ಪತ್ತನಂತಿಟ್ಟ(ಕೇರಳ): ರಾಜ್ಯದ ಪತ್ತನಂತಿಟ್ಟದ 9ನೇ ತರಗತಿ ವಿದ್ಯಾರ್ಥಿ ಸಿಡಾನ್ ಹಲವು ವಿಫಲ ಪ್ರಯತ್ನಗಳ ನಂತರ ಅಂತಿಮವಾಗಿ 'ರಾಸ್ಪಿ' ಎಂಬ ಮಾತನಾಡಬಲ್ಲ ರೋಬೋಟ್ ಅನ್ನು ತಾನೇ ಅಭಿವೃದ್ಧಿಪಡಿಸಿ ದೇಶದ ಗಮನ ಸೆಳೆದಿದ್ದಾನೆ. ಅಷ್ಟೇ ಅಲ್ಲದೆ, ತನ್ನ ಶಾಲೆಯಲ್ಲಿ ನಾಯಕನಾಗಿ ಹೊರಹೊಮ್ಮಿದ್ದಾನೆ.
ಈತ ತಯಾರಿಸಿರುವ ರೋಬೋಟ್ ಸಿಡಾನ್ ನೀಡಿದ ಆಜ್ಞೆಗಳ ಪ್ರಕಾರ ಕೆಲಸ ಮಾಡುತ್ತಿದ್ದು, ಈ ಹುಡುಗನೇ ಅಭಿವೃದ್ಧಿ ಪಡಿಸಿರುವ ಸಂವಾದಾತ್ಮಕ ಸಾಫ್ಟ್ವೇರ್ ರೋಬೋಟ್ ಸಿಡಾನ್ ಧ್ವನಿ ಗುರುತಿಸಿ, ಇಂಟರ್ನೆಟ್ನಲ್ಲಿ ಹುಡುಕಲು, ಅತ್ತಿತ್ತ ಚಲಿಸಲು, ಹೇಳಿದ ಕೆಲಸ ಮಾಡಲು ಸಹಾಯ ಮಾಡುತ್ತದೆ. ‘ಆಂಡ್ರಾಯ್ಡ್ ಕುಂಜಪ್ಪನ್’ ಎಂಬ ಸಿನಿಮಾ ಮಲಯಾಳಂನಲ್ಲಿ ಯಶಸ್ವಿಯಾಗಿತ್ತು. ಒಂಟಿ ಮುದುಕನಿಗೆ ಮನೆಕೆಲಸಗಳಲ್ಲಿ ಸಹಾಯ ಮಾಡಲೆಂದು ತರುವ ಮಾತನಾಡಬಲ್ಲ ರೋಬೋಟ್‌ನೊಂದಿಗೆ ಬಾಂಧವ್ಯ ಬೆಳೆಯುವ ಕುರಿತು ಆ ಸಿನಿಮಾ ಕಥೆಯಿದೆ. ಆದರೆ ಸಿಡಾನ್ ಈ ಸಿನಿಮಾ ಬಿಡುಗಡೆಗೂ ಮುನ್ನವೇ ಇಂತಹ ರೋಬೋಟ್ ತಯಾರಿಸುವ ಕನಸು ಕಂಡಿದ್ದನು. ಅದಕ್ಕಾಗಿ ಹಲವಾರು ಬಾರಿ ಪ್ರಯತ್ನಪಟ್ಟು ಕೈಸುಟ್ಟುಕೊಂಡಿದ್ದನು. ಆದರೆ ಆ ಎಲ್ಲ ವಿಫಲ ಪ್ರಯತ್ನಗಳನ್ನು ದಾಟಿ ಅಂತಿಮವಾಗಿ ರಾಸ್ಪಿ ಎಂಬ ಸಂವಾದಾತ್ಮಕ ರೋಬೋಟ್ ಅನ್ನು ಸ್ವತಃ ತಾನೇ ತಯಾರಿಸುವಲ್ಲಿ ಯಶಸ್ವಿಯಾಗಿದ್ದಾನೆ.
