ಹರಿದ್ವಾರ (ಉತ್ತರಾಖಂಡ): ಮಲೆನಾಡಿನಲ್ಲಿ ನಿರಂತರ ಮಳೆಯಾಗುತ್ತಿದ್ದು, ಪ್ರವಾಹ ಪರಿಸ್ಥಿತಿ ಉಂಟಾಗಿದೆ. ಇದರಿಂದ ಜನರು ಊಟ - ತಿಂಡಿ ಸಮಸ್ಯೆ ಎದುರಿಸುತ್ತಿದ್ದಾರೆ. ಈ ಪ್ರದೇಶದಲ್ಲಿ ಜಲಾವೃತವಾಗದ ಸ್ಥಳವಿಲ್ಲ. ಈಗ ನೀರಿನಲ್ಲಿ ವಿಷಪೂರಿತ ಹಾವುಗಳು ಬರಲಾರಂಭಿಸಿದ್ದು, ಜನಸಾಮಾನ್ಯರು ಭಯಭೀತರಾಗಿದ್ದಾರೆ.
ವಿಷಪೂರಿತ ಹಾವುಗಳ ಕಾಟ: ಲಕ್ಸರ್ ಮೇನ್ ಬಜಾರ್ನಲ್ಲಿಯೇ ಹಲವು ಹಾವುಗಳು ಹೊರಬಂದಿವೆ. ಲಕ್ಸಾರ್‌ನ ಸಂತ ಕಾಲೋನಿಯಲ್ಲಿ ಹಾವು ಹೊರ ಬರುವುದರಿಂದ ಕಾಲೋನಿ ನಿವಾಸಿಗಳು ಭಯಭೀತರಾಗಿದ್ದಾರೆ. ಮಾಹಿತಿ ಪಡೆದ ಅರಣ್ಯ ಇಲಾಖೆ ಸಿಬ್ಬಂದಿ ಸ್ಥಳಕ್ಕೆ ಆಗಮಿಸಿ ಹಾವನ್ನು ಸೆರೆ ಹಿಡಿದು ತಮ್ಮೊಂದಿಗೆ ಕೊಂಡೊಯ್ದಿದ್ದಾರೆ. ಒಂದೆಡೆ ಆಗಸದಿಂದ ಸುರಿಯುತ್ತಿರುವ ಮಳೆಯಿಂದಾಗಿ ಜನ ಮನೆಗಳಲ್ಲಿಯೇ ಕುಳಿತಿದ್ದಾರೆ. ಮತ್ತೊಂದೆಡೆ ಪ್ರತಿ ರಸ್ತೆಯಲ್ಲೂ ಹಾವು ಕಾಣಿಸಿಕೊಂಡು ಜನರಲ್ಲಿ ಭಯದ ವಾತಾವರಣ ನಿರ್ಮಾಣವಾಗಿದೆ. ಜನರು ತಮ್ಮ ಮಕ್ಕಳ ಬಗ್ಗೆಯೂ ತುಂಬಾ ಚಿಂತಿತರಾಗಿದ್ದಾರೆ.
ಕೇದಾರನಾಥ ಯಾತ್ರೆ ಆರಂಭ: ಮಳೆಯಿಂದಾಗಿ ನದಿ, ತೊರೆಗಳು ಉಕ್ಕಿ ಹರಿಯುವ ಪರಿಸ್ಥಿತಿ ನಿರ್ಮಾಣವಾಗಿದ್ದು, ಗುಡ್ಡಗಳಲ್ಲಿ ಬಿರುಕು ಕಾಣಿಸಿಕೊಂಡು ಭೂಕುಸಿತದಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ. ಇದರಿಂದಾಗಿ ಚಾರ್ಧಾಮ್ ಯಾತ್ರೆಗೆ ಬಂದ ಯಾತ್ರಾರ್ಥಿಗಳು ಹಲವೆಡೆ ಸಿಕ್ಕಿಹಾಕಿಕೊಂಡಿದ್ದಾರೆ. ಆದರೂ ಇಂದು ಹವಾಮಾನದಲ್ಲಿ ಸುಧಾರಣೆಯಾಗಿದ್ದು, ಕೇದಾರನಾಥ ಯಾತ್ರೆ ಮತ್ತೆ ಆರಂಭವಾಗಿದೆ.
