ನವದೆಹಲಿ: ದೇಶದ ವಿವಿಧ ಭಾಗಗಳಲ್ಲಿರುವ ವಲಸೆ ಕಾರ್ಮಿಕರನ್ನು ಹೊತ್ತು ಸಾಗುತ್ತಿರುವ ಶ್ರಮಿಕ್ ರೈಲುಗಳ ನಿಯಮಗಳನ್ನು ಪರಿಷ್ಕರಿಸಲಾಗಿದ್ದು, ಹೆಚ್ಚು ವಲಸೆ ಕಾರ್ಮಿಕರು ತೆರಳುವಂತೆ ಅವಕಾಶ ಕಲ್ಪಿಸಲಾಗಿದೆ.
ದೇಶದಲ್ಲಿ ಸಂಚರಿಸುತ್ತಿರುವ 400ಕ್ಕೂ ಹೆಚ್ಚು ಶ್ರಮಿಕ್ ರೈಲುಗಳಲ್ಲಿ ಇದೀಗ ತಲಾ 1,200 ವಲಸೆ ಕಾರ್ಮಿಕರು ಪ್ರಯಾಣ ಬೆಳೆಸಲು ಸಾಧ್ಯವಿದೆ.
ಸದ್ಯ ದೇಶದಲ್ಲಿ 428 ಶ್ರಮಿಕ್ ರೈಲುಗಳು ಓಡಾಡುತ್ತಿದ್ದು, 127 ರೈಲು ಉತ್ತರಪ್ರದೇಶ, 87 ಬಿಹಾರ, 24 ಮಧ್ಯಪ್ರದೇಶ, 20 ಒಡಿಶಾ, 16 ಜಾರ್ಖಂಡ್, 4 ರಾಜಸ್ಥಾನ, 3 ಮಹಾರಾಷ್ಟ್ರ, ತೆಲಂಗಾಣ ಹಾಗೂ ಪಶ್ಚಿಮ ಬಂಗಾಳದಲ್ಲಿ ತಲಾ 2 ಹಾಗೂ ಆಂಧ್ರಪ್ರದೇಶ ಹಾಗೂ ಹಿಮಾಚಲ ಪ್ರದೇಶದಲ್ಲಿ ಒಂದೊಂದು ರೈಲುಗಳು ಸಂಚರಿಸುತ್ತಿವೆ. ಶನಿವಾರ 80 ರೈಲು ಹಾಗೂ ಭಾನುವಾರ 64 ರೈಲುಗಳು ಸಂಚಾರ ನಡೆಸುತ್ತಿವೆ.
ದೇಶದಲ್ಲಿ ಈಗಾಗಲೇ ಓಡಾಟ ನಡೆಸುತ್ತಿರುವ ಶ್ರಮಿಕ್ ರೈಲುಗಳು 24 ಬೋಗಿಗಳನ್ನು ಹೊಂದಿದ್ದು, ಪ್ರತಿ ಬೋಗಿಗಳಲ್ಲಿ 72 ಪ್ರಯಾಣಿಕರು ಪ್ರಯಾಣ ಬೆಳೆಸಬಹುದಾಗಿದೆ.
ಎಲ್ಲ ರಾಜ್ಯಗಳಿಂದ ನಮಗೆ ಉತ್ತಮ ಸಹಕಾರ ಲಭ್ಯವಾದರೆ ಮುಂದಿನ ಮೂರ್ನಾಲ್ಕು ದಿನಗಳಲ್ಲಿ ಎಲ್ಲ ವಲಸೆ ಕಾರ್ಮಿಕರನ್ನು ಅವರ ರಾಜ್ಯಗಳಿಗೆ ತಲುಪಿಸಲು ನಾವು ಸಿದ್ಧ ಎಂದು ಕೇಂದ್ರ ರೈಲ್ವೆ ಖಾತೆ ಸಚಿವ ಗೋಯಲ್ ತಿಳಿಸಿದ್ದಾರೆ.
ನಾಳೆಯಿಂದ ದೇಶದ ಪ್ರಮುಖ ನಗರಗಳಲ್ಲಿ ಹಂತಹಂತವಾಗಿ ಪ್ಯಾಸೆಂಜರ್ ರೈಲು ಸಂಚಾರ ನಡೆಸಲು ಅನುಮತಿ ನೀಡಲಾಗಿದೆ. ಅದಕ್ಕೆ ಇಂದು ಸಂಜೆಯಿಂದಲೇ ಆನ್ಲೈನ್ ಬುಕ್ಕಿಂಗ್ ಕೂಡ ಆರಂಭವಾಗಲಿದೆ.
