ನವದೆಹಲಿ: ಮುಂದಿನ ತಿಂಗಳು ರಷ್ಯಾದಲ್ಲಿ ನಡೆಯಲಿರುವ ಕವ್ಕಾಜ್ -2020 (ಕಾಕಸಸ್ 2020) ಬಹುರಾಷ್ಟ್ರಗಳ ಸೇನಾ ತಾಲೀಮಿನಲ್ಲಿ ಭಾರತದ ಸುಮಾರು 200 ಸಿಬ್ಬಂದಿಯ ಮೂರು ಸೇನಾ ತುಕಡಿ ಭಾಗವಹಿಸಲಿವೆ ಎಂದು ಭಾರತೀಯ ಸೇನಾ ಮೂಲಗಳು ತಿಳಿಸಿವೆ.
ಭಾರತ, ಚೀನಾ, ಪಾಕಿಸ್ತಾನ, ರಷ್ಯಾ, ಕಝಕಿಸ್ತಾನ್, ಕಿರ್ಗಿಸ್ತಾನ್, ತಜಿಕಿಸ್ತಾನ್ ಮತ್ತು ಉಜ್ಬೇಕಿಸ್ತಾನ್ ಒಳಗೊಂಡ ಶಾಂಘೈ ಸಹಕಾರ ಸಂಸ್ಥೆ (ಎಸ್‌ಸಿಒ) ಸದಸ್ಯರನ್ನು ಹೊರತುಪಡಿಸಿ, ಇತರ 11 ದೇಶಗಳು ಈ ತಾಲೀಮಿನ ಭಾಗವಾಗಲಿವೆ. ಮಂಗೋಲಿಯಾ, ಸಿರಿಯಾ, ಇರಾನ್, ಈಜಿಪ್ಟ್, ಬೆಲಾರಸ್, ಟರ್ಕಿ, ಅರ್ಮೇನಿಯಾ, ಅಬ್ಖಾಜಿಯಾ, ದಕ್ಷಿಣ ಒಸ್ಸೆಟಿಯಾ, ಅಜೆರ್ಬೈಜಾನ್ ಮತ್ತು ತುರ್ಕಮೆನಿಸ್ತಾನ್ ಪಾಲ್ಗೊಳ್ಳಲಿವೆ.
ಇತರ ದೇಶಗಳ ಜೊತೆಗೆ ಚೀನಾ ಮತ್ತು ಪಾಕಿಸ್ತಾನದ ಸೈನಿಕರು ಸಹ ಈ ಕಾರ್ಯಕ್ರಮದಲ್ಲಿ ಭಾಗವಹಿಸುವ ಸಾಧ್ಯತೆಯಿದೆ ಎಂದು ಮೂಲಗಳು ತಿಳಿಸಿವೆ.
ಭಾರತೀಯ ತುಕಡಿಯಲ್ಲಿ ಸೇನೆಯ 160 ಸಿಬ್ಬಂದಿ ಮತ್ತು ಭಾರತೀಯ ವಾಯುಪಡೆಯ 40 ಸೈನಿಕರು ಮತ್ತು ಇಬ್ಬರು ನೌಕಾಪಡೆಯ ಅಧಿಕಾರಿಗಳು ಭಾಗವಹಿಸಲಿದ್ದಾರೆ.
ದಕ್ಷಿಣ ರಷ್ಯಾದ ಅಸ್ಟ್ರಾಖಾನ್ ಪ್ರಾಂತ್ಯದಲ್ಲಿ ಸೇನಾ ತಾಲೀಮು ನಡೆಸಲಾಗುತ್ತಿದ್ದು, ಅಲ್ಲಿ ಶಾಂಘೈ ಸಹಕಾರ ಸಂಸ್ಥೆ ಮತ್ತು ಮಧ್ಯ ಏಷ್ಯಾದ ಸದಸ್ಯ ರಾಷ್ಟ್ರಗಳು ಭಾಗವಹಿಸಲಿವೆ. ಭಾರತವು ಈ ಹಿಂದೆ ಚೀನಾ ಮತ್ತು ಪಾಕಿಸ್ತಾನಗಳೊಂದಿಗೆ ಭಾಗವಹಿಸಿತ್ತು.
ಮುಂದಿನ ತಿಂಗಳು ನಡೆಯಲಿರುವ ಈ ಸೇನಾ ತಾಲೀಮು ಆತಿಥ್ಯವನ್ನು ರಷ್ಯಾ ವಹಿಸಿದ್ದು, 19 ರಾಷ್ಟ್ರಗಳ ಸೇನಾ ತುಕುಡಿಗಳು ಇದರಲ್ಲಿ ಭಾಗವಹಿಸಲಿವೆ. ಅಲ್ಲಿ 12,500ಕ್ಕೂ ಹೆಚ್ಚು ಸೈನಿಕರು ಸೇರಲಿದ್ದಾರೆ.
