ಗುನಾ: ಆಸ್ಪತ್ರೆಯಲ್ಲಿ ರಸೀದಿ ಪಡೆಯಲು 5 ರೂಪಾಯಿ ಇಲ್ಲದೆ ಚಿಕಿತ್ಸೆಯಿಂದ ವಂಚಿತನಾಗಿ ರೋಗಿ ಮೃತಪಟ್ಟಿರುವ ಘಟನೆ ಮಧ್ಯಪ್ರದೇಶದ ಗುನಾ ಜಿಲ್ಲೆಯಲ್ಲಿ ನಡೆದಿದೆ.
ಗುನಾ ಜಿಲ್ಲೆಯ ಅಶೋಕ್ ನಗರ ಶಂಕರ್ ಕಾಲೋನಿಯ ನಿವಾಸಿ ಸುನಿಲ್ ಧಾಕಡ್ ಮೃತ ವ್ಯಕ್ತಿ. ಸುನಿಲ್, ಕೆಲ ದಿನಗಳಿಂದಲೇ ಅನಾರೋಗ್ಯದಿಂದ ಬಳಲುತ್ತಿದ್ದ. ತೀವ್ರ ಬಡತನದಲ್ಲಿ ಜೀವನ ಸಾಗಿಸುತ್ತಿದ್ದ ಸುನಿಲ್-ಆರತಿ ರಾಜಕ್ ದಂಪತಿಗೆ ಆಸ್ಪತ್ರೆಗೆ ಬರಲು ಬಿಡಿಗಾಸು ಕೂಡ ಕೈಯ್ಯಲ್ಲಿರಲಿಲ್ಲ. ಬುಧವಾರ ಗಂಡನ ಆರೋಗ್ಯ ಪರಿಸ್ಥಿತಿ ಗಂಭೀರವಾದ ಕಾರಣ ಗುನಾ ಕಡೆಗೆ ಬರುತ್ತಿದ್ದ ಯಾವುದೋ ವಾಹನ ಹತ್ತಿಕೊಂಡು ಪತ್ನಿ ಆಸ್ಪತ್ರೆಗೆ ಕರೆದುಕೊಂಡು ಹೊರಟಿದ್ದಾಳೆ. ಆ ವಾಹನ ಇಳಿದ ಬಳಿಕ ಅಲ್ಲಿಂದ 30 ರೂ. ಕೊಟ್ಟು ಆಟೋ ಬಾಡಿಗೆ ಮಾಡಿಕೊಂಡು ನಿನ್ನೆ ಸಂಜೆ 7:30ರ ವೇಳೆಗೆ ಜಿಲ್ಲಾಸ್ಪತ್ರೆ ತಲುಪಿದ್ದಾಳೆ.
ಆದರೆ ಆಸ್ಪತ್ರೆಯಲ್ಲಿ ಚಿಕಿತ್ಸೆಗೆ ದಾಖಲಿಸಲು ರಸೀದಿ ಪಡೆಯಲು 5 ರೂಪಾಯಿ ಇಲ್ಲದೆ ಮಹಿಳೆ ಪರದಾಡಿದ್ದಾಳೆ. ಇದನ್ನು ನೋಡಿಯೂ ಆಸ್ಪತ್ರೆ ಸಿಬ್ಬಂದಿ ಮಾನವೀಯತೆ ಮರೆತು ನಿಂತಿದ್ದರು. ನಿನ್ನೆ ಸಂಜೆಯಿಂದ ಇಂದು ಬೆಳಗ್ಗೆವರೆಗೂ ತನ್ನ ಕುಟುಂಬಸ್ಥರ ಬರುವಿಕೆಗಾಗಿ ಕಾಯುತ್ತಿದ್ದ ಆಕೆ, ಹೇಗೋ 5 ರೂ. ಹೊಂದಿಸಿದ್ದಾಳೆ. ಆದರೆ ರಸೀದಿ ಪಡೆಯಲು ಹೋಗುವಷ್ಟರಲ್ಲಿ ಗಂಡನ ಪ್ರಾಣಪಕ್ಷಿಯೇ ಹಾರಿ ಹೋಗಿದೆ. ಇನ್ನು ದಂಪತಿಗೆ ಎರಡು ವರ್ಷದ ಮಗು ಕೂಡ ಇದ್ದು, ಪತ್ನಿಯ ಆಕ್ರಂದನ ಮುಗಿಲು ಮುಟ್ಟಿದೆ.
