लोकसभा मा उठी नैनीताल गुरुद्वारा कु मुद्दा
लोकसभा मा बजट सत्र का पेहला चरण का आखिरी दिन नैनीताल सांसद अजय भट्ट न नानकमत्ता गुरुद्वारा कु मुद्दा उठे. भट्ट न इं पवित्र स्थल ते विकसित कन्ने मांग उठे.
जोशीमठ मा रेस्क्यू ऑपरेशन जारी
जोशीमठ का रैणी गौं मा रेस्क्यू ऑपरेशन जारी च. आज सातवां दिन छो. राहत बचाव दल बिना रूकी तपोवन टनल मा लौखुं ते खोजणिं च. आज शाम 6 बजी तक शवों की कुल संख्या 38 छे. दिन मा कर्णप्रयाग का पास अलकनंदा नदी मा सर्च ऑपरेशन का दौरान एसडीआरएफ टीम ते एक मानव अंग मिली छो. अभी लापता लौखुं संख्या 165 च.
ऋषिगंगा का पास नई झीले आशंका, वैज्ञानिक करला निरीक्षण
चमोली जिला मा ऐ भीषण आपदा का बाद उत्तराखंड सरकार सतर्क च. यन जानकारी मिलिं च कि ऋषिगंगा नदी का पास झील बन्ने खबर च. इं मामला मा अब सरकार एक्सपर्ट वैज्ञानिकों ते हेलीकॉप्टर का जरिया भेजेली. जू यू अध्ययन करला कि वख झील छें च कि नि और अगर छे भी च त वू भविष्य मा खतरा त नि होली.
आपदाः एसडीआरएफ न सौंपी रिपोर्ट, लगला ऑटोमेटिक अलार्म सिस्टम
चमोली आपदा का बाद उत्तराखंड सरकार सतर्क च. जेमा एसडीआरएफ टीम न राज्य आपदा प्रबंधन टीम ते रिपोर्ट सौंपेली. जानकारी मिलिं च कि फिलहाल झील खतरा त नि च लेकिन एहतियात का तौर पर चमोली जिला का आपदाग्रस्त तीन इलाकों मा ऑटोमेटिक अलार्म सिस्टम लगला.
चमोली आपदा कु नयु वजह ए समणिं, मृगथूनी चोटि बटि गिरी छे चट्टान
चमोली जिला रैणी गौं मा बीता सात फरवरी का दिन जल प्रलय मा कई लोग जिंदा दफन ह्वे गिन. अब तक रेस्क्यू टीम ते 38 शव मिल गिन. 165 लोग अभी भी लापता छिन. वकि, वैज्ञानिकों का अनुसार, मृगथूनी चोटी बटि एक चट्टान गिरी छे. जेका बाद यू आपदा ए. किलेकी बर्फ गिरी और वेका पिघलणां और फिर जमणां बाद जमीन दलदली ह्वे गी छे. फिर चट्टान कमजोर ह्वे गी और गिर गी. वेका साथ ग्लेशियर भी गिर गी.
अतंरराष्ट्रीय मेहला दिवस पर बड़ी सौगात, पांच लाख तक ब्याजमुक्त ऋण देंणे योजना
आगामी 8 मार्च का दिन विश्व भर मा अंतरराष्ट्रीय मेहला दिवस मणें जालु. इं मौका पर उत्तराखंड सरकार प्रदेश का मेहलों ते एक बड़ी सौगात देंण वली च. इंका तहत ग्रीष्मकालीन राजधानी गैरसैंण मा सीएम 10 हजार मेहला समूहों ते पांच लाख तक ब्याज मुक्त ऋण देला.
वैक्सीनेशनः उत्तराखंड मा अब तक 103852 लौखुं ते लगी टीका
उत्तराखंड मा वैक्सीनेशन कु काम कई केंद्रों पर चन्नु च. प्रदेश मा कुल 137 जगहों पर हेल्थ वर्करों ते वैक्सीन दी जांणी च. अब तक प्रदेश मा 10 हजार 3852 स्वास्थ्यकर्मियों ते वैक्सीन लगी जा चुकी च.
पुरोला मा रवांई वसंतोत्सव, देव डोलियूं न करी उद्घाटन
उत्तरकाशी जिला का पुरोला मा 15 दिवसीय रवांई वसंतोत्सव मेला कु आयोजन होंणू च. जेकु इष्ट देव ओडारू जखंडी मटियानी महासू की देव डोलियों न उद्घाटन करी. यख बड़ी संख्या मा गौं वला पौंछणा छिन. हालांकि कोरोना संक्रमण का चलदा पिछला साल जन रौनक नि च.
