ಪಾಟ್ನಾ: ಭಾರಿ ಮಳೆಯಿಂದ ಬಿಹಾರ ತತ್ತರಿಸಿಹೋಗಿದ್ದು, ಸಾವಿರಾರು ಜನರು ಮನೆ ಮಠ ಕಳೆದುಕೊಂಡು ಬೀದಿಗೆ ಬಿದ್ದಿದ್ದಾರೆ. ಆದ್ರೆ ಯುವತಿಯೋಬ್ಬಳು ಪ್ರವಾಹದಲ್ಲಿ ಫೋಟೋಶೂಟ್ ಮಾಡಿಸಿ ಸುದ್ದಿಯಾಗಿದ್ದಾಳೆ.
ಎನ್‌ಐಎಫ್‌ಟಿ (ನ್ಯಾಷನಲ್ ಇನ್ಸ್ಟಿಟ್ಯೂಟ್ ಆಫ್ ಫ್ಯಾಷನ್ ಟೆಕ್ನಾಲಜಿ) ವಿದ್ಯಾರ್ಥಿನಿ ಅದಿತಿ ಸಿಂಗ್ ಎಂಬುವವರು ಜಲಾವೃತ ಪ್ರದೇಶಗಳಲ್ಲಿ ಫೋಟೋ ಶೂಟ್ ಮಾಡಿಸಿದ್ದು, ಈ ಫೋಟೋಗಳು ಸೋಷಿಯಲ್ ಮೀಡಿಯಾದಲ್ಲಿ ಬಹಳ ವೈರಲ್ ಆಗುತ್ತಿವೆ.
ಕೆಲವರಿಂದ ಮೆಚ್ಚುಗೆ, ಕೆಲವರಿಂದ ಟ್ರೋಲ್:
ಒಂದೆಡೆ ಭಾರಿ ಪ್ರವಾಹದಿಂದ ಅನೇಕ ಜಿಲ್ಲೆಯ ಜನ ಪರದಾಡುವ ಸ್ಥಿತಿಯಲ್ಲಿದ್ದರೆ ಇಂತಾ ಸಮಯದಲ್ಲಿ ಫೋಟೋ ಶೂಟ್ ಮಾಡಿಸಿರುವುದಕ್ಕೆ ಕೆಲವರು ಜಾಲತಾಣದಲ್ಲಿ ವಿದ್ಯಾರ್ಥಿನಿಯನ್ನ ನಿಂದಿಸುತ್ತಿದ್ದಾರೆ. ಆದ್ರೆ ಕೆಲ ಫ್ಯಾಷನ್ ಪ್ರಿಯರು ಈ ಫೋಟೋಶೂಟ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಅದಿತಿ ಸಿಂಗ್ ಪಾಟ್ನಾ ಎನ್‌ಐಎಫ್‌ಟಿಯಲ್ಲಿ ಪ್ರಥಮ ವರ್ಷದ ವಿದ್ಯಾರ್ಥಿನಿಯಾಗಿದ್ದು, ಸೌರಭ್ ಅನುರಾಜ್ ಎಂಬುವವರು ಈ ಫೋಟೋಗಳನ್ನ ಕ್ಲಿಕ್ಕಿಸಿದ್ದಾರೆ. ಪಾಟ್ನಾದ ಬೋರಿಂಗ್ ರಸ್ತೆ, ನಾಗೇಶ್ವರ ಕಾಲೋನಿ ಮತ್ತು ಎಸ್.ಕೆ.ಪುರಿ ಪ್ರದೇಶದಲ್ಲಿ ಈ ಫೋಟೋಗಳನ್ನ ತೆಗೆಯಲಾಗಿದೆ. ಪಾಟ್ನಾದ ಪ್ರತಿಯೊಂದು ಪ್ರದೇಶದಲ್ಲೂ ಪ್ರವಾಹ ಪರಿಸ್ಥಿತಿ ಇದೆ ಎಂಬುದನ್ನ ತೋರಿಸಲು ಫೋಟೋಶೂಟ್ ಮೂಲಕ ಪ್ರಯತ್ನಿಸಲಾಗಿದೆ ಎಂದು ತಿಳಿಸಿದ್ದಾರೆ.
