ನವದೆಹಲಿ: ಅರವಿಂದ್ ಕೇಜ್ರಿವಾಲ್ ಅವರ ದೆಹಲಿ ಸರ್ಕಾರ ಮತ್ತು ಲೆಫ್ಟಿನೆಂಟ್ ಗವರ್ನರ್ ವಿ.ಕೆ. ಸಕ್ಸೇನಾ ನಡುವಿನ ಗುದ್ದಾಟ ತಾರಕಕ್ಕೇರಿದೆ. ಹೌದು, ವಿದ್ಯುತ್ ಡಿಸ್ಕಾಂ ಬೋರ್ಡ್‌ಗಳಿಗೆ ನೇಮಿಸಲಾಗಿದ್ದ ಕೇಜ್ರಿವಾಲ್ ಸರ್ಕಾರದ ನಾಮನಿರ್ದೇಶಿತ ಸದಸ್ಯರನ್ನು ಲೆಫ್ಟಿನೆಂಟ್ ಗವರ್ನರ್ ವಿ.ಕೆ. ಸಕ್ಸೇನಾ ಅವರು ತೆಗೆದುಹಾಕಿದ್ದಾರೆ.
ಎಎಪಿಯ ಜಾಸ್ಮಿನ್ ಶಾ ಮತ್ತು ಸಂಸದ ಎನ್‌ಡಿ ಗುಪ್ತಾ ಅವರ ಪುತ್ರನನ್ನು ನಾಮನಿರ್ದೇಶಿತರ ಸ್ಥಾನದಿಂದ ಕಿತ್ತುಹಾಕಲಾಗಿದೆ. ನಾಮ ನಿರ್ದೇಶಿತರ ಸ್ಥಾನಗಳನ್ನು ಜವಾಬ್ದಾರಿಯನ್ನು ಹಿರಿಯ ಅಧಿಕಾರಿಗಳೊಂದಿಗೆ ವರ್ಗಾಯಿಸಲಾಗಿದೆ ಎಂದು ಲೆಫ್ಟಿನೆಂಟ್ ಗವರ್ನರ್ ಕಚೇರಿಯ ಮೂಲಗಳು ಶನಿವಾರ ತಿಳಿಸಿವೆ. ಎಎಪಿ ವಕ್ತಾರರಾದ ಜಾಸ್ಮಿನ್ ಅವರನ್ನು ಹೊರತುಪಡಿಸಿ, ಮಂಡಳಿಗಳಿಂದ ತೆಗೆದುಹಾಕಲ್ಪಟ್ಟವರಲ್ಲಿ ಎಎಪಿ ಸಂಸದ ಎನ್.ಡಿ. ಗುಪ್ತಾ ಅವರ ಪುತ್ರ ನವೀನ್ ಗುಪ್ತಾ ಮತ್ತು ಇತರ ಖಾಸಗಿ ವ್ಯಕ್ತಿಗಳನ್ನು ಸರ್ಕಾರದಿಂದ ನಾಮ ನಿರ್ದೇಶಿತರಾಗಿ ನೇಮಕಗೊಂಡಿರುವುದು ಕಾನೂನು ಬಾಹಿರವಾಗಿದೆ ಎಂದು ಮೂಲಗಳು ತಿಳಿಸಿವೆ.
ಕಾನೂನು ಬಾಹಿರವಾಗಿ ನೇಮಕ: ಆಡಳಿತಾರೂಢ ಆಮ್ ಆದ್ಮಿ ಪಕ್ಷವು ಶಾ ಮತ್ತು ಗುಪ್ತಾರನ್ನು ವಿದ್ಯುತ್ ಡಿಸ್ಕಾಂ ಮಂಡಳಿಗಳಿಂದ ತೆಗೆದುಹಾಕುವ ಲೆಫ್ಟಿನೆಂಟ್ ಗವರ್ನರ್ ಆದೇಶ "ಕಾನೂನುಬಾಹಿರ ಮತ್ತು ಅಸಂವಿಧಾನಿಕ" ಎಂದು ಬಣ್ಣಿಸಿದೆ. ಅಂತಹ ಆದೇಶ ಹೊರಡಿಸುವ ಅಧಿಕಾರ ಲೆಫ್ಟಿನೆಂಟ್ ಗವರ್ನರ್ಗೆ ಇಲ್ಲ ಎಂದು ಆಪ್ ಪಕ್ಷ ಹೇಳಿದೆ.
