ಗುಜರಾತ್​ ಮಾಜಿ ಸಿಎಂ, ಬಿಹಾರ ಸಚಿವನಿಗೆ ಕೊರೊನಾ

ಕಳೆದ ಮೂರ್ನಾಲ್ಕು ದಿನಗಳಿಂದ ಜ್ವರದಿಂದ ಬಳಲುತ್ತಿದ್ದ ಗುಜರಾತ್​ನ​ ಮಾಜಿ ಮುಖ್ಯಮಂತ್ರಿ ಶಂಕರ್​ ಸಿಂಗ್​ ವಘೇಲಾ ಅವರಿಗೆ ಕೊರೊನಾ ಸೋಂಕು ದೃಢವಾಗಿದೆ.

ಅಹಮದಾಬಾದ್​: ಗುಜರಾತ್​ನ​ ಮಾಜಿ ಮುಖ್ಯಮಂತ್ರಿ ಶಂಕರ್​ ಸಿಂಗ್​ ವಘೇಲಾ ಅವರಿಗೆ ಕೊರೊನಾ ಸೋಂಕು ತಗುಲಿದೆ ಎಂದು ಅವರ ಆಪ್ತ ಸಹಾಯಕರೊಬ್ಬರು ತಿಳಿಸಿದ್ದಾರೆ.

ಕಳೆದ ಮೂರ್ನಾಲ್ಕು ದಿನಗಳಿಂದ ಜ್ವರದಿಂದ ಬಳಲುತ್ತಿದ್ದ 79 ವರ್ಷದ ಶಂಕರ್​ ಸಿಂಗ್, ವೈದ್ಯರ ಸಲಹೆಯ ಮೇರೆಗೆ ಗುಜರಾತ್​ನಲ್ಲಿರುವ ತಮ್ಮ ನಿವಾಸದಲ್ಲಿ ಕ್ವಾರಂಟೈನ್​ನಲ್ಲಿದ್ದರು. ಶನಿವಾರ ವಘೇಲಾರ ಕೋವಿಡ್​ ಪರೀಕ್ಷಾ ವರದಿ ಪಾಸಿಟಿವ್​ ಬಂದಿದ್ದು, ಇಂದು ಅವರನ್ನು ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ವಘೇಲಾ ಅವರು, 1996ರ ಅಕ್ಟೋಬರ್‌ನಿಂದ 1997ರ ಅಕ್ಟೋಬರ್‌ವರೆಗೆ ಗುಜರಾತ್ ಮುಖ್ಯಮಂತ್ರಿಯಾಗಿ ಸೇವೆ ಸಲ್ಲಿಸಿದ್ದಾರೆ. ಬಿಜೆಪಿ ಪಕ್ಷದ ಮೂಲಕ ರಾಜಕೀಯ ಜೀವನಕ್ಕೆ ಕಾಲಿಟ್ಟ ಅವರು, ಬಳಿಕ ಕಾಂಗ್ರೆಸ್​ಗೆ ಸೇರ್ಪಡೆಯಾಗಿದ್ದರು. ಪ್ರಸ್ತುತ ನ್ಯಾಷನಲಿಸ್ಟ್ ಕಾಂಗ್ರೆಸ್ ಪಕ್ಷ (NCP)ದಲ್ಲಿದ್ದಾರೆ.

ಬಿಹಾರ ಸಚಿವನಿಗೆ ಸೋಂಕು:

ಬಿಹಾರದ ಸಚಿವರೊಬ್ಬರಿಗೆ ಕೋವಿಡ್​ ಪಾಸಿಟಿವ್​ ಬಂದಿದ್ದು, ಸದ್ಯ ಅವರು ಕತಿಹಾರ್​ನಲ್ಲಿ ಕ್ವಾರಂಟೈನ್​ನಲ್ಲಿದ್ದಾರೆ. ಎರಡು ದಿನಗಳ ಹಿಂದೆ ರಾಜ್ಯ ಸಚಿವಾಲಯದಲ್ಲಿ ನಡೆದಿದ್ದ ಸಭೆಯಲ್ಲಿ ಇವರು ಪಾಲ್ಗೊಂಡಿದ್ದರು.