ಲಂಡನ್ (ಯುಕೆ): ಜಗತ್ತಿನ ಎಲ್ಲ ರಾಷ್ಟ್ರಗಳು ಕೋವಿಡ್-19 ತಡೆಯಲು ಹರಸಾಹಸ ಪಡುತ್ತಿರುವ ಬೆನ್ನಲ್ಲೇ ಕೋವಿಡ್ ಹರಡುವಿಕೆಯ ತೀವ್ರತೆಯ ಕುರಿತಾಗಿ ಬೆಚ್ಚಿ ಬೀಳಿಸುವ ವರದಿಯೊಂದು ಬಂದಿದೆ. ಆಸ್ಪತ್ರೆಯ ವಾರ್ಡ್ ಒಂದರ ನೆಲದ ಮೇಲೆ ಬಿದ್ದ ಒಂದು ಹನಿ ಕೋವಿಡ್ ವೈರಸ್ ಇರುವ ದ್ರವದಿಂದ ಕೇವಲ 10 ತಾಸಿನಲ್ಲಿ ಆ ವಾರ್ಡ್ನ ಅರ್ಧಕ್ಕೂ ಹೆಚ್ಚು ನೆಲ ಕೋವಿಡ್ ಸೋಂಕಿನಿಂದ ಆವೃತವಾಗಬಹುದು ಎಂಬುದು ಅಧ್ಯಯನವೊಂದರಲ್ಲಿ ಬಹಿರಂಗವಾಗಿದೆ.
ಜರ್ನಲ್ ಆಫ್ ಹಾಸ್ಪಿಟಲ್ ಇನ್ಫೆಕ್ಷನ್ ಎಂಬ ವೈಜ್ಞಾನಿಕ ಜರ್ನಲ್ನಲ್ಲಿ ಈ ಕುರಿತಾದ ವರದಿ ಪ್ರಕಟವಾಗಿದ್ದು, ಆಸ್ಪತ್ರೆಯಲ್ಲಿ ಎಷ್ಟು ತೀವ್ರವಾಗಿ ಕೋವಿಡ್ ವೈರಸ್ ಹರಡಬಹುದು ಎಂಬುದನ್ನು ಇದರಲ್ಲಿ ತಿಳಿಸಲಾಗಿದೆ.
ಯುಕೆಯ ಯುನಿವರ್ಸಿಟಿ ಕಾಲೇಜ್ ಹಾಸ್ಪಿಟಲ್ ಮತ್ತು ಗ್ರೇಟ್ ಓರ್ಮಾಂಡ್ ಸ್ಟ್ರೀಟ್ ಹಾಸ್ಪಿಟಲ್ಗಳ ಸಂಶೋಧಕರು ಈ ಅಧ್ಯಯನ ಕೈಗೊಂಡಿದ್ದು, ಆಸ್ಪತ್ರೆಯ ಬೆಡ್ ರೇಲಿಂಗ್ ಮೇಲೆ ಬಿದ್ದ ವೈರಸ್ ಡಿಎನ್ಎ 10 ತಾಸುಗಳಲ್ಲಿ ವಾರ್ಡ್ನ ಅರ್ಧಕ್ಕೂ ಹೆಚ್ಚು ಪ್ರದೇಶಕ್ಕೆ ಹರಡಿರುತ್ತದೆ ಎಂದು ಹೇಳಿದ್ದಾರೆ. ಅಲ್ಲದೆ ಹೀಗೆ ಹರಡಿದ ವೈರಸ್ ಸುಮಾರು ಐದು ದಿನಗಳವರೆಗೆ ಇರಬಹುದಾಗಿದೆ ಎನ್ನುತ್ತಾರೆ ಅವರು.
ಆದರೆ ಇಲ್ಲಿ ಗಮನಿಸಬೇಕಾದ ಸಂಗತಿ ಎಂದರೆ, ಈ ಸಂಶೋಧನೆಯ ಸಮಯದಲ್ಲಿ ನಿಜವಾದ ವೈರಸ್ ಉಪಯೋಗಿಸಿರಲಾಗಿರಲಿಲ್ಲ. ಮಾನವರಿಗೆ ಅಪಾಯವಾಗಬಾರದೆಂಬ ದೃಷ್ಟಿಯಿಂದ ಗಿಡಗಳಿಗೆ ತಗಲುವ SARS-CoV-2 ವೈರಸ್ನ ತದ್ರೂಪಿ ಡಿಎನ್ಎ ಮಾದರಿಯನ್ನು ಈ ಸಂದರ್ಭದಲ್ಲಿ ಬಳಸಲಾಗಿತ್ತು.
"ವಿವಿಧ ಮೇಲ್ಮೈಗಳ ಮೂಲಕ ಕೋವಿಡ್ ವೈರಸ್ ಹರಡುವಿಕೆಯ ಪ್ರಮಾಣ ಎಷ್ಟು ತೀವ್ರವಾಗಿರುತ್ತದೆ ಎಂಬುದನ್ನು ತಿಳಿಯಲು ನಮ್ಮ ಅಧ್ಯಯನ ಸಹಕಾರಿಯಾಗಿದೆ. ಕೈಗಳನ್ನು ಯಾವಾಗಲೂ ಸ್ವಚ್ಛವಾಗಿಟ್ಟುಕೊಳ್ಳುವುದು ಹಾಗೂ ಪರಿಸರವನ್ನು ಶುಚಿಯಾಗಿಟ್ಟುಕೊಳ್ಳುವುದು ಎಷ್ಟು ಮುಖ್ಯ ಎಂಬುದು ಇದರಿಂದ ತಿಳಿದು ಬರುತ್ತದೆ." ಎಂದು ಸಂಶೋಧನೆ ಕೈಗೊಂಡ ಯುನಿವರ್ಸಿಟಿ ಕಾಲೇಜ್ ಹಾಸ್ಪಿಟಲ್ನ ಲೆನಾ ಸಿರಿಕ್ ಹೇಳಿದ್ದಾರೆ.
"ನಾವು ತಯಾರಿಸಿದ ಜೀವಾಣುವನ್ನು ಒಂದು ನಿರ್ದಿಷ್ಟ ಸ್ಥಳದಲ್ಲಿ ಹಾಕಿದ ನಂತರ, ಆಸ್ಪತ್ರೆಯ ಸಿಬ್ಬಂದಿ ಹಾಗೂ ಹೊರಗಿನಿಂದ ಆಗಮಿಸಿದವರು ಅದನ್ನು ಮುಟ್ಟುವುದರಿಂದ ಹಾಗೂ ಕೋವಿಡ್ ಸೋಂಕಿತರಿಂದ ಅದು ಎಲ್ಲೆಡೆ ಪಸರಿಸಲಾರಂಭಿಸಿತು." ಎಂದು ಸಿರಿಕ್ ತಿಳಿಸಿದ್ದಾರೆ.
