ಕೋಯಿಕ್ಕೋಡ್(ಕೇರಳ): ಕೋವಿಡ್-19 ಸಾಂಕ್ರಾಮಿಕ ರೋಗದ ಹಿನ್ನೆಲೆಯಲ್ಲಿ ಕೇರಳದ ಸಾಂಪ್ರದಾಯಿಕ ಸುಗ್ಗಿ ಹಬ್ಬ ಓಣಂ ಸಂಭ್ರಮ ಕಳೆಗುಂದಿದೆ. ಆದರೆ ವಿದ್ಯಾರ್ಥಿಗಳು ಮಾತ್ರ ತಮ್ಮ ವಿಶೇಷ ಆವಿಷ್ಕಾರದಿಂದ ಓಣಂ ಆಚರಣೆಯನ್ನು ಭರ್ಜರಿಯಾಗಿ ನಡೆಸಿದ್ದಾರೆ.
ಆನ್ಲೈನ್ ಶಿಕ್ಷಣ ಕೇವಲ ಓದಿಗಾಗಿ ಮಾತ್ರ ಬಳಕೆ ಮಾಡದೆ ಹಬ್ಬ ಆಚರಣೆಯಲ್ಲೂ ಬಳಕೆ ಮಾಡಿಕೊಂಡಿರುವುದು ವಿಶೇಷ. ಈ ವಿಚಾರದ ಕುರಿತು ಶಿಕ್ಷಕರು ಮತ್ತು ವಿದ್ಯಾರ್ಥಿಗಳು ಚರ್ಚೆ ನಡೆಸಿ, ಸಮನ್ವಯತೆಯಿಂದ ಹಬ್ಬ ಆಚರಿಸಲು ಮುಂದಾಗಿದ್ದಾರೆ. ಇನ್ನು ಈ ವೇಳೆ ಪೌರಾಣಿಕ ಅಸುರರಾಜನಾದ ಮಹಾಬಲಿ ಮತ್ತು ವಿಷ್ಣು ಅವತಾರವಾಗಿರುವ ವಾಮನನ ವೇಷವನ್ನು ವಿದ್ಯಾರ್ಥಿಗಳು ತೊಟ್ಟಿದ್ದರು. ವಿಶೇಷ ಸಾಂಸ್ಕೃತಿಕ ಕಾರ್ಯಕ್ರಮಗಳು, ನೃತ್ಯ, ಹಾಡು, ಅಡುಗೆ ಸ್ಪರ್ಧೆ, ಚರ್ಚಾ ಸ್ಪರ್ಧೆ ಹೀಗೆ ಅನೇಕ ಕಾರ್ಯಕ್ರಮಗಳು ವಿದ್ಯಾರ್ಥಿಗಳು ಹಾಗೂ ಶಿಕ್ಷಕರ ಸಮ್ಮುಖದಲ್ಲಿ ಆನ್ಲೈನ್ ಮೂಲಕ ಪ್ರದರ್ಶನಗೊಂಡವು.
ತಿರುವತಿರಕ್ಕಲಿ (ಸಾಂಪ್ರದಾಯಿಕ ಗುಂಪು ನೃತ್ಯ ಪ್ರಕಾರ), ಒನಪ್ಪಟ್ಟು (ಓಣಂನಲ್ಲಿ ಜಾನಪದ ಮತ್ತು ಲಘು ಹಾಡುಗಳು) ಹಾಗೂ ಗ್ರಾಮೀಣ ಆಟಗಳನ್ನು ಆಡಿದರು. ಇನ್ನು ಮಕ್ಕಳ ಈ ಕಾರ್ಯಕ್ಕೆ ಪೋಷಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಪ್ರತಿ ವಿದ್ಯಾರ್ಥಿಯು ಒನಸಾಧ್ಯಾ(ಹಬ್ಬ)ಗಾಗಿ ರಂಗೋಲಿ ಮತ್ತು ವಿಶೇಷ ಖಾದ್ಯವನ್ನು ಸಿದ್ಧಪಡಿಸಿದರು. ಓಣಂ ನೆನಪುಗಳ ಮೇಲೆ ಜಲವರ್ಣ, ತಮ್ಮ ಮನೆಯ ಆವರಣದಿಂದ ತಂದ ಹೂವುಗಳಲ್ಲಿ ಪೂಕ್ಕಲಂ ಸ್ಪರ್ಧೆಗಳನ್ನು ಏರ್ಪಡಿಸಲಾಗಿತ್ತು.
ಕೊರೊನಾ ಭಯವಿಲ್ಲದೆ ಎಲ್ಲರೂ ಒಟ್ಟಿಗೆ ಕುಳಿತು ಹಬ್ಬವನ್ನು ಆನಂದಿಸಬಹುದಾದ ಉತ್ತಮ ದಿನಕ್ಕಾಗಿ ಇಂದು ಅಂತರದಿಂದ ಹಬ್ಬ ಆಚರಣೆ ಮಾಡುವುದು ಅಗತ್ಯವಾಗಿದೆ. ಈ ಸಮಯದಲ್ಲಿ ಓಣಂ ಹಬ್ಬವನ್ನು ಆನ್ಲೈನ್ ಮೂಲಕ ಆಚರಣೆ ಮಾಡಿ ಸಂಭ್ರಮಪಟ್ಟ ವಿದ್ಯಾರ್ಥಿಗಳು ಹಾಗೂ ಶಿಕ್ಷಕರ ಕಾರ್ಯಕ್ಕೆ ಎಲ್ಲೆಡೆ ಶ್ಲಾಘನೆ ವ್ಯಕ್ತವಾಗಿದೆ.