50ಕ್ಕೂ ಹೆಚ್ಚು ಗ್ರಾಮಗಳು ಜಲಾವೃತ: ಬಯಲು ಸೀಮೆಯಲ್ಲಿ ಮಳೆ ನಿಂತಿದ್ದರೂ ಇನ್ನೂ ಮಲೆನಾಡಿನಲ್ಲಿ ಮಳೆಯಾಗುತ್ತಿರುವುದರಿಂದ ನದಿ, ಕಾಲುವೆಗಳು ತುಂಬಿ ಹರಿಯುತ್ತಿವೆ. ಈಗಾಗಲೇ ಲಕ್ಸರ್‌ನ ಕೆಲ ಪ್ರದೇಶಗಳು ಜಲಾವೃತಗೊಂಡಿವೆ. ಸದ್ಯ 50ಕ್ಕೂ ಹೆಚ್ಚು ಗ್ರಾಮಗಳು ಸಂಪೂರ್ಣ ಮುಳುಗಡೆಯಾಗಿವೆ.
ಪ್ರವಾಹ ಪೀಡಿತರು ಸುರಕ್ಷಿತ ಸ್ಥಳಕ್ಕೆ ಶಿಫ್ಟ್ : ಸುರಿಯುತ್ತಿರುವ ಮಳೆ ಮತ್ತು ಪ್ರವಾಹದಿಂದಾಗಿ ಜನರು ಹಗಲು ರಾತ್ರಿ ಛಾವಣಿಯ ಮೇಲೆ ಕುಳಿತು ಕಾಲ ಕಳೆಯುವ ಸ್ಥಿತಿ ನಿರ್ಮಾಣವಾಗಿದೆ. ಕೆಲವು ಕಡೆಗಳಲ್ಲಿ ಗುಡ್ಡ ಕುಸಿತಗೊಂಡಿದ್ದು, ಎನ್‌ಡಿಆರ್‌ಎಫ್, ಎಸ್‌ಡಿಆರ್‌ಎಫ್ ಮತ್ತು ಸ್ಥಳೀಯ ಆಡಳಿತಕ್ಕೆ ರಕ್ಷಣಾ ಕಾರ್ಯಗಳು ಕೈಗೊಳ್ಳಲು ಸಾಧ್ಯವಾಗುತ್ತಿಲ್ಲ. ಆದ್ದರಿಂದ, ಸ್ಥಳೀಯ ಶಾಸಕರ ಉಪಕ್ರಮದ ಮೇರೆಗೆ ಭಾರತೀಯ ಸೇನೆ ರಕ್ಷಣಾ ಕಾರ್ಯ ಕೈಗೊಂಡಿದೆ. ಸೇನಾ ಸಿಬ್ಬಂದಿ ತುಂಬಾ ಕಷ್ಟಕರವಾದ ಪ್ರದೇಶಗಳನ್ನು ನಿಯಂತ್ರಣಕ್ಕೆ ತೆಗೆದುಕೊಂಡಿದೆ.
ರಕ್ಷಣಾ ಕಾರ್ಯಾಚರಣೆ ಕೈಗೆತ್ತಿಕೊಂಡ ಸೇನೆ: ಮಳೆ ಪರಿಸ್ಥಿತಿಯಿಂದ ಖಾನಪುರದ ಶೇರ್ಪುರ ಗ್ರಾಮ ಸಂಕಷ್ಟಕ್ಕೆ ಸಿಲುಕಿತ್ತು. ಗ್ರಾಮ ಸಂಪೂರ್ಣ ಜಲಾವೃತವಾಗಿದ್ದು, ಇಲ್ಲಿ ಅನೇಕ ಜನರು ಅನಾರೋಗ್ಯದಿಂದ ಬಳಲುತ್ತಿದ್ದರು. ಈಗ ಸೇನೆ ರಕ್ಷಣಾ ಕಾರ್ಯದಿಂದ ಜನರು ನಿಟ್ಟುಸಿರು ಬಿಟ್ಟಿದ್ದಾರೆ.
ಶೇರ್ಪುರ ಹಳ್ಳಿಗೆ ಪ್ರಯಾಣವು ಸಂಜೆ 6:00 ರ ಸುಮಾರಿಗೆ ಪ್ರಾರಂಭವಾಯಿತು. ಕೇವಲ ಆ ಹಳ್ಳಿಗೆ 15 ರಿಂದ 20 ನಿಮಿಷಗಳ ಪ್ರಯಾಣ ದಾರಿ. ಆದರೆ ಈ ಪ್ರಯಾಣ ಪೂರ್ಣಗೊಳಿಸಲು ಸೇನೆ ಬರೋಬ್ಬರಿ 2 ಗಂಟೆಗಳಿಗಿಂತ ಹೆಚ್ಚು ಸಮಯ ತೆಗೆದುಕೊಂಡಿತು. ನೀರಲ್ಲಿ ವಿಷಪೂರಿತ ಹಾವುಗಳು ಸಂಚಾರ, ಕ್ಷಣಕ್ಷಣಕ್ಕೂ ಏರುತ್ತಿರುವ ನೀರು. ಹಲವು ಬಾರಿ ಸೇನೆಯ ಬೋಟ್ ನೆಲಕ್ಕೆ ಸಿಕ್ಕಿಹಾಕಿಕೊಂಡ ಘಟನೆಯೂ ನಡೆಯಿತು.
