ಮೋತಿಹರಿ: ಮಹಾಮಳೆಗೆ ಬಿಹಾರ ತತ್ತರಿಸಿದ್ದು, ಪ್ರವಾಹಪೀಡಿತ ಮೋತಿಹರಿ ಪ್ರದೇಶದಲ್ಲಿ ಎನ್ಡಿಆರ್ಎಫ್ ರಕ್ಷಣಾ ಕಾರ್ಯಾಚರಣೆ ಬೋಟ್ನಲ್ಲೇ ಮಹಿಳೆಯೊಬ್ಬರು ಹೆಣ್ಣುಮಗುವಿಗೆ ಜನ್ಮ ನೀಡಿದ್ದಾರೆ. ಮಗು ಹಾಗೂ ತಾಯಿಯ ಆರೋಗ್ಯ ಸ್ಥಿರವಾಗಿದೆ ಎನ್ನಲಾಗಿದೆ.
ಮೋತಿಹರಿಯ ಗೋಬ್ರಿ ಎಂಬ ಗ್ರಾಮದ ಸಬೀನಾ ಖತೂನ್ ಎಂಬ 41 ವರ್ಷದ ಮಹಿಳೆಗೆ ತೀವ್ರ ಹೆರಿಗೆ ನೋವು ಕಾಣಿಸಿಕೊಂಡಿದೆ. ಕೂಡಲೇ ಅವರ ಕುಟುಂಬಸ್ಥರು ತುರ್ತು ಚಿಕಿತ್ಸೆಗೆಂದು ಹತ್ತಿರದ ಪ್ರಾಥಾಮಿಕ ಆರೋಗ್ಯ ಕೇಂದ್ರಕ್ಕೆ ಕರೆದೊಯ್ಯಲು ಪ್ರಯತ್ನಿಸಿದ್ದಾರೆ. ಅದೇ ವೇಳೆಗೆ ಅಧೀನ ಸಬ್ ಇನ್ಸ್ಪೆಕ್ಟರ್ ವಿಜಯ್ ಝಾ ನೇತೃತ್ವದ ಎನ್ಡಿಆರ್ಎಫ್ನ ಉಪ ತಂಡ ಪ್ರವಾಹಪೀಡಿತ ಬಜಾರಿಯಾ ಪ್ರದೇಶದಲ್ಲಿ ರಕ್ಷಣಾ ಹಾಗೂ ಪರಿಹಾರ ಕಾರ್ಯದಲ್ಲಿ ತೊಡಗಿತ್ತು. ಆಗೆ ಮಹಿಯೊಬ್ಬರು ತೀವ್ರ ಹೆರಿಗೆ ನೋವಿನಿಂದ ಬಳಲುತ್ತಿದ್ದಾರೆ ಎಂಬ ಮಾಹಿತಿ ಪಡೆದ ಈ ರಕ್ಷಣಾ ತಂಡ, ಕೂಡಲೇ ಸ್ಥಳಕ್ಕೆ ಧಾವಿಸಿದೆ.
ಮಹಿಳೆಯ ಸಂಬಂಧಿಕರು ಹಾಗೂ ಆಶಾ ಕಾರ್ಯಕರ್ತೆಯರ ಸಹಾಯದೊಂದಿಗೆ ಮೋಟರ್ ಬೋಟ್ನಲ್ಲಿ ಸಬೀನಾರನ್ನು ಆಸ್ಪತ್ರೆಗೆ ಕೊಂಡೊಯ್ಯಲು ಎನ್ಡಿಆರ್ಎಫ್ ತಂಡ ತಯಾರಿ ನಡೆಸಿತ್ತು. ತಂಡದಲ್ಲಿ ರಾಣಾ ಪ್ರತಾಪ್ ಯಾದವ್ ಎಂಬ ನರ್ಸ್ ಕೂಡಾ ಇದ್ದ. ಹೀಗೆ ಬೋಟ್ನಲ್ಲಿ ಆಸ್ಪತ್ರೆಗೆ ಕರೆದುಕೊಂಡು ಹೋಗುವಾಗ ಸಬೀನಾರಿಗೆ ಹರಿಗೆ ನೋವು ವಿಪರೀತವಾಗಿದೆ. ಆಗ ಪರಿಸ್ಥಿತಿ ಅರಿತ ಎನ್ಡಿಆರ್ಎಫ್ ತಂಡ ಮಹಿಳೆಗೆ ಬೋಟ್ನಲ್ಲೇ ಹೆರಿಗೆ ಮಾಡಿಸಲು ನಿರ್ಧರಿಸಿದೆ. ಕೊನೆಗೆ ಎಲ್ಲರ ಪ್ರಯತ್ನದಿಂದ ಸಬೀನಾ ಹೆಣ್ಣುಮಗುವಿಗೆ ಜನ್ಮ ನೀಡಿದ್ದಾರೆ. ಬಳಿಕ ತಾಯಿ ಹಾಗೂ ಮಗುವನ್ನು ಬಜಾರಿಯಾದ ಆಸ್ಪತ್ರೆಗೆ ದಾಖಲಿಸಲಾಗಿದೆ.
