ರೂಲ್ಸ್ ಬ್ರೇಕ್ ಮಾಡುವವರೇ ಎಚ್ಚರ...! ಇನ್ಮೇಲೆ ಕೊಯಮತ್ತೂರು ಪೊಲೀಸರಿಗೆ ಮೈಯಲ್ಲಾ ಕಣ್ಣು

ಸಂಚಾರ ನಿಯಮಗಳನ್ನು ಪಾಲಿಸೋರಿಗಿಂತ ಉಲ್ಲಂಘಿಸುವವರೇ ಹೆಚ್ಚು, ಆದ್ರೀಗ ಅದಕ್ಕೆ ವ್ಯತಿರಿಕ್ತ ಎಂಬಂತೆ ಕೊಯಮತ್ತೂರು ಸಂಚಾರ ಪೊಲೀಸ್​​​​ ಸಿಬ್ಬಂದಿಗೆ ದೇಹಕ್ಕೆ ಧರಿಸುವ ಅತ್ಯಾಧುನಿಕ ಕ್ಯಾಮೆರಾಗಳನ್ನು ನೀಡಲಾಗಿದ್ದು, ಇವು ಯಾವುದೇ ಟ್ರಾಫಿಕ್ ಉಲ್ಲಂಘನೆಗಳನ್ನು ಕ್ಷಣ ಮಾತ್ರದಲ್ಲಿ ಸೆರೆ ಹಿಡಿದು ಕಂಟ್ರೋಲ್ ರೂಮ್ ಗೆ ರವಾನಿಸುವಷ್ಟು ಚುರುಕಾಗಿವೆ.

ಕೊಯಮತ್ತೂರು: ಸಂಚಾರ ಉಲ್ಲಂಘನೆ ತಡೆಗಟ್ಟುವ ಮತ್ತು ರಸ್ತೆಯಲ್ಲಿ ಉತ್ತಮ ಕಣ್ಗಾವಲು ಹೊಂದುವ ಉದ್ದೇಶದಿಂದ ಸಂಚಾರ ಪೊಲೀಸ್​ ಸಿಬ್ಬಂದಿಗೆ ದೇಹಕ್ಕೆ ಧರಿಸುವ ಅತ್ಯಾಧುನಿಕ ಕ್ಯಾಮೆರಾಗಳನ್ನು ನೀಡಲಾಗಿದೆ.

ಸಂಚಾರ ಸಿಬ್ಬಂದಿಗೆ ಇಲಾಖೆಯಿಂದ 70 ಕ್ಯಾಮೆರಾಗಳನ್ನು ನೀಡಲಾಗಿದ್ದು, ಈ ಕ್ಯಾಮೆರಾಗಳು ಟ್ರಾಫಿಕ್ ಉಲ್ಲಂಘನೆಯನ್ನು ಮತ್ತು ಅಪರಾಧ ಘಟನೆಗಳನ್ನು ಸೆರೆಹಿಡಿಯುವ ಮೂಲಕ ದೃಶ್ಯಗಳನ್ನು ತಕ್ಷಣವೇ ಕಂಟ್ರೋಲ್ ರೂಮ್ ಗೆ ರವಾನಿಸುತ್ತದೆ.

ಮುಂದಿನ ದಿನಗಳಲ್ಲಿ ಇತರ ಪೊಲೀಸ್​ ಅಧಿಕಾರಿಗಳಿಗೂ ಇದೇ ರೀತಿಯ ಕ್ಯಾಮೆರಾಗಳನ್ನು ನೀಡುವ ಯೋಜನೆಯಿದೆ ಎಂದು ಕೊಯಮತ್ತೂರು ಪೊಲೀಸ್​ ಆಯುಕ್ತ ಸುಮಿತ್ ಸರನ್ ಅಭಿಪ್ರಾಯ ಪಟ್ಟಿದ್ದಾರೆ.