ಕೇರಳ: ಕೇರಳ ಪೊಲೀಸರು COVID-19 ವಿರುದ್ಧ ಹೋರಾಡಲು ಜಾಗೃತಿ ವಿಡಿಯೋವೊಂದನ್ನು ತಯಾರಿಸಿದ್ದಾರೆ. ಈ ವೀಡಿಯೊ ಪೊಲೀಸರ ‘ಬ್ರೇಕ್ ದಿ ಚೈನ್’ ಅಭಿಯಾನದ ಭಾಗವಾಗಿದೆ. ಮತ್ತು ಮಾರಕ ಕೊರೊನಾ ವೈರಸ್ ಹರಡುವುದನ್ನು ಹೇಗೆ ಎದುರಿಸುವುದು ಎಂಬ ಸಂದೇಶವನ್ನು ಸಾರುತ್ತದೆ.
ಕೈಯನ್ನು ಸ್ಯಾನಿಟೈಜರ್ನಿಂದ ಶುಚಿಗೊಳಿಸಿಕೊಳ್ಳುವುದು ಮತ್ತು ಫೇಸ್ ಮಾಸ್ಕ್ ಬಳಸುವ ಪ್ರಾಮುಖ್ಯತೆಯನ್ನು ಈ ವೀಡಿಯೊ ವಿವರಿಸುತ್ತದೆ. ಜೊತೆಗೆ ಜನರಿಗೆ ಆತ್ಮಸ್ಥೈರ್ಯದಿಂದ ಮಹಾಮಾರಿ ವೈರಸ್ ವಿರುದ್ಧ ಹೋರಾಡುವ ಧೈರ್ಯ ನೀಡುತ್ತದೆ.
ಪೃಥ್ವಿರಾಜ್ ನಿರ್ದೇಶನದ, ಮೋಹನ್ ಲಾಲ್ ಅಭಿನಯದ 'ಲೂಸಿಫರ್' ಚಿತ್ರದ 'ಕಡವುಲೈ ಧ್ರುವ' ಹಾಡನ್ನು ಈ ಜಾಗೃತಿ ವಿಡಿಯೋದ ಹಿನ್ನಲೆ ಗಾಯನವನ್ನಾಗಿ ಬಳಸಿಕೊಂಡಿರುವ ಕೇರಳ ಪೊಲೀಸರು, ತಮ್ಮ ಅಧಿಕೃತ ಫೇಸ್ಬುಕ್ ಪುಟದ ಮೂಲಕ ಅಪ್‌ಲೋಡ್ ಮಾಡಿದ್ದಾರೆ. ವಿಡಿಯೋದಲ್ಲಿ, ಕೊರೊನಾ ವೈರಸ್ ನಿಮ್ಮ ಮೇಲೆ ದಾಳಿ ನಡೆಸಿದ್ದರೆ ಸಾಂಕ್ರಾಮಿಕ ರೋಗದ ವಿರುದ್ಧ ಹೋರಾಡುವ ನಿಮ್ಮ ಪ್ರಯತ್ನಕ್ಕೆ ಕೇರಳ ಪೊಲೀಸರು ಮತ್ತು ಆರೋಗ್ಯ ಕಾರ್ಯಕರ್ತರು ಸಹಸಹಕರಿಸುತ್ತಾರೆ. ಹೆದರದೇ ಹೋರಾಡಿ ನಾವು ನಿಮ್ಮೊಂದಿಗಿದ್ದೇವೆ ಎಂಬ ಸಂದೇಶ ನೀಡಿದ್ದಾರೆ.
ಇನ್ನೂ ಈ ಜಾಗೃತಿ ವೀಡಿಯೋವನ್ನು ಕೊರೊನಾದ ವಿರುದ್ಧ ಧೈರ್ಯದಿಂದ ಹೋರಾಡುವ ಆರೋಗ್ಯ ಇಲಾಖೆ ಅಧಿಕಾರಿಗಳು, ಸ್ವಯಂಸೇವಕರು, ಸಹೋದ್ಯೋಗಿಗಳು, ಮಾಧ್ಯಮಗಳು ಮತ್ತು ಸಾರ್ವಜನಿಕರಿಗೆ ಸಮರ್ಪಿಸಲಾಗಿದೆ. ಈ ವೀಡಿಯೋದ ಕಲ್ಪನೆಯ ಹಿಂದಿನ ಕಣ್ಣಿರುವುದು ಐಪಿಎಸ್ ಮನೋಜ್ ಅಬ್ರಹಾಂ ಅವರದ್ದು. ಕೋವಿಡ್-19 ಹರಡುವಿಕೆಯನ್ನು ತಡೆಯುವ ತಡೆಗಟ್ಟುವ ಕ್ರಮಗಳ ಬಗ್ಗೆ ಜಾಗೃತಿ ಮೂಡಿಸಲು ಪೊಲೀಸ್ ಇಲಾಖೆ ಮಾಡಿರುವ ಈ ಪ್ರಯತ್ನವನ್ನು ಸಾಮಾಜಿಕ ಮಾಧ್ಯಮ ಬಳಕೆದಾರರು ಶ್ಲಾಘಿಸಿದ್ದಾರೆ.
