ನವದೆಹಲಿ: ಕಳೆದ ವರ್ಷ ಫೆಬ್ರವರಿ 27ರಂದು ವಾಯುಪಡೆಯ ಎಂಐ- 17 ಹೆಲಿಕಾಪ್ಟರ್ ಪತನ ವಿಚಾರಕ್ಕೆ ಸಂಬಂಧಿಸಿದಂತೆ ಇಬ್ಬರು ಅಧಿಕಾರಿಗಳ ವಿರುದ್ಧದ ಕಾನೂನು ಕ್ರಮಕ್ಕೆ ಸಶಸ್ತ್ರ ಪಡೆಗಳ ನ್ಯಾಯಾಲಯ ತಡೆ ನೀಡಿದೆ.
ಜಮ್ಮು-ಕಾಶ್ಮೀರದ ಬದ್ಗಾಂನಲ್ಲಿ ಈ ಘಟನೆ ನಡೆದಿದ್ದು, ಹೆಲಿಕಾಪ್ಟರ್ನಲ್ಲಿದ್ದ ಆರು ಮಂದಿ ವಾಯುಪಡೆ ಅಧಿಕಾರಿಗಳು ಹಾಗೂ ಓರ್ವ ನಾಗರಿಕ ಸಾವನ್ನಪ್ಪಿದ್ದು, ಈ ಕುರಿತಂತೆ ಮಿಲಿಟರಿ ನ್ಯಾಯಾಲಯ ಸೋಮವಾರ ಈ ರೀತಿಯಾಗಿ ಆದೇಶ ನೀಡಿದೆ.
ಭಾರತೀಯ ವಾಯುಪಡೆಯ ಗ್ರೂಪ್ ಕ್ಯಾಪ್ಟನ್ ಎಸ್.ಆರ್. ಚೌಧರಿ ಹಾಗೂ ವಿಂಗ್ ಕಮಾಂಡರ್ ಶ್ಯಾಮ್ ನೈತಾನಿ ಅವರ ವಿರುದ್ಧ ಕ್ರಮ ಜರುಗಲಿದ್ದು, ಇಬ್ಬರೂ ಅಧಿಕಾರಿಗಳ ಪರ ವಕೀಲ ಅಂಕುರ್ ಚಿಬ್ಬಾರ್ ವಾದ ಮಂಡಿಸಿದ್ದರು.
ಭೂಮಿಯಿಂದ ಆಕಾಶಕ್ಕೆ ಚಿಮ್ಮುವ ಸಾಮರ್ಥ್ಯವುಳ್ಳ ಭಾರತೀಯ ಕ್ಷಿಪಣಿಯನ್ನೇ ಬಳಸಿ, ಹೆಲಿಕಾಪ್ಟರ್ ಧ್ವಂಸಗೊಳಿಸಿದ ಆರೋಪ ಇವರ ಮೇಲಿದ್ದು, ಹೆಲಿಕಾಪ್ಟರ್ ಆಕಾಶಕ್ಕೆ ಹಾರಿದ 10 ನಿಮಿಷಗಳಲ್ಲಿ ಕೆಳಗುರುಳಿಸಿತ್ತು.
ಪಾಕಿಸ್ತಾನದ ಬಾಲಾಕೋಟ್ನಲ್ಲಿ ಜೈಷ್ ಎ ಮೊಹಮ್ಮದ್ ತರಬೇತಿ ಕೇಂದ್ರದ ಮೇಲೆ ಭಾರತೀಯ ವಾಯುಪಡೆ ಏರ್ಸ್ಟ್ರೈಕ್ ನಡೆಸಿದ ನಂತರದ ದಿನವೇ ಈ ಘಟನೆ ನಡೆದಿದ್ದು, ಸಾಕಷ್ಟು ವಿವಾದ ಸೃಷ್ಟಿಸಿತ್ತು.
ಸಶಸ್ತ್ರ ಪಡೆಗಳ ನ್ಯಾಯಾಲಯದ ಮುಖ್ಯಸ್ಥ ನಿವೃತ್ತ ಲೆಫ್ಟಿನೆಂಟ್ ಜನರಲ್ ಫಿಲಿಪ್ ಕ್ಯಾಂಪೋಸ್ ಹಾಗೂ ಜಸ್ಟೀಸ್ ರಾಜೇಂದ್ರ ಮೆನನ್ ಈ ರೀತಿಯ ಆದೇಶ ನೀಡಿದ್ದು, ಈ ಪ್ರಕರಣದ ಮುಂದಿನ ವಿಚಾರಣೆ ಸೆಪ್ಟೆಂಬರ್ 30ರಂದು ನಡೆದಿದೆ.
