ವಾಷಿಂಗ್ಟನ್: ತನ್ನ ಸೇನಾ ನಾಯಕನನ್ನು ಕೊಂದ ಅಮೆರಿಕ ವಿರುದ್ಧ ಇರಾನ್ ತಿರುಗಿಬಿದ್ದಿದೆ. ಈಗಾಗಲೇ ಒಂದು ಡಜನ್ಗೂ ಹೆಚ್ಚು ಮಿಸೈಲ್ಗಳನ್ನು ಇರಾಕ್ನಲ್ಲಿರುವ ಅಮೆರಿಕಾ ಸೇನೆಯ ಗುರಿಯಾಗಿಸಿ ದಾಳಿ ನಡೆಸಿದೆ. ಇರಾಕ್ನಲ್ಲಿರುವ ಅಲ್ ಅಸಾದ್ ಹಾಗೂ ಇಬ್ರಿಲ್ನಲ್ಲಿರುವ ಸೇನಾನೆಲೆಗಳ ಮೇಲೆ ಕ್ಷಿಪಣಿ ದಾಳಿ ನಡೆಸಲಾಗಿದೆ ಎಂದು ಅಮೆರಿಕ ಸೇನೆ ಸ್ಪಷ್ಟಪಡಿಸಿದೆ.
ಬೆಳಗ್ಗೆ ಸುಮಾರು 5.30ರ (ಇಎಸ್ಟಿ) ವೇಳೆಗೆ ಇರಾನ್ ದಾಳಿ ನಡೆಸಿದೆ. ಅಮೆರಿಕಾ ಸೇನಾ ನೆಲೆಗಳಿಂದ ಇನ್ನೂ ಯಾವುದೇ ಪ್ರಾಣಾಪಾಯದ ವರದಿಯಾಗಿಲ್ಲ. ಇದೇ ಕಾರಣದಿಂದ ಗಲ್ಫ್ ರಾಷ್ಟ್ರಗಳಿಗೆ ಅಮೆರಿಕಾದಿಂದ ಹೊರಡುವ ವಿಮಾನಯಾನವನ್ನೂ ಕೂಡಾ ರದ್ದು ಮಾಡಲಾಗಿದೆ ಎಂದು ಮಾಧ್ಯಮವೊಂದು ವರದಿ ಮಾಡಿದೆ. ಜೊತೆಗೆ ಇರಾನ್, ಇರಾಕ್ ಹಾಘೂ ಗಲ್ಫ್ ರಾಷ್ಟ್ರಗಳಿಂದ ಅಮೆರಿಕಾಗೆ ಬರುವ ವಿಮಾನಗಳಿಗೂ ಕೂಡಾ ನಿರ್ಬಂಧ ಹೇರಲಾಗಿದೆ.
ಇದಕ್ಕೆ ಪ್ರತಿಕ್ರಿಸಿರುವ ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನ್ಯಾಷನಲ್ ಸೆಕ್ಯುರಿಟಿ ಟೀಮ್ನೊಂದಿಗೆ ದಾಳಿಯ ವಿಚಾರವನ್ನು ಚರ್ಚಿಸಿದ್ದಾರೆ ಹಾಗೂ ಮುಂದಿನ ಕ್ರಮಗಳ ಬಗ್ಗೆ ಯೋಜನೆ ರೂಪಿಸಿದ್ದಾರೆ. ''ನಮಗೆ ಇರಾನ್ ನಡೆಸಿರುವ ದಾಳಿಯ ಬಗ್ಗೆ ಅರಿವಿದೆ. ಅಧ್ಯಕ್ಷರು ಇರಾಕ್ನಲ್ಲಿರುವ ಅಮೆರಿಕಾ ಸೇನೆಯ ಮುಂದಿನ ಕಾರ್ಯತಂತ್ರದ ಬಗ್ಗೆ ಯೋಚನೆ ನಡೆಸುತ್ತಿದ್ದಾರೆ'' ಎಂದು ಶ್ವೇತಭವನದ ಮಾಧ್ಯಮ ಕಾರ್ಯದರ್ಶಿ ಸ್ಟೇಪಾನಿ ಗ್ರಿಶಮ್ ಸ್ಪಷ್ಟಪಡಿದ್ದಾರೆ. ಕೆಲವೊಂದು ಪಾಶ್ಚಾತ್ಯ ಮಾಧ್ಯಮಗಳ ಪ್ರಕಾರ ಸುಮಾರು 35 ರಾಕೆಟ್ಗಳನ್ನು ಇರಾಕ್ನ ಅಮೆರಿಕಾ ನೆಲೆಗಳನ್ನು ಗುರಿಯಾಗಿಸಿ ನಡೆಸಲಾಗಿದೆ.
ಇರಾನ್ ಪ್ರತಿದಾಳಿಯ ಎಚ್ಚರಿಕೆ ಬೆನ್ನಲ್ಲೇ ಅಮೆರಿಕಾ ಶ್ವೇತಭವನಕ್ಕೆ ಬಿಗಿ ಭದ್ರತೆ ಒದಗಿಸಲಾಗಿದೆ. ಶ್ವೇತಭವನದ ಸುತ್ತಮುತ್ತ ಕಟ್ಟೆಚ್ಚರ ವಹಿಸಿರುವ ಪೊಲೀಸರು ಚೆಕ್ ಪಾಯಿಂಟ್ಗಳನ್ನು ನಿರ್ಮಿಸಿ ಅನುಮಾನಾಸ್ಪದ ವಾಹನಗಳನ್ನು ತೀವ್ರ ತಪಾಸಣೆ ನಡೆಸುತ್ತಿದ್ದಾರೆ.