ಹಣಕಾಸು ಕಾರ್ಯದರ್ಶಿ, ಪವರ್ ಸೆಕ್ರೆಟರಿ ಮತ್ತು ದೆಹಲಿ ಟ್ರಾನ್ಸಕೊ ಎಂಡಿ ಈಗಿನ ಪರಿಸ್ಥಿತಿಗೆ ತಕ್ಕಂತೆ ಡಿಸ್ಕಾಂ ಮಂಡಳಿಗಳಲ್ಲಿ ನಗರ ಸರ್ಕಾರವನ್ನು ಪ್ರತಿನಿಧಿಸುತ್ತಾರೆ. ಬಿವೈಪಿಎಲ್, ಬಿಆರ್ಪಿಎಲ್ ಹಾಗೂ ಟಿಪಿಡಿಡಿಎಲ್ ಮಂಡಳಿಗಳಿಗೆ ಸರ್ಕಾರಿ ನಾಮನಿರ್ದೇಶಿತರಾಗಿ "ಕಾನೂನು ಬಾಹಿರವಾಗಿ" ನೇಮಕಗೊಂಡಿರುವ ಷಾ, ಗುಪ್ತಾ ಮತ್ತು ಇತರ ಖಾಸಗಿ ವ್ಯಕ್ತಿಗಳನ್ನು ತಕ್ಷಣವೇ ತೆಗೆದುಹಾಕುವಂತೆ ದೆಹಲಿ ಲೆಫ್ಟಿನೆಂಟ್ ಗವರ್ನರ್ ಆದೇಶಿಸಿದೆ ಎಂದು ಎಂದು ಎಲ್‌ಜಿ ಕಚೇರಿಯ ಮೂಲಗಳು ತಿಳಿಸಿದೆ.
ಸುಪ್ರೀಂ ಕೋರ್ಟ್ ಆದೇಶ ಅಪಹಾಸ್ಯ: ''ಚುನಾಯಿತ ಸರ್ಕಾರಕ್ಕೆ ಮಾತ್ರ ವಿದ್ಯುತ್ ವಿಷಯದ ಕುರಿತು ಆದೇಶಗಳನ್ನು ಹೊರಡಿಸುವ ಅಧಿಕಾರವಿದೆ'' ಎಂದು ಎಎಪಿ ಹೇಳಿದೆ. " ಲೆಫ್ಟಿನೆಂಟ್ ಗವರ್ನರ್ ಅವರು, ಸುಪ್ರೀಂಕೋರ್ಟ್ ಆದೇಶಗಳನ್ನು ಮತ್ತು ಸಂವಿಧಾನವನ್ನು ಸಂಪೂರ್ಣವಾಗಿ ಅಪಹಾಸ್ಯ ಮಾಡಿದ್ದಾರೆ. ಸುಪ್ರೀಂ ಕೋರ್ಟ್ ಆದೇಶಗಳು ಅವರು ಬದ್ಧವಾಗಿಲ್ಲವೆಂದು ಬಹಿರಂಗವಾಗಿಯೇ ಹೇಳುತ್ತಿದ್ದಾರೆ" ಎಂದು ಪಕ್ಷವು ಅಸಮಾಧಾನ ವ್ಯಕ್ತಪಡಿಸಿದೆ.
ಖಾಸಗಿ ಡಿಸ್ಕಾಮ್‌ಗಳಿಗೆ 8,000 ಕೋಟಿ ಲಾಭ ಮಾಡಿದ ಆರೋಪ: ಖಾಸಗಿ ಡಿಸ್ಕಾಮ್‌ಗಳಿಗೆ 8,000 ಕೋಟಿ ರೂ.ಗೂ ಅಧಿಕ ಲಾಭ ಮಾಡಿರುವ ಆರೋಪ ಕೇಳಿ ಬಂದಿತ್ತು. ಈ ವಿಚಾರದಲ್ಲಿ ಸಾಬೀತಾಗಿರುವ ದುರ್ನಡತೆ ಮತ್ತು ದುರುಪಯೋಗ ಆರೋಪದ ಮಧ್ಯೆಯೂ ಕೇಜ್ರಿವಾಲ್ ಸರ್ಕಾರವು ಸರ್ಕಾರಿ ನಾಮನಿರ್ದೇಶಿತರನ್ನು ಅಧಿಕಾರವನ್ನು ಮುಂದುವರೆಸಿತ್ತು. ಬಳಿಕ ಲೆಫ್ಟಿನೆಂಟ್ ಗವರ್ನರ್ ಭಾರತದ ಸಂವಿಧಾನದ 239AA ಅಡಿಯಲ್ಲಿ ಬೇರೆ ಅಭಿಪ್ರಾಯ ವ್ಯಕ್ತಪಡಿಸಿದ್ದರು ಎಂದು ಮೂಲಗಳು ಹೇಳಿವೆ.
