ಮೀರತ್(ಉತ್ತರ ಪ್ರದೇಶ): ಇಂದಿನ ದುಬಾರಿ ದುನಿಯಾದಲ್ಲಿ ನಮ್ಮಿಷ್ಟದ ಬೈಕ್ ಖರೀದಿ ಮಾಡಿ, ದೂರದ ಪ್ರಯಾಣ ಮಾಡುವುದು ಅಷ್ಟು ಸುಲಭವಲ್ಲ. ದಿನದಿಂದ ದಿನಕ್ಕೆ ಪೆಟ್ರೋಲ್, ಡೀಸೆಲ್ ಬೆಲೆ ಹೆಚ್ಚಾಗುತ್ತಲೇ ಇದೆ. ಹೀಗಾಗಿ, ದೂರದ ಪ್ರಯಾಣ ಮಾಡುವುದು ಇತ್ತೀಚಿನ ದಿನಗಳಲ್ಲಿ ತುಂಬಾ ದುಬಾರಿಯಾಗ್ತಿದೆ. ಈ ಎಲ್ಲಾ ಸಮಸ್ಯೆಗಳಿಗೆ ಬ್ರೇಕ್ ಹಾಕ್ಬೇಕು ಎಂದು ಸಂಕಲ್ಪ ತೊಟ್ಟ ಮೀರತ್ನ ಬಿಟೆಕ್ ವಿದ್ಯಾರ್ಥಿ ರೋಹಿತ್ ಶರ್ಮಾ ಜಂಬೋ ಎಲೆಕ್ಟ್ರಿಕ್ ಬೈಕ್ ತಯಾರಿಸಿದ್ದಾರೆ.
ರೋಹಿತ್ ತಯಾರಿಸಿರುವ ಈ ವಿಶೇಷ ಬೈಕ್ 13 ಅಡಿ ಉದ್ದವಾಗಿದೆ. ಹೀಗಾಗಿ, ಮಹಾಬಲ್ ಎಲೆಕ್ಟ್ರಿಕ್ ಚಾಪರ್ ಎಂದು ಅದಕ್ಕೆ ಹೆಸರಿಟ್ಟಿದ್ದಾರೆ. ಹಾಗಾದ್ರೆ ಈ ಬೈಕ್ನ ವಿಶೇಷತೆ, ರೋಹಿತ್ ಅವರ ಸಾಮರ್ಥ್ಯದ ಬಗ್ಗೆ ಒಂದಿಷ್ಟು ಮಾಹಿತಿ ಇಲ್ಲಿದೆ. ಮೂಲತಃ ಬಾಗ್ಪತ್ನ ರೋಹಿತ್ ಶರ್ಮಾ ಮೀರತ್ನ ದೆಹಲಿ ಇನ್ಸ್ಟಿಟ್ಯೂಟ್ ಆಫ್ ಇಂಜಿನಿಯರಿಂಗ್ ಕಾಲೇಜ್ನಲ್ಲಿ ಬಿಟೆಕ್ ಮೆಕ್ಯಾನಿಕಲ್ ಪೂರ್ಣಗೊಳಿಸಿದ್ದಾರೆ. ಏನಾದ್ರೂ ಸಾಧನೆ ಮಾಡಬೇಕು ಎಂಬ ಹಂಬಲ ಹೊಂದಿದ್ದ ಇವರು, ಇದೀಗ ಪರಿಸರ ಸ್ನೇಹಿ ಬೈಕ್ ತಯಾರಿಸಿದ್ದಾರೆ. ಇದನ್ನು ಸೌರಶಕ್ತಿ ಹಾಗೂ ವಿದ್ಯುತ್ ಮೂಲಕ ಚಾರ್ಜ್ ಮಾಡಬಹುದಾಗಿದೆ.
