ರೋಮ್(ಇಟಲಿ): ಕೊರೊನಾ ವೈರಸ್‌ನಿಂದ ಹೈರಾಣಾಗಿರುವ ಇಟಲಿಯಲ್ಲಿ ಕನಿಷ್ಠ ಏಪ್ರಿಲ್ ತಿಂಗಳ ಮಧ್ಯಭಾಗದವರೆಗೆ ಲಾಕ್ ಡೌನ್ ಮುಂದುವರೆಸಲು ಅಲ್ಲಿನ ಸರ್ಕಾರ ನಿರ್ಧರಿಸಿದೆ.
ದೇಶದಲ್ಲಿ ಮಾರಣಾಂತಿಕ ಸೋಂಕಿಗೆ ಈಗಾಗಲೇ 11,591 ಮಂದಿ ಸಾವಿಗೀಡಾಗಿದ್ದು, ಅಲ್ಲಿನ ಪ್ರಧಾನಿ ನಿರ್ಧಾರವನ್ನು ಸಮರ್ಥಿಸಿಕೊಂಡಿದ್ದಾರೆ. ಈ ಹಂತದಲ್ಲಿ ಒಂದುವೇಳೆ ನಾವು ನಿರ್ಬಂಧಗಳನ್ನು ಸಡಿಲಿಸಿದ್ದೇ ಆದಲ್ಲಿ ನಾವು ಹೊಂದಿರುವ ಪ್ರಗತಿಗೆ ಹಿನ್ನಡೆಯಾಗಲಿದೆ ಎನ್ನುವುದು ಅವರ ಆತಂಕ.
ದೇಶದ ಆರ್ಥಿಕಾಭಿವೃದ್ಧಿಯ ದೃಷ್ಠಿಯಿಂದ 3 ವಾರಗಳ ಲಾಕ್ ಡೌನ್ ನಿಜವಾಗ್ಲೂ ಕಷ್ಟವಾಗುತ್ತದೆ. ಆದ್ರೆ, ಇದೇನು ತುಂಬ ಸಮಯಗಳ ಕಾಲ ಮುಂದುವರೆಯಲ್ಲ. ನಾವು ಪರಿಹಾರಾತ್ಮಕ ದಾರಿಗಳನ್ನು ಹುಡುಕುತ್ತಿದ್ದೇವೆ. ಪರಿಸ್ಥಿತಿ ಸುಧಾರಿಸುತ್ತಿದ್ದಂತೆ ನಿರ್ಬಂಧಗಳು ಸಡಿಲಗೊಳ್ಳಲಿದೆ ಎಂದು ಇಟಲಿಯ ಆರೋಗ್ಯ ಸಚಿವ ಆಶಾವಾದ ವ್ಯಕ್ತಪಡಿಸಿದ್ದಾರೆ.
ದೇಶದಲ್ಲಿ ವ್ಯಾಪಾರ, ವಹಿವಾಟು ಮತ್ತು ಇತರ ಸಾರ್ವಜನಿಕ ಸಮಾರಂಭವನ್ನು ನಿಷೇಧಿಸಿದ ಆದೇಶ ಶುಕ್ರವಾರಕ್ಕೆ ಕೊನೆಗೊಂಡಿತ್ತು. ಈ ಹಿನ್ನೆಲೆಯಲ್ಲಿ ಅವರು ಈ ವಿಚಾರಗಳನ್ನು ಪ್ರಸ್ತಾಪಿಸಿದ್ದಾರೆ.
ಇಡೀ ವಿಶ್ವದಲ್ಲೇ ಕೋವಿಡ್-19 ಹರಡುವಿಕೆ ತಡೆಗಟ್ಟಲು ಅತಿ ಹೆಚ್ಚು ನಿರ್ಬಂಧಗಳನ್ನು ಇಟಲಿಯಲ್ಲಿ ವಿಧಿಸಲಾಗಿದೆ. ಇಟಲಿಯಲ್ಲಿ ಫೆಬ್ರವರಿ 21 ರಂದು ಮಾರಕ ಖಾಯಿಲೆಗೆ ಮೊದಲ ವ್ಯಕ್ತಿ ಬಲಿಯಾದ ಬಳಿಕ ಇದೀಗ ವೈರಸ್ ಹರಡುವಿಕೆಯ ಪ್ರಮಾಣದಲ್ಲಿ ಇಳಿಕೆ ಕಂಡುಬಂದಿದೆ.
ಸ್ಪೇನ್‌ನ ಚಿತ್ರಣ ಹೇಗಿದೆ?
ಸ್ಪೇನ್‌ನಲ್ಲಿ ಕೋವಿಡ್-19 ವೈರಸ್ ದೊಡ್ಡ ಪ್ರಮಾಣದಲ್ಲಿ ಸಾವು ನೋವು ಸೃಷ್ಟಿಸಿದೆ. ಹೀಗಾಗಿ ಇದೀಗ ದೇಶದಲ್ಲಿ ಅಂತ್ಯ ಸಂಸ್ಕಾರದ ಕಾರ್ಯಕ್ರಮಗಳಿಗೂ ಕಠಿಣ ನಿರ್ಬಂಧಗಳನ್ನು ಹೇರಲಾಗಿದೆ. ಸರ್ಕಾರದ ನಿಯಮದ ಪ್ರಕಾರ, ಅಂತ್ಯ ಸಂಸ್ಕಾರದಲ್ಲಿ ಮೂರಕ್ಕಿಂತ ಹೆಚ್ಚು ಮಂದಿ ಪಾಲ್ಗೊಳ್ಳುವಂತಿಲ್ಲ. ಸ್ಪೇನ್‌ನಲ್ಲಿ ಈಗಾಗಲೇ ಕೊರೊನಾ ವೈರಸ್‌ಗೆ ಈಗಾಗಲೇ 7,340 ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ. ಇಟಲಿಯ ನಂತರ ಅತೀ ಹೆಚ್ಚು ಸಾವುನೋವು ಸಂಭವಿಸಿದ್ದು ಇದೇ ದೇಶದಲ್ಲಿ ಅನ್ನೋದು ಗಮನಾರ್ಹ. ಮುಂದಿನ ಎರಡು ವಾರಗಳ ಜನರ ಜನರು ಮನೆಗಳಿಂದ ಹೊರಬರದಂತೆ ದೇಶದಲ್ಲಿ ಕಠಿಣಾತಿಕಠಿಣ ನಿರ್ಬಂಧಗಳನ್ನು ಹೇರಲಾಗಿದೆ.
