ನೀವೇನಾದ್ರೂ ವಿಕ್ರಮ್ ಲ್ಯಾಂಡರ್​ ನೋಡಿದ್ರಾ? ನಾಸಾ ಗಗನಯಾತ್ರಿಯನ್ನು ಪ್ರಶ್ನಿಸಿದ ಹಾಲಿವುಡ್​ ನಟ

ಅಂತಾರಾಷ್ಟ್ರೀಯ ಬಾಹ್ಯಾಕಾಶ ಕೇಂದ್ರದಲ್ಲಿರುವ ನಾಸಾ ಗಗನಯಾತ್ರಿ ನಿಕ್​ ಹೇಗ್​ ಅವರೊಂದಿಗೆ ಹಾಲಿವುಡ್​ ನಟ ಬ್ರಾಡ್​ ಪಿಟ್​ ಅವರು ದೂರವಾಣಿ ಮೂಲಕ ಸಂಭಾಷಣೆ ನಡೆಸಿದ್ದು, ಭಾರತದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ಇಸ್ರೋ ಕಳುಹಿಸಿದ್ದ ವಿಕ್ರಮ ಲ್ಯಾಂಡರ್​ ಕುರಿತು ವಿಚಾರಿಸಿಕೊಂಡಿದ್ದಾರೆ.

ನವದೆಹಲಿ: ಹಾಲಿವುಡ್​ ನಟ ಬ್ರಾಡ್​ ಪಿಟ್​ ಇಸ್ರೋ ಚಂದ್ರನ ಅಂಗಳಕ್ಕೆ ಕಳುಹಿಸಿದ್ದ ವಿಕ್ರಂ ಲ್ಯಾಂಡರ್​ ಕುರಿತು ನಾಸಾ ವಿಜ್ಞಾನಿಗಳ ಬಳಿ ವಿಚಾರಿಸಿದ್ದಾರೆ.

ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಲ್ಲಿರುವ ಗಗನಯಾತ್ರಿ ನಿಕ್​ ಹೇಗ್​ ಅವರೊಂದಿಗೆ 20 ನಿಮಿಷಗಳ ಕಾಲ ಟೆಲಿಫೋನ್​ ಮೂಲಕ ಸಂಭಾಷಣೆ ನಡೆಸಿದ್ದಾರೆ.

ಈ ಮಧ್ಯದಲ್ಲಿ ಇಸ್ರೋ ಕಳುಹಿಸಿದ್ದ ವಿಕ್ರಂ ಲ್ಯಾಂಡರ್​ ಅನ್ನು ನೀವೇನಾದ್ರೂ ನೋಡಿದ್ರಾ ಎಂದು ಕೂಡ ಪ್ರಶ್ನಿಸಿದ್ದಾರೆ.

ಇದಕ್ಕೆ ಪ್ರತಿಕ್ರಿಯಿಸಿದ ನಿಕ್​ ಅವರು ಚಂದ್ರನ ದಕ್ಷಿಣ ಧೃವದಲ್ಲಿ ಲ್ಯಾಂಡರ್​ ಇಳಿಸುವ ಪ್ರಯತ್ನ ಬಹಳ ಕಠಿಣವಾದದ್ದು, ಇಂತಹ ಕಾರ್ಯ ಕೈಗೊಂಡ ಇಸ್ರೋ ಸಂಸ್ಥೆಯ ಧೈರ್ಯ ಮೆಚ್ಚುವಂತದ್ದು. ಭೂಮಿಯ ಮೇಲಿರುವ ನಾಸಾ ಕೇಂದ್ರವು ವಿಕ್ರಂ ಲ್ಯಾಂಡರ್ ಹುಡುಕಿ ಅದರೊಟ್ಟಿಗೆ ಸಂಪರ್ಕ ಸಾಧಿಸಲು ನೆರವು ನೀಡುತ್ತಿದೆ ಎಂದು ಗಗನಯಾತ್ರಿ ಹೇಳಿದರು.

ನೀವಿರುವ ಜಾಗದಿಂದ ಏನಾದ್ರೂ ಲ್ಯಾಂಡರ್​ ಕಾಣುತ್ತಿದೆಯೇ ಎಂದು ಪಿಟ್​, ಗಗನ ಯಾತ್ರಿಗೆ ಮರು ಪ್ರಶ್ನೆ ಹಾಕಿದಾಗ ಅವರು ದುರಾದೃಷ್ಟವಶಾತ್​ ಇಲ್ಲ ಎಂದು ಅವರು ಪ್ರತಿಕ್ರಿಯೆ ನೀಡಿದ್ದಾರೆ.