ಸಚಿವರ ಕಾಲೇಜ್​ನಲ್ಲೇ ನಡೀತು ದುರಂತ: ಬಿಟೆಕ್​ ವಿದ್ಯಾರ್ಥಿನಿ ಮೇಲೆ ಲ್ಯಾಬ್​ ಟೆಕ್ನಿಶಿಯನ್​ ಅತ್ಯಾಚಾರ...!

ದೇಶದಲ್ಲಿ ಅತ್ಯಾಚಾರ ಪ್ರಕರಣಗಳಿಗೆ ಕೊನೆಯಿಲ್ಲದಂತಾಗಿದೆ. ಹೈದರಾಬಾದ್​ನಲ್ಲಿ ದಿಶಾ ಅತ್ಯಾಚಾರ ಹಾಗೂ ಕೊಲೆ ಪ್ರಕರಣದ ನಂತರವೂ ಕೂಡಾ ಕಾಮುಕರ ಅಟ್ಟಹಾಸ ಮುಂದುವರೆದಿದೆ. ತೆಲಂಗಾಣದ ರಾಜ್ಯ ಸಚಿವ ಮಾಲೀಕತ್ವ ಕಾಲೇಜಿನಲ್ಲಿಯೇ ವಿದ್ಯಾರ್ಥಿನಿಯೊಬ್ಬರ ಮೇಲೆ ಲ್ಯಾಬ್​ ಟೆಕ್ನಿಷಿಯನ್​ನಿಂದ ಅತ್ಯಾಚಾರ ಆರೋಪ ಕೇಳಿಬಂದಿದೆ.

ಹೈದರಾಬಾದ್: ತೆಲಂಗಾಣದ ಕಾರ್ಮಿಕ ಮತ್ತು ಉದ್ಯೋಗ ಸಚಿವ ಮಲ್ಲಾರೆಡ್ಡಿ ಒಡೆತನದ ಮಲ್ಲಾರೆಡ್ಡಿ ಇಂಜಿನಿಯರಿಂಗ್​ ಕಾಲೇಜಿನಲ್ಲಿ ಎರಡನೇ ವರ್ಷದ ಇಂಜಿನಿಯರಿಂಗ್ ವ್ಯಾಸಂಗ ಮಾಡುತ್ತಿದ್ದ ವಿದ್ಯಾರ್ಥಿನಿಯ ಮೇಲೆ ಅದೇ ಕಾಲೇಜಿನಲ್ಲಿ ಕೆಲಸ ನಿರ್ವಹಿಸುತ್ತಿದ್ದ ಲ್ಯಾಬ್ ಟೆಕ್ನಿಷಿಯನ್​ನಿಂದ ಅತ್ಯಾಚಾರ ಎಸಗಿರುವ ಆರೋಪ ಕೇಳಿಬಂದಿದೆ.

ಈ ಕುರಿತು ಪೆಟ್​ಬಶೀರ್​ಬಾದ್ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. '' ಕೆಲ ದಿನಗಳ ಹಿಂದೆ ಯುವತಿಯನ್ನು ಕಾಲೇಜಿನ ಲ್ಯಾಬ್​ನಲ್ಲಿ ಅಲ್ಲಿದ್ದ ಟೆಕ್ನಿಷಿಯನ್​ ಅತ್ಯಾಚಾರ ಮಾಡಿದ್ದಾನೆ. ವಿಷಯ ಬಹಿರಂಗಪಡಿಸಿದರೆ ಕೊಲೆ ಮಾಡುವುದಾಗಿ ಬೆದರಿಕೆ ಹಾಕಿದ್ದಾನ'' ಎಂದು ಯುವತಿ ದೂರು ನೀಡಿದ್ದಾಗಿ ಪೆಟ್​ಬಶೀರ್​ಬಾದ್ ಪೊಲೀಸರು ಸ್ಪಷ್ಟಪಡಿಸಿದ್ದಾರೆ.

ಆರೋಪಿ ವಿರುದ್ಧ ಐಪಿಸಿ ಸೆಕ್ಷನ್ 376 ಹಾಗೂ ಎಸ್​ಸಿ/ ಎಸ್​ಟಿ ಌಕ್ಟ್​ನಡಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದ್ದು ಪ್ರಕರಣದ ತನಿಖೆ ಮುಂದುವರೆದಿದೆ.