ಬೈಕ್ ವಿಶೇಷತೆ ಏನು?: ಸುಮಾರು 13 ಅಡಿ ಉದ್ದವಿರುವ ಈ ಬೈಕ್ ಚಾರ್ಜ್ ಆಗಲು ಕೇವಲ ಎರಡು ಗಂಟೆ ತೆಗೆದುಕೊಳ್ಳುತ್ತದೆ. ಒಮ್ಮೆ ಚಾರ್ಜ್ ಮಾಡಿದರೆ 1080 ಕಿಲೋ ಮೀಟರ್ ಪ್ರಯಾಣಿಸಬಹುದಾಗಿದೆ ಎಂದು ರೋಹಿತ್ ಹೇಳುತ್ತಾರೆ. ಪ್ರತಿ ಗಂಟೆಗೆ 120 ಕಿಲೋ ಮೀಟರ್ ವೇಗದಲ್ಲಿ ಈ ಬೈಕ್ ಓಡುತ್ತದೆ. ಸುಮಾರು 700 ಕೆಜಿ ಭಾರ ಹೊತ್ತುಕೊಂಡು ಹೋಗುವ ಸಾಮರ್ಥ್ಯ ಇದಾಗಿದೆ ಎನ್ನುವ ರೋಹಿತ್, ವಿಶ್ವದ ಅತಿ ಉದ್ದದ ಬೈಕ್ ಎಂದು ತಿಳಿಸಿದ್ದಾರೆ. ಹೀಗಾಗಿ, ಗಿನ್ನೆಸ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್‌ಗೆ ಸೇರಿಸಲು ಅರ್ಜಿ ಸಲ್ಲಿಸಿದ್ದಾರೆ. ತನ್ನ ಪಾಕೆಟ್ ಮನಿ ಹಾಗೂ ಸ್ಕಾಲರ್ಶಿಪ್ನಿಂದ ಬಂದಿರುವ ಹಣದಿಂದ ಈ ಬೈಕ್ ತಯಾರಿಸಿರುವುದಾಗಿ ತಿಳಿಸಿದ್ದಾನೆ.
ಇದನ್ನೂ ಓದಿ: 20 ರೂಪಾಯಿಗೆ 50 ಕಿ.ಮೀ. ಪ್ರಯಾಣ.. ವಿಶೇಷ ಬೈಕ್ ತಯಾರಿಸಿದ ಯುವಕ!
1 ಲಕ್ಷ ರೂಪಾಯಿ ಖರ್ಚು: ತುಂಬಾ ಎತ್ತರ ಹಾಗೂ ದೊಡ್ಡದಾಗಿದ್ದರೂ ಈ ಬೈಕ್ ಪಿಕಪ್ ಅತ್ಯುತ್ತಮವಾಗಿದೆ. ಕೇವಲ ಮೂರು ಸೆಕೆಂಡ್ಗಳಲ್ಲಿ 0 ದಿಂದ 40 ಕಿಮೀ ವೇಗ ಹೆಚ್ಚಿಸಬಹುದಾಗಿದೆ. ವಿಶ್ವದ ಅತಿದೊಡ್ಡ ಶಕ್ತಿಶಾಲೆ ಎಲೆಕ್ಟ್ರಾನಿಕ್ ಬೈಕ್ ಇದಾಗಿದ್ದು, ಸಂಪೂರ್ಣವಾಗಿ ಪರಿಸರಿ ಸ್ನೇಹಿಯಾಗಿದೆ. ಸುಮಾರು 45ರಿಂದ 50 ದಿನದಲ್ಲಿ ಈ ಬೈಕ್ ತಯಾರುಗೊಂಡಿದ್ದು, ಸಿದ್ಧಪಡಿಸಲು 1 ಲಕ್ಷ 20 ಸಾವಿರ ರೂಪಾಯಿ ವೆಚ್ಚಾಗಿದೆ ಎಂದು ರೋಹಿತ್ ಈಟಿವಿ ಭಾರತ್ಗೆ ತಿಳಿಸಿದ್ದಾರೆ. ಈ ವಿಶೇಷ ಬೈಕ್ ವೀಕ್ಷಣೆ ಮಾಡಲು ಇದೀಗ ತಂಡೋಪ ತಂಡವಾಗಿ ರೋಹಿತ್ ಮನೆಗೆ ಜನರು ಆಗಮಿಸಲು ಶುರು ಮಾಡಿದ್ದಾರೆ.
