ನವದೆಹಲಿ: ಭಯೋತ್ಪಾದಕರು ಭಾರತದೊಳಗೆ ನುಸುಳಲು ಬಳಸುತ್ತಿದ್ದರು ಎನ್ನಲಾದ ಸುರಂಗದಲ್ಲಿ ಭಾರತೀಯ ಸೇನೆ ಸುಮಾರು 200 ಮೀಟರ್ಗಳಷ್ಟು ದೂರ ಕ್ರಮಿಸಿದೆ ಎಂದು ಸರ್ಕಾರದ ಉನ್ನತ ಮೂಲಗಳು ಮಾಹಿತಿ ನೀಡಿವೆ.
ನವೆಂಬರ್ 22ರಂದು ಜಮ್ಮು ಕಾಶ್ಮೀರದ ಸಾಂಬಾ ಸೆಕ್ಟರ್ನ ಅಂತಾರಾಷ್ಟ್ರೀಯ ಗಡಿಯಲ್ಲಿ ಸುರಂಗ ಮಾರ್ಗವೊಂದನ್ನು ಭಾರತೀಯ ಸೇನೆ ಪತ್ತೆ ಹಚ್ಚಿತ್ತು. ಈ ಸುರಂಗದ ಒಳಗೆ ತೆರಳಿರುವ ಸೇನೆ ಈಗ ಪಾಕಿಸ್ತಾನದ ಕಡೆಗೆ 200 ಮೀಟರ್ ಚಲಿಸಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ನವೆಂಬರ್ನ ಮೂರನೇ ವಾರದಲ್ಲಿ ಕೆಲವು ಭಯೋತ್ಪಾದಕರನ್ನು ಕೊಂದ ಸೇನೆ ಕೆಲವು ಮೊಬೈಲ್ಗಳನ್ನು ಜಪ್ತಿ ಮಾಡಿತ್ತು. ಈ ಮೊಬೈಲ್ಗಳನ್ನು ಪರಿಶೀಲನೆ ನಡೆಸಿದ ವೇಳೆ ಸುರಂಗದ ಬಗ್ಗೆ ಕೆಲವು ಮಾಹಿತಿ ಸಿಕ್ಕಿತ್ತು. ಬಿಎಸ್ಎಫ್ ಹಾಗೂ ಜಮ್ಮು ಕಾಶ್ಮೀರ ಪೊಲೀಸರ ಜಂಟಿ ಕಾರ್ಯಾಚರಣೆಯಲ್ಲಿ ಸುರಂಗವನ್ನು ಪತ್ತೆಹಚ್ಚಲಾಗಿತ್ತು.
ಇದನ್ನೂ ಓದಿ: ಉಗ್ರರ ಕಳ್ಳ ಮಾರ್ಗ: ಗಡಿರೇಖೆ ಬಳಿ ರಹಸ್ಯ ಸುರಂಗ ಪತ್ತೆ ಹಚ್ಚಿದ ಭಾರತೀಯ ಸೇನೆ
ಬಿಎಸ್ಎಫ್ ಸಂಸ್ಥಾಪನಾ ದಿನದ ಅಂಗವಾಗಿ ಮಾತನಾಡಿದ ಬಿಎಸ್ಎಫ್ ಡಿಜಿ ರಾಕೇಶ್ ಆಸ್ಥಾನಾ ಈ ಮಾಹಿತಿ ನೀಡಿದ್ದು, ಕಾರ್ಯಾಚರಣೆ ಯಾವ ಹಂತದಲ್ಲಿದೆ ಎಂಬ ಬಗ್ಗೆ ಮಾಹಿತಿ ನೀಡಲು ನಿರಾಕರಿಸಿದ್ದಾರೆ.
ಈ ಸುರಂಗ ಯಾವುದಾದರೂ ಹೆದ್ದಾರಿಗೆ ಸಂಪರ್ಕಿಸುವ ಗುಮಾನಿಯಿದೆ ಎಂದು ಬಿಎಸ್ಎಫ್ ಜಮ್ಮು ಫ್ರಾಂಟಿಯರ್ನ ಇನ್ಸ್ಪೆಕ್ಟರ್ ಜನರಲ್ ಎನ್.ಎಸ್.ಜಮ್ವಾಲ್ ಸಂಶಯ ವ್ಯಕ್ತಪಡಿಸಿದ್ದು, ಸುರಂಗದ ಕೊನೆಯ ಭಾಗ ಪೊದೆಗಳಿಂದ ಕೂಡಿದ್ದು, ಮರಗಳು ಹಾಗೂ ಮಣ್ಣಿನ ಮೂಟೆಗಳಿಂದ ಮುಚ್ಚಲ್ಪಟ್ಟಿತ್ತು. ಈ ಮಣ್ಣಿನ ಮೂಟೆಗಳು ಪಾಕಿಸ್ತಾನದ ಕರಾಚಿಯಿಂದ ತರಲಾಗಿದೆ ಎಂದು ಹೇಳಿದ್ದಾರೆ.
ಇದರ ಜೊತೆಗೆ ಸುರಂಗ ಮಾರ್ಗ ಹೊಸದಾಗಿ ತೋಡಿದ್ದು, ಸುರಂಗ ನಿರ್ಮಿಸಲು ಎಂಜಿನಿಯರ್ಗಳೂ ಸಾಥ್ ನೀಡಿದ್ದಾರೆ ಎಂಬುದು ಗೊತ್ತಾಗುತ್ತದೆ ಎಂದು ಎನ್.ಎಸ್. ಜಮ್ವಾಲ್ ಆತಂಕಕಾರಿ ಮಾಹಿತಿ ನೀಡಿದ್ದಾರೆ.
