ಜಾಜ್ಪುರ(ಒಡಿಶಾ): ಬಾಗಿಲು ದಾಟಿ ಹೊರ ಬಂದ್ರೆ ಅಪರಾಧ ಎನ್ನುವಂತಿದ್ದ ಕಾಲಘಟ್ಟದಿಂದ, ಮಧ್ಯರಾತ್ರಿ ಹೆಣ್ಣು ಒಂಟಿಯಾಗಿ ನಡೆದರೆ ಸ್ವಾತಂತ್ರ್ಯ ಸಿಕ್ಕಂತೆ ಎನ್ನುವ ನವಯುಗದಲ್ಲಿ ಗಂಡಿನಂತೆ ಹೆಣ್ಣು ಸರಿಸಮಾನ ಎಂಬುದನ್ನು ತೋರಿಸಿಕೊಟ್ಟಿದ್ದಾಳೆ. ಜಾಜ್ಪುರದ ಮಹಿಳೆಯೊಬ್ಬರು ತಮ್ಮ ವಿಶಿಷ್ಟ ಹವ್ಯಾಸಗಳ ಮೂಲಕ ಸಾಮಾಜಿಕ ಜಾಲತಾಣದಲ್ಲಿ ಟ್ರೆಂಡ್ ಕ್ರಿಯೇಟ್ ಮಾಡಿದ್ದು, ನೋಡುಗರನ್ನು ಹುಬ್ಬೇರಿಸುವಂತೆ ಮಾಡಿದ್ದಾರೆ.
ಜೈಪುರ ಜಿಲ್ಲೆಯ ಜಹಾಲ್ ಎಂಬ ಹಳ್ಳಿಯ ನಿವಾಸಿ ಮೊನಾಲಿಸಾ ಭದ್ರಾ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ಟ್ರೆಂಡ್ ಸೃಷ್ಟಿಸಿರುವ ಮಹಿಳೆ. ಕೈತುಂಬ ಬಳೆ, ಸಂಪ್ರದಾಯಬದ್ಧ ಉಡುಗೆ ತೊಟ್ಟು ಕುದುರೆ ಸವಾರಿ ಮಾಡುವ ಮೊನಾಲಿಸಾ, ಅಷ್ಟೇ ಸರಳವಾಗಿ ಟ್ರಕ್, ಬುಲೆಟ್ ಓಡಿಸ್ತಾರೆ. ಅಲ್ಲದೆ ಸೀರೆಯನ್ನುಟ್ಟು ಟ್ರ್ಯಾಕ್ಟರ್ನಿಂದ ಹೊಲ ಊಳುತ್ತಾರೆ. ಈ ಎಲ್ಲಾ ವಿಡಿಯೋಗಳನ್ನು ತಮ್ಮ ಯೂಟ್ಯೂಬ್ ಚಾನಲ್ನಲ್ಲಿ ಹಾಕಿರುವ ಮೊನಾಲಿಸಾಗೆ ಬರೊಬ್ಬರಿ 22 ಲಕ್ಷ ಮಂದಿ ಸಬ್ಸ್ಕ್ರೈಬ್ ಆಗಿದ್ದಾರೆ.
ಸಾಮಾಜಿಕ ಕಾರ್ಯಕರ್ತ, ಕ್ರಿಯೇಟಿವ್ ಡೈರೆಕ್ಟರ್ ಆಗಿರುವ ಮೊನಾಲಿಸಾ ಅವರ ಪತಿ ಬದ್ರಿ ನಾರಾಯಣ ಭದ್ರಾ ಅವರೇ ತಮ್ಮ ಪತ್ನಿಯನ್ನು ಸಾಮಾಜಿಕ ಜಾಲತಾಣದಲ್ಲಿ ಪರಿಚಯಿಸಿದ್ದಾರೆ. ಮೊನಾಲಿಸಾ ಅವರು ಗದ್ದೆ ಊಳುವುದು, ನಾಟಿ ಮಾಡುವುದು, ದೇವಸ್ಥಾನ ನಿರ್ಮಾಣ ಕಾರ್ಯದಲ್ಲಿ ತೊಡಗಿಸಿಕೊಂಡಿದ್ದಾರೆ. ವೋಲ್ವೊ ಬಸ್ ಚಾಲನೆ ಮಾಡಿದ್ದು ಸೇರಿ ಹಲವು ವಿಡಿಯೋಗಳನ್ನು ಈಗಾಗಲೇ ಯೂಟ್ಯೂಬ್ಗೆ ಅಪ್ಲೋಡ್ ಮಾಡಿದ್ದಾರೆ. ಪ್ರತಿ ತಿಂಗಳು ಸುಮಾರು ಒಂದು ಲಕ್ಷಕ್ಕೂ ಅಧಿಕ ಹಣವನ್ನು ಇವರು ಸಂಪಾದನೆ ಕೂಡಾ ಮಾಡುತ್ತಿದ್ದಾರೆ.
ಒಟ್ಟಾರೆಯಾಗಿ ನಾಲ್ಕು ಗೋಡೆಯ ಮಧ್ಯ ಇದ್ದು, ಯಾರಾದರೂ ಏನಾದರೂ ಅನ್ನುತ್ತಾರೆ ಎಂದು ಅನೇಕ ಮಹಿಳೆಯರು ತಮ್ಮ ಹವ್ಯಾಸ ಮತ್ತು ಪ್ರತಿಭೆಗಳನ್ನು ಮೊಟುಕುಗೊಳಿಸಿ ಬದುಕುತ್ತಿದ್ದಾರೆ. ಅಂತಹ ಮಹಿಳೆಯರಿಗೆ ಸ್ಫೂರ್ತಿಯಾಗಿರುವ ಮೊನಾಲಿಸಾ, ನಾರಿ ಮನಸು ಮಾಡಿದ್ರೆ ಎಲ್ಲವೂ ಸಾಧ್ಯ. ತೊಟ್ಟಿಲು ತೂಗುವ ಕೈ ಜಗತ್ತನ್ನೇ ಆಳಬಲ್ಲದು ಎಂಬುದಕ್ಕೆ ನಿದರ್ಶನ ಆಗಿದ್ದಾರೆ.
