अपणुं उत्तराखंडः दिनभरै खास खबर, एक नजर मा

अपणुं उत्तराखंड मा देखा, दिनभरै खास खबर, एक नजर मा

ब्याली शाम दिल्ली मा इजरायली दूतावास का पास ह्वे बम धमाका का बाद से देशे सुरक्षा एजेंसी सतर्क छिन. उत्तराखंड मा भी एहतियातन अलर्ट जारी ह्वे गी. डीजीपी अशोक कुमार का आदेश पर राज्य का चार जिलों नैनीताल, उधम सिंह नगर, हरिद्वार और देहरादून मा हाई अलर्ट च.

आज शाम साढ़े चार बजि सीएम त्रिवेंद्र सिंह रावते अध्यक्षता मा उत्तराखंड कैबिनेट बैठक ह्वे. जेमा कई अहम फैसला लिए गिन. साथ ही महाकुंभ की एसओपी पर राज्य सरकार न अपणं सहूलियत का मुताबिक फैसला ले.

आज शहादत दिवस पर देहरादून का गांधी पार्क मा पीसीसी चीफ प्रीतम सिंह का नेतृत्व मा कांग्रेसी कार्यकर्ता इकट्ठा ह्वेन. ऊंन महात्मा गांधी ते श्रद्धांजलि दे. साथ ही उपवास भी रखी. इं मौका पर प्रीतम सिंह न बोली कि गांधी जी न अंहिसा का बूता देश ते आजाद करे छो. लेकिन आजकल देश मा हालात चिंताजनक छिन.

राष्ट्रीय सुरक्षा का साथ खिलवाड़ और सेना का फर्जी दस्तावेज बणेंकी विदेश मा नौकरी कन्न मामला मा एसटीएफ पुलिसे जांच जारी च. इं मामला मा एसटीएफ 150 संदिग्ध लौखुं पर नजर रखणिं च. ऊंकी डिटेल खंगालणिं च.

उत्तराखंड सरकार न प्रदेश मा ओंण वला लौखुं खुंम कोविड 19 ते लेकी रजिस्ट्रेशन प्रक्रिया ते खत्म करेली. हालांकि कंटेनमेंट जोन बटि ओंण वला लौखुं ते यू प्रक्रिया अभी भी होली. बते द्यां कि उत्तराखंड कंटेनमेंट जोन फ्री प्रदेश ह्वे गी.

प्रसिद्ध हास्यकलाकार और राज्य मंत्री दर्जाधारी घनानंद न आगामी 2022 विधानसभा चुनाव मा पौड़ी सीट बटि चुनाव लड़ने इच्छा जते. ऊं बोली कि वू पौड़ी बटि चुनाव लड़्न चांदा छिन. हालांकि साल 2012 विधानसभा चुनाव मा ऊंते इं सीट बटि हार मिली छे.

हेमवती नंदन बहुगुणा गढ़वाल विवि मा आज बटि छात्रों की परीक्षा शुरू ह्वे गी. जू छात्र अपणां पेपर कोरोना लॉकडाउन का कारण नि दे सकी छा, ऊंकी परीक्षा चन्नी च. यू परीक्षा आगामी 12 फरवरी तक चलली.

आज पर्यटन मंत्री सतपाल महाराज न देहरादून मा एक गढ़वाली सीरीयल भागीरथ प्रयास कु प्रोमो रिलीज करी. इं सीरियल मा 13 एपिसोड होला. जू 31 जनवरी यानि भोल बटि हर रविवार का दिन डीडी उत्तराखंड पर रात आठ बजि शुरु होलू.