕಲ್ಪಿಸುತ್ತದೆ, ಟೆಲಿಕಾಂ ಸೇವೆಗಳನ್ನು ಒದಗಿಸುತ್ತದೆ.
ಜಲಾಂತರ್ಗಾಮಿ ಆಪ್ಟಿಕಲ್ ಕೇಬಲ್ ಎಂದರೆ ಸಾಗರ ಮತ್ತು ಸಮುದ್ರದ ಉದ್ದಕ್ಕೂ ದೂರಸಂಪರ್ಕ ಸಂಕೇತಗಳನ್ನು ರವಾನಿಸಲು ಭೂ-ಆಧಾರಿತ ನಿಲ್ದಾಣಗಳ ನಡುವೆ ಸಮುದ್ರತಳದಲ್ಲಿ ಹಾಕಿದ ಕೇಬಲ್ ಆಗಿದೆ.
