ಇಸ್ಲಾಮಾಬಾದ್: ಭಾರತೀಯ ಬಾಹ್ಯಾಕಾಶ ಸಂಸ್ಥೆ ಇಸ್ರೋ ಚಂದಿರನ ಅಂಗಳಕ್ಕೆ ಹಾರಿಬಿಟ್ಟಿರುವ ಚಂದ್ರಯಾನ-2 ಯೋಜನೆಗೆ ಇಡೀ ವಿಶ್ವವೇ ಮೆಚ್ಚುಗೆ ವ್ಯಕ್ತಪಡಿಸಿ, ತಲೆಬಾಗಿದೆ. ನಿಜಕ್ಕೂ ಕಠಿಣ ಪರಿಶ್ರಮದಿಂದ ನೀವೂ ಮಾಡಿರುವ ಸಾಧನೆ ಸಣ್ಣದಲ್ಲ ಎಂದು ಹಾಡಿ ಹೊಗಳಿದೆ. ಇದರ ಮಧ್ಯೆ ಭಾರತದ ವಿಜ್ಞಾನಿಗಳ ಕಾಲೆಳೆಯುವ ಕೆಲಸಕ್ಕೆ ಕೈ ಹಾಕಿದ್ದ ನೆರೆಯ ಪಾಕ್ಗೆ ಇದೀಗ ಅಲ್ಲಿನ ಗಗನಯಾತ್ರಿ ಸಖತ್ ಆಗಿ ತಿರುಗೇಟು ನೀಡಿದ್ದಾರೆ.
ಪಾಕ್ನ ಮೊದಲ ಮಹಿಳಾ ಗಗನಯಾತ್ರಿ ನಮೀರಾ ಸಲೀಂ ಇಸ್ರೋ ಚಂದ್ರಯಾನ-2 ಸಾಧನೆಗೆ ಅಭಿನಂದನೆ ಸಲ್ಲಿಕೆ ಮಾಡಿದ್ದು, ಚಂದಿರನ ದಕ್ಷಿಣ ಧ್ರುವದಲ್ಲಿ ವಿಕ್ರಂ ಲ್ಯಾಂಡರ್ ಇಳಿಸುವ ನಿಮ್ಮ ಪ್ರಯತ್ನ ನಿಜಕ್ಕೂ ಐತಿಹಾಸಿಕವಾಗಿದ್ದು, ಅದಕ್ಕೆ ನಾನು ಅಭಿನಂದನೆ ಸಲ್ಲಿಕೆ ಮಾಡುವೆ ಎಂದು ತಿಳಿಸಿದ್ದಾರೆ.
ಚಂದಿನರ ದಕ್ಷಿಣ ಧ್ರುವದಲ್ಲಿ ಚಂದ್ರಯಾನ-2 ಇಳಿಸಲು ಪ್ರಯತ್ನ ಮಾಡಿರುವ ಭಾರತ ಇಡೀ ವಿಶ್ವವೇ ಹೆಮ್ಮೆ ಪಡುವಂತೆ ಮಾಡಿದ್ದು, ಕೇವಲ ತನ್ನ ಪ್ರದೇಶಕ್ಕೆ ಮಾತ್ರ ಸಿಮಿತ ಮಾಡಿಕೊಳ್ಳದೇ ಇಡೀ ವಿಶ್ವಕ್ಕೆ ಸಹಕಾರಿಯಾಗಲಿದೆ ಎಂದು ತಿಳಿಸಿದ್ದಾರೆ. ಈಗಾಗಲೇ ನಾಸಾ,ಆಸ್ಟ್ರೇಲಿಯನ್ ಸ್ಪೇಸ್ ಏಜನ್ಸಿ,ಯುಎಇ ದೇಶಗಳು ಭಾರತದ ಸಾಧನೆಗೆ ಮೆಚ್ಚುಗೆ ವ್ಯಕ್ತಪಡಿಸಿವೆ.
ಚಂದಿರನ ಅಂಗಳದಲ್ಲಿ ವಿಕ್ರಂ ಲ್ಯಾಂಡರ್ ತಲುಪಲು ಕೇವಲ 2.1 ಕಿ,ಮೀ ದೂರವಿದ್ದಾಗ ಭೂಮಿಯಿಂದ ತನ್ನ ಸಂಪರ್ಕ ಕಳೆದುಕೊಂಡಿತ್ತು. ಇದಾದ ಬಳಿಕ ಪಾಕ್ ಇದೇ ವಿಷಯವನ್ನಿಟ್ಟುಕೊಂಡು ಭಾರತೀಯರ ಕಾಲೆಳೆಯುವ ಕೆಲಸ ಮಾಡಿತ್ತು. ಆದರೆ ಇದಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ನೆಟಿಜನ್ಸ್ ಸಖತ್ ಆಗಿ ತಿರುಗೇಟು ನೀಡಿದ್ದರು.