ಸಕ್ಸೇನಾ ಅವರು ಈ ವಿಚಾರವನ್ನು ಭಾರತದ ರಾಷ್ಟ್ರಪತಿಗಳಿಗೆ ಗಮನಕ್ಕೂ ತಂದಿದ್ದಾರೆ. ಡಿಸ್ಕಾಂ ಬೋರ್ಡ್‌ಗಳ "ರಾಜಕೀಯ ನೇಮಕಾತಿ"ಯನ್ನು ತೆಗೆದುಹಾಕುವಂತೆ ಅವರು ಕೇಳಿಕೊಂಡಿದ್ದರು. ದೆಹಲಿ ಸರ್ಕಾರವು ಡಿಸ್ಕಾಂಗಳಲ್ಲಿ ಶೇಕಡಾ 49ರಷ್ಟು ಪಾಲು ಹೊಂದಿದೆ. ಹಿರಿಯ ಅಧಿಕಾರಿಗಳು ಈ ಹಿಂದೆ, ಡಿಸ್ಕಾಂ ಬೋರ್ಡ್‌ಗಳಲ್ಲಿ ಸೇವೆ ಸಲ್ಲಿಸುತ್ತಿದ್ದರು. ಆದರೆ, ಕೇಜ್ರಿವಾಲ್ ಸರ್ಕಾರವು ರಾಜಕೀಯವಾಗಿ ಸಂಬಂಧ ಹೊಂದಿರುವ ವ್ಯಕ್ತಿಗಳ ಹೆಸರನ್ನೇ ನಾಮನಿರ್ದೇಶನ ಮಾಡಲು ಪ್ರಾರಂಭಿಸಿತು ಎಂದು ಮೂಲಗಳು ಸ್ಪಷ್ಟಪಡಿಸಿವೆ.
ಸದಸ್ಯರ ಪದಚ್ಯುತಿ ಅಸಂವಿಧಾನಿಕ, ಕಾನೂನು ಬಾಹಿರ: ''ಸದಸ್ಯರ ಪದಚ್ಯುತಿಯು ಅಸಂವಿಧಾನಿಕ ಮತ್ತು ಕಾನೂನುಬಾಹಿರ" ಎಂದು ಇಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ದೆಹಲಿ ಉಪಮುಖ್ಯಮಂತ್ರಿ ಮನೀಶ್ ಸಿಸೋಡಿಯಾ ಹೇಳಿದರು. ದೆಹಲಿಯ ಚುನಾಯಿತ ಸರ್ಕಾರ ತೆಗೆದುಕೊಂಡ ನಿರ್ಧಾರಗಳನ್ನು ಹಿಂತೆಗೆದುಕೊಳ್ಳುವ ಹೊಸ ಪ್ರವೃತ್ತಿಯನ್ನು ಲೆಫ್ಟಿನೆಂಟ್ ಗವರ್ನರ್ ಪ್ರಾರಂಭಿಸಿದ್ದಾರೆ ಎಂದು ಸಿಸೋಡಿಯಾ ಅವರು, ಅರವಿಂದ್ ಕೇಜ್ರಿವಾಲ್ ಸರ್ಕಾರದಿಂದ ನೇಮಕಗೊಂಡ ಸದಸ್ಯರು, ಖಾಸಗಿ ಡಿಸ್ಕಾಮ್‌ಗಳಿಗೆ 8,000 ಕೋಟಿ ರೂಪಾಯಿಗಳ ಲಾಭವನ್ನು ಒದಗಿಸಿದ್ದಾರೆ ಎಂಬ ಆರೋಪವನ್ನು ಉಪಮುಖ್ಯಮಂತ್ರಿ ತಳ್ಳಿಹಾಕಿದರು.
ಲೆಫ್ಟಿನೆಂಟ್ ಗವರ್ನರ್ ವಿರುದ್ಧ ಸಿಸೋಡಿಯಾ ಗರಂ: ''ಲೆಫ್ಟಿನೆಂಟ್ ಗವರ್ನರ್ ಯಾವುದೇ ಕೇಂದ್ರೀಯ ಸಂಸ್ಥೆಯಿಂದ ನಡೆದಿರುವ ವಂಚನೆ ಆರೋಪದ ಬಗ್ಗೆ ತನಿಖೆ ನಡೆಸಲು ಸೂಚಿಸಬಹುದು. ದೆಹಲಿ ಕ್ಯಾಬಿನೆಟ್‌ನ ನಾಲ್ಕು ವರ್ಷಗಳ ಹಳೆಯ ನಿರ್ಧಾರವನ್ನು ರದ್ದುಗೊಳಿಸಿರುವುದು ಮತ್ತು ಡಿಸ್ಕಾಂ ಮಂಡಳಿಗಳಿಗೆ ನೇಮಕಗೊಂಡ ಸದಸ್ಯರನ್ನು ತೆಗೆದುಹಾಕಿರುವುದು ಸರಿಯಲ್ಲ. 4ರಿಂದ 10 ವರ್ಷಗಳ ಹಿಂದೆ ಸರ್ಕಾರದ ತೆಗೆದುಕೊಂಡ ನಿರ್ಧಾರಗಳನ್ನು ಸದ್ಯ ಬದಲಾಯಿಸಿರುವುದು ಸರಿಯಾದ ಕ್ರಮವಲ್ಲ ಎಂದು ಸಿಸೋಡಿಯಾ ಗರಂ ಆದರು.
ಇದನ್ನೂ ಓದಿ: ಕಿರುತೆರೆ ನಟಿ ಚಾಹತ್ ಖನ್ನಾಗೆ ನೋಟಿಸ್ ಕಳುಹಿಸಿದ ಸುಖೇಶ್ ಚಂದ್ರಶೇಖರ್..!