ಸೇನಾ ನೌಕೆ ಕಂಡು ಸಂತಸಗೊಂಡ ಜನ: ರಾತ್ರಿ 8.30ರ ಸುಮಾರಿಗೆ ಗ್ರಾಮಕ್ಕೆ ಸೇನೆ ತಲುಪಿದಾಗ ಗ್ರಾಮಸ್ಥರು ಹರ್ಷ ವ್ಯಕ್ತಪಡಿಸಿದರು. ಇದುವರೆಗೂ ಪ್ರವಾಹದಲ್ಲಿ ಮುಳುಗಿದ್ದವರ ಕಣ್ಣಲ್ಲಿ ಭರವಸೆಯ ದೋಣಿ ತೇಲುತ್ತಿತ್ತು. ಗ್ರಾಮದಲ್ಲಿ ಕೆಲವರು ಅನಾರೋಗ್ಯದಿಂದ ಬಳಲುತ್ತಿದ್ದರು. ಹೀಗಾಗಿ ಕೂಡಲೇ ಗ್ರಾಮಕ್ಕೆ ಆಗಮಿಸಿದ ಸೇನೆ ಹಾಗೂ ಸ್ಥಳೀಯ ಶಾಸಕ ಉಮೇಶ್ ಶರ್ಮಾ ಅವರು ಮೊದಲು ಪ್ರಾಥಮಿಕ ಚಿಕಿತ್ಸೆ ನೀಡಿದರು. ಆಗ ಜನರ ಸ್ಥಿತಿಯೂ ಅರಿತುಕೊಂಡರು.
ಗ್ರಾಮದಿಂದ ಹಿಂದಿರುಗುವ ಪ್ರಯಾಣ ಇನ್ನಷ್ಟು ಕಷ್ಟಕರವಾಗಿತ್ತು. ತಡರಾತ್ರಿ ಕಾರ್ಯಾಚರಣೆಯಲ್ಲಿ ಗೊಂದಲ ಉಂಟಾಗಬಹುದು ಎಂಬುದು ಸೇನಾ ಸಿಬ್ಬಂದಿಗೂ ಗೊತ್ತಿತ್ತು. ಕೆಲವೊಮ್ಮೆ ಮಳೆಯು ನಮ್ಮ ಪ್ರಯಾಣವನ್ನು ಇನ್ನಷ್ಟು ಕಷ್ಟಕರವಾಗಿಸಿತು. ಬಳಿಕ ಅವರೆಲ್ಲರನ್ನೂ ಸುರಕ್ಷಿತ ಸ್ಥಳಕ್ಕೆ ಸ್ಥಳಾಂತರಿಸಲಾಯಿತು.
26 ವರ್ಷಗಳ ನಂತರ ಇಂತಹ ಮಳೆ: ಈ ಭಾಗದಲ್ಲಿ ಸಮೀಪದ ಗ್ರಾಮಗಳ ಸುಮಾರು 22 ಸಾವಿರಕ್ಕೂ ಹೆಚ್ಚು ಜನರಿದ್ದು, ಅವರ ಗೃಹೋಪಯೋಗಿ ವಸ್ತುಗಳು, ಆಹಾರ ಪದಾರ್ಥಗಳು ಪ್ರವಾಹದ ನೀರಿಗೆ ಕೊಚ್ಚಿ ಹೋಗಿವೆ. ಉತ್ತರಾಖಂಡದ ಸೋನಾಲಿ ನದಿಯ ಅಣೆಕಟ್ಟು ಬಿರುಕುಗೊಂಡ ಕಾರಣ ಇಂತಹ ಪರಿಸ್ಥಿತಿಗಳು ಉದ್ಭವಿಸಿವೆ. ಸುಮಾರು 26 ವರ್ಷಗಳ ನಂತರ ಇಷ್ಟು ಮಳೆಯಾಗಿದೆ ಎಂದು ಲಕ್ಸರ್ ಜನರ ಮಾತಾಗಿದೆ.
ಓದಿ: ಭಾರಿ ಮಳೆಗೆ ಮುಂಬೈ ತಲ್ಲಣ.. ತಗ್ಗು ಪ್ರದೇಶಗಳು ಜಲಾವೃತ, ಸಂಚಾರ ಅಸ್ತವ್ಯಸ್ತ
