अपणुं उत्तराखंडः दिनभरै खास खबर एक नजर मा

अपणुं उत्तराखंड मा देखा, दिनभरै खास खबर एक नजर मा

देशभर मा कोरोना टीकाकरण चन्नु च. दूसरा चरण मा प्रधानमंत्री मोदी, 50 साल से ज्यादा सभी मुख्यमंत्री और विधायक-नेतागणों ते स्वदेशी कोवैक्सीन लगली.

पुणे मा सीरम इंस्टीट्यूट ऑफ इंडिया का टर्मिनल 1 गेट पर आग लग गी. फायर ब्रिगेड की कई गाड़ियों न मौका पर पौंछीकी आग पर काबू पे. आग का कारणों कु पता नि लगी. लेकिन कोरोना वैक्सीन बंण वली लैब मा आगे खबर नि च.

उत्तराखंड एसटीएफ न आज बड़ु खुलासा कर गैंग का तीन लौखुं ते गिरफ्तार करी. ये लोग राष्ट्रीय सुरक्षा का साथ खिलवाड़ मा शामिल छिन. ये लोग आर्मी का फर्जी आईडी बणेंकी लौखुं ते गल्फ कंट्री नौकरी खुंण भेजदा छा. आरोपियों का पास से कई फर्जी आईडी और मोहर बरामद ह्वे.

हरिद्वार मा द्वी मंदिरों ते फर्जी तरीका से बेचंणों मामला समणिं ऐ. पुलिस न आरोपियों का खिलाफ मुकदमा दर्ज करीकी जांच शुरू करेली. आरोपी मां-बेटा बते जांणा छिन. आरोपियों न लाखों रुपया लेकर मंदिर और अन्य संपत्ति की रजिस्ट्री करेकी लौखुं ते बेचेली.

धर्मनगरी हरिद्वार मा एक साधु की दर्दनाक मौत ह्वे गी. यू मामला जिला का भूपतवाला इलाका कु च. यख सरोवर मार्ग पर त्रिदंडी सेवा आश्रम का पास एक साधु कु शव मिली. बते जांणू च कि अज्ञात लौखुं न पत्थरों से कूचेकी साधु की हत्या करी. पुलिस न मामला मा जांच शुरू करेली.

पिछला साल 16 फरवरी का दिन करीब एक लाख लौखुं फॉरेस्ट गार्ड भर्ती खुंण परीक्षा दे छे. लेकिन नकल का कारण यू परीक्षा विवादों मा फंस गी छे. मामला मा एक बार फिर हरिद्वार का सात केंद्रों मा करीब 3 हजार अभ्यर्थी एक बाऱ फिर परीक्षा देला.

उत्तराखंड का इतिहास मा पेहली बार बालिका दिवस पर एक नौनी बाल सीएम बंणली. सीएम त्रिवेंद्र सिंह रावत का आदेश पर 24 जनवरी का दिन विधानसभा कक्ष संख्या 120 मा बाल विधानसभा आयोजित होली. जेमा हरिद्वारे सृष्टि गोस्वामी एक दिनी बाल सीएम बंणली. इं मामला मा उत्तराखंड बाल संरक्षण आयोगे अध्यक्ष ऊषा नेगी मुख्य सचिव ओम प्रकाश ते पत्र भी भेजी.

विश्व प्रसिद्ध हिमक्रीड़ा स्थल औली मा इं दिनों आईटीबीपी का जवान स्कीइंग ट्रेनिंग लेंणा छिन. जवान औली और बुग्यालों मा स्कीइंग कु प्रशिक्षण कन्ना छिन. यख फरवरी बटि सैफ विंटर गेम्स शुरू होला.