ಮುಂಬೈ: ಕಳೆದ ವರ್ಷದ ಬರಗಾಲದ ಛಾಯೆಗೆ ತತ್ತರಿಸಿದ್ದ ಮಹಾರಾಷ್ಟ್ರಕ್ಕೆ ಈ ವರ್ಷವೂ ಭೀಕರ ಬರಗಾಲದ ಪರಿಸ್ಥಿತಿ ತಲೆದೋರಿದೆ.
ಇಲ್ಲಿಯವರೆಗೆ (ಮೇ 18) ಮಹಾರಾಷ್ಟ್ರದ 26 ಅಣೆಕಟ್ಟೆಗಳಲ್ಲಿನ ನೀರಿನ ಸಂಗ್ರಹ ಸಾಮರ್ಥ್ಯ ಶೂನ್ಯಕ್ಕೆ ತಲುಪಿದೆ. ಈ ಬಗ್ಗೆ ಸಾಂಖಿಕ ಇಲಾಖೆ ಆಧರಿಸಿದ ಅಣೆಕಟ್ಟೆಗಳಲ್ಲಿನ ನೀರಿನ ಸಂಗ್ರಹದ ಅಂಕಿ ಅಂಶಗಳನ್ನು ಜಲ ಸಂರಕ್ಷಣೆ ಇಲಾಖೆಯು ತನ್ನ ವೆಬ್ ಸೈಟ್ನಲ್ಲಿ ಪ್ರಕಟಿಸಿದೆ.
ಔರಂಗಬಾದ್, ಬೇದ್, ಹಿಂಗೋಲಿ, ಪ್ರಭಾನಿ ಹಾಗೂ ಒಸ್ಮಾನಬಾದ್ ಜಿಲ್ಲೆಗಳಲ್ಲಿನ ಅಣೆಕಟ್ಟೆಗಳಲ್ಲಿ ಶೇ 0.43ರಷ್ಟು ಮಾತ್ರವೇ ನೀರು ಸಂಗ್ರಹವಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ಈ ಅಣೆಕಟ್ಟೆಗಳಲ್ಲಿ ಶೇ 23.44ರಷ್ಟು ನೀರು ಶೇಖರಣೆ ಆಗಿತ್ತು.
ಔರಂಗಬಾದ್ ವಿಭಾಗದ ಪೈಥಾನ್, ಮಂಜಾರ, ಮಜಲ್ಗಾಂವ್, ಯೆಲ್ಡಾರಿ, ಸಿದ್ದೇಶ್ವರ್, ಲೋವರ್ ತೆರ್ನಾ, ಸಿನಾ ಕೋಲೆಗಾಂವ್ ಮತ್ತು ಲೋವರ್ ಧುಡ್ನಾ ಆಣೆಕಟ್ಟೆಗಳಲ್ಲಿ ನೀರಿನ ಮಟ್ಟ ಶೂನ್ಯ ಮಟ್ಟ ತಲುಪಿದೆ. ಕಳೆದ ವರ್ಷ ಮೇ 18ರಂದು ಪೈಥಾನ್- ಶೇ 34.95ರಷ್ಟು ಮಂಜಾರ- ಶೇ 21.24 ರಷ್ಟು, ಮಜಲ್ಗಾಂವ್- ಶೇ 17.5ರಷ್ಟು ಹಾಗೂ ತರ್ನಾ- ಶೇ 52.03 ರಷ್ಟು ನೀರು ಶೇಖರಣೆ ಆಗಿತ್ತು.
ಸಂಪೂರ್ಣವಾಗಿ ಬತ್ತಿರುವ ಕೃಷ್ಣಾ ನದಿಗೆ ನೀರು ಹರಿಸುವಂತೆ ರಾಜ್ಯ ಸರ್ಕಾರ ಮಹಾರಾಷ್ಟ್ರ ಸರ್ಕಾರಕ್ಕೆ ಮನವಿ ಮಾಡಿತ್ತು. ನೀರು ನೀಡಲು ಷರತ್ತು ಬದ್ಧವಾಗಿ ಒಪ್ಪಿಕೊಂಡ ಮಹಾ ಸರ್ಕಾರ, ನೀರಿಗೆ ನೀರು ಕೊಡುವಂತೆ ಕೇಳಿತ್ತ. ಈ ಹಿಂದೆ ಹಣ ಪಡೆದು ಕೃಷ್ಣಾ ನದಿಗೆ ನೀರು ಹರಿಸುತ್ತಿತ್ತು. ಈ ವರ್ಷ ಮಹಾರಾಷ್ಟ್ರದ 26 ಆಣೆಕಟ್ಟೆಗಳಲ್ಲಿ ನೀರಿನ ಸಂಗ್ರಹ ಶೂನ್ಯಕ್ಕೆ ತಲುಪಿದ್ದು, ಮಾಹಾ ಹಾಗೂ ಕೃಷ್ಣಾ ನದಿ ತೀರದ ಜನರಲ್ಲಿ ಆತಂಕಕ್ಕೆ ಕಾರಣವಾಗಿದೆ.
