ಹೈದರಾಬಾದ್: ಡಿಎನ್ಎ ಯನ್ನು ವೈರಸ್ ರಚನೆಯ ಮಾದರಿಯಲ್ಲಿ ಮಡಚುವ ಮೂಲಕ ಎಚ್ಐವಿಯನ್ನೇ ಹೋಲುವ ಕಣಗಳನ್ನು ಮೆಸಾಚುಸೆಟ್ಸ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ವಿಜ್ಞಾನಿಗಳು ತಯಾರಿಸಿದ್ದಾರೆ. ಡಿಎನ್ಎ ಓರಿಗ್ಯಾಮಿ ಎಂಬ ತಂತ್ರಜ್ಞಾನ ಬಳಸಿ ಮಾನವ ರೋಗ ನಿರೋಧಕ ಕೋಶಗಳಿಂದ ಪ್ರಯೋಗಾಲಯದ ತಟ್ಟೆಯಲ್ಲಿ ಬೆಳೆಸಲಾದ ಕೋಶಗಳಿಗೆ ಪ್ರತಿಯಾಗಿ ಈ ಕಣಗಳು ಪ್ರಬಲ ರೋಗನಿರೋಧಕ ಗುಣಗಳನ್ನು ಪ್ರದರ್ಶಿಸಿವೆ ಹಾಗೂ ಈ ತಂತ್ರಜ್ಞಾನವು ಎಚ್ಐವಿ ಏಡ್ಸ್ಗೆ ವ್ಯಾಕ್ಸಿನ್ ಕಂಡುಹಿಡಿಯಲು ಸಹಾಯಕವಾಗಲಿದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
ಅಳತೆ ಹಾಗೂ ಆಕಾರದಲ್ಲಿ ಥೇಟ್ ವೈರಸ್ ರೀತಿಯಲ್ಲೇ ಇರುವ ಈ ಡಿಎನ್ಎ ಕಣಗಳ ಸುತ್ತ ಎಚ್ಐವಿ ಪ್ರೊಟೀನ್, ಅಥವಾ ಆ್ಯಂಟಿಜೆನ್ಸ್ ಸವರಲಾಗಿದ್ದು, ಅತ್ಯಂತ ಪ್ರಬಲ ರೋಗನಿರೋಧಕ ಶಕ್ತಿಯನ್ನು ಪ್ರದರ್ಶಿಸುವ ರೀತಿಯಲ್ಲಿ ಇವುಗಳನ್ನು ಜೋಡಿಸಲಾಗಿದೆ. ಪ್ರಸ್ತುತ ಸಂಶೋಧಕರು ಇದೇ ವಿಧಾನವನ್ನು ಬಳಸಿ ಕೋವಿಡ್-19 ಗೆ ವ್ಯಾಕ್ಸಿನ್ ಕಂಡುಹಿಡಿಯಲು ಮುಂದಾಗಿದ್ದಾರೆ. ಅಲ್ಲದೆ ಈ ವಿಧಾನವು ಹಲವಾರು ವೈರಸ್ಗಳ ವಿರುದ್ಧದ ಹೋರಾಟಕ್ಕೆ ಸಹಾಯಕವಾಗಲಿದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
"ಸದ್ಯ ಪ್ರಾಥಮಿಕವಾಗಿ ತಿಳಿದು ಬರುತ್ತಿರುವ ಈ ಡಿಸೈನ್ ನಿಯಮಗಳು ಎಲ್ಲ ರೋಗಗಳು ಹಾಗೂ ರೋಗಗಳ ಪ್ರತಿಕಾಯಗಳಿಗೆ ಜೆನೆಟಿಕ್ ರೂಪದಲ್ಲಿ ಅನ್ವಯಿಸಬಹುದು." ಎಂದು ಅಂಡರ್ವುಡ್-ಪ್ರೆಸ್ಕಾಟ್ ಪ್ರಾಧ್ಯಾಪಕ ಡರೆಲ್ ಇರ್ವಿನ್ ಹೇಳಿದ್ದಾರೆ.
ನೇಚರ್ ಪಬ್ಲಿಶಿಂಗ್ ಗ್ರೂಪ್ ಪ್ರಕಟಿಸುವ ನೇಚರ್ ನ್ಯಾನೊಟೆಕ್ನಾಲಜಿ ಎಂಬ ವೈಜ್ಞಾನಿಕ ಮಾಸಿಕದಲ್ಲಿ ಈ ವರದಿಯು ಪ್ರಕಟವಾಗಿದೆ.
ಡಿಎನ್ಎ ಓರಿಗ್ಯಾಮಿ ತಂತ್ರಜ್ಞಾನ:
ಡಿಎನ್ಎ ಮಾಲಿಕ್ಯೂಲ್ಗಳನ್ನು ಡಿಸೈನ್ ಮಾಡುವ ತಂತ್ರಜ್ಞಾನಗಳನ್ನು 1980 ರಿಂದಲೇ ವಿಜ್ಞಾನಿಗಳು ಅಧ್ಯಯನ ನಡೆಸುತ್ತಿದ್ದಾರೆ. ಔಷಧ ತಯಾರಿಕೆ ಹಾಗೂ ಇತರ ಸಂಬಂಧಿತ ಉದ್ದೇಶಗಳಿಗಾಗಿ ಈ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ. ಇದೇ ಮಾದರಿಯ ಡಿಎನ್ಎ ಓರಿಗ್ಯಾಮಿ ತಂತ್ರಜ್ಞಾನವನ್ನು 2006 ರಲ್ಲಿ ಕಾಲ್ಟೆಕ್ನ ಪೌಲ್ ರಿಚ್ಮಂಡ್ ಎಂಬುವರು ಕಂಡು ಹಿಡಿದಿದ್ದಾರೆ.
ಮೆಸಾಚುಸೆಟ್ಸ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ಬಯಾಲಾಜಿಕಲ್ ಎಂಜಿನಿಯರಿಂಗ್ ವಿಭಾಗದ ಪ್ರಾಧ್ಯಾಪಕ ಮಾರ್ಕ್ ಬಾಥ್ ಎಂಬುವರು ತಮ್ಮ ಪ್ರಯೋಗಾಲಯದಲ್ಲಿ ಅಲ್ಗೊರಿದಂ ಒಂದನ್ನು ಅಭಿವೃದ್ಧಿಪಡಿಸಿದ್ದು, ಈ ಅಲ್ಗೊರಿದಂ ಡಿಎನ್ಎ ಓರಿಗ್ಯಾಮಿ ತಂತ್ರಜ್ಞಾನವನ್ನು ಬಳಸಿ ಥ್ರೀ-ಡೈಮೆನ್ಷನ್ ವೈರಸ್ ಮಾದರಿಯ ಆಕಾರಗಳನ್ನು ಸ್ವಯಂಚಾಲಿತವಾಗಿ ಡಿಸೈನ್ ಮಾಡಿ ರಚಿಸುತ್ತದೆ.