ಸಂವಹನ ಸಾಪ್ಟ್ವೇರ್ ಅಭಿವೃದ್ಧಿ: ಮಕ್ಕಳು ಯೂಟ್ಯೂಬ್ ಉಪಯೋಗಿಸಿ ಹಾಳಾಗುತ್ತಾರೆ ಎಂಬ ಮಾತಿಗೆ ಅಪವಾದವೆನ್ನುವಂತೆ ಸಿಡಾನ್ ಯೂಟ್ಯೂಬ್‌ನಿಂದಲೇ ನಿಟ್ಟಿ-ಗ್ರಿಟ್ಟಿಯನ್ನು ಕಲಿತು ಮಾನವನಂತೆಯೇ ಇರುವ ಈ ರೋಬೋಟ್ ಅನ್ನು ತಯಾರಿಸಿದ್ದಾನೆ. ತನ್ನ ಭಾಷೆಯನ್ನು ರೋಬೋಟ್ಗೆ ಪರಿಚಯಿಸಲು ಅಗತ್ಯವಿದ್ದ ಸಂವಹನ ಸಾಫ್ಟ್ವೇರ್ ತಯಾರಿಕೆಗಾಗಿ ಕಂಪ್ಯೂಟರ್ ಪ್ರೋಗ್ರಾಮಿಂಗ್ ಭಾಷೆ ಪೈಥಾನ್ ಅನ್ನು ಸಹ ಕಲಿತು ಯಶಸ್ವಿಯಾಗಿದ್ದಾನೆ. ರಾಸ್ಪಿ ರೋಬೋಟ್ ಸಂಪೂರ್ಣವಾಗಿ ತಯಾರಾಗಿ ಕೆಲಸ ಮಾಡಲು ಪ್ರಾರಂಭಿಸಿದಾಗ ಸಿಡಾನ್ ತನ್ನ ನೆರೆಹೊರೆಯಲ್ಲಿ ಮತ್ತು ಶಾಲೆಯಲ್ಲಿ ಒಬ್ಬ ಹೀರೋ ಆಗಿ ಕಾಣಿಸಿಕೊಂಡಿದ್ದಾನೆ.
ಬಾಲ್ಯದಲ್ಲೇ ಎಲೆಕ್ಟ್ರಾನಿಕ್ಸ್ ಮೇಲೆ ಆಸಕ್ತಿ: ಸಿಡಾನ್ ನಾಲ್ಕನೇ ತರಗತಿಯಲ್ಲಿ ಓದುತ್ತಿದ್ದಾಗ ಅವನ ಅಮ್ಮ ತಂದು ಕೊಟ್ಟ ಎಲೆಕ್ಟ್ರಾನಿಕ್ ಆಟಿಕೆಯಿಂದ ಆತನಲ್ಲಿ ಈ ಯಾಂತ್ರಿಕ ವಸ್ತುಗಳ ತಯಾರಿಕೆಯ ಬಗ್ಗೆ ಆಸಕ್ತಿ ಹುಟ್ಟಿಕೊಂಡಿತ್ತು. ಆ ಆಸಕ್ತಿಯಿಂದಲೇ ರೋಬೋಟ್ ತಯಾರಿಸುವ ಮೊದಲೇ ರಿಮೋಟ್ ಸಹಾಯದಿಂದ ಮನೆ ಸ್ವಚ್ಛಗೊಳಿಸುವಂತಹ ಸ್ವಯಂಚಾಲಿತ ಬ್ರಷ್ ಒಂದನ್ನು ತಯಾರಿಸಿದ್ದನು. ಆನಂತರದಲ್ಲಿ ತನಗಾಗಿ ನಾಲ್ಕು ಚಕ್ರದ ವಾಹನವೊಂದನ್ನು ಮತ್ತು ಅಂಧರಿಗೆ ಸಹಾಯವಾಗುವಂತೆ ಮುಂದೆ ಬರುವ ಅಡೆತಡೆಗಳ ಬಗ್ಗೆ ಎಚ್ಚರಿಕೆ ನೀಡಬಲ್ಲ ವಾಕಿಂಗ್ ಸ್ಟಿಕ್ ಅನ್ನು ತಯಾರಿಸಿ ಶಹಭಾಸ್ಗಿರಿ ಗಿಟ್ಟಿಸಿಕೊಂಡಿದ್ದ ಈ 14ರ ಪೋರ.
ಸಿಡಾನ್ಗೆ ಹುಮನಾಯ್ಡ್ ರೋಬೋಟ್ ಮಾಡುವ ಕನಸಿದ್ದು, ಅದಕ್ಕಾಗಿ ರೋಬೋಟಿಕ್ ಇಂಜಿನಿಯರಿಂಗ್ ಮಾಡುವ ಆಸೆಯಿದೆ.
