अपणुं उत्तराखंडः दिनभरै खास खबर, एक नजर मा

अपणुं उत्तराखंड मा देखा, दिनभरै खास खबर, एक नजर मा

भारत मा कोरोना कू कहर जारी च. बीता 24 घंटा का भीतर देश मा 325 लौखुं मौत ह्ने गी. देश मा कोरोना संक्रमितों की संख्या 3 लाख 32 हजार का पार ह्वे गी. जबकि मन्न वलों की संख्या 9520 पौंछ गी. उधर आईसीएमआर का मुताबिक, नवंबर माह मा कोरोना चरम पर पहुंच सकदु. उधर, तमिलनाडु सरकार न राज्य का चेन्नई, चेंगलपेट, तिरुवल्लुर और कांचीपुरम मा लॉकडाउन 30 जून तक बढै.

पाकिस्तान मा भारतीय उच्चायोग मा काम कन्न वला द्वी भारतीय अधिकारी लापता ह्वे गिन. सूत्रों बटि जानकारी मिलीं च कि वू द्वी एक गाड़ी पर भारतीय उच्चायोग दफ्तर ते रवाना ह्वे छा. लेकिन दफ्तर नि पौंछिन. अभी तक इं मामला मा क्वी अधिकारी कू बयान नि ऐ.

फिल्म अभिनेता सुशांत सिंह राजपूत आज पंचत्तव मा विलीन ह्वे गीन. मुंबई का विले पार्ले स्थित पवन हंस श्मशान घाट मां ऊंकू अंतिम संस्कार ह्वे. सुशांत सिंहे अंतिम यात्रा मा ऊंका परिवार का लोग और बॉलीवुडे तमाम हस्तियां शामिल छा.

फिल्म अभिनेता सुशांत सिंह राजपूत ते असमय मौत पर केदारघाटी का लौखुं मा शोक च. ऊंका आत्महत्या मामला मा स्थानीय लोग हैरान छिन. लौखुं का मुताबिक, ऊंकी जिंदादली, सौम्य व्यवहार और अदाकारी बहुत बढ़िया छे. बते द्यां कि केदारनाथ फिल्मे शूटिंग खुंण सुशांत सिंह राजपूत और सारा अली खान उत्तराखंड का केदारघाटी मा पौंछी छा. फिल्म केदारनाथे शूटिंग त्रियुगीनारायण, चोपता, गौरीकुण्ड और केदारनाथ में ह्वी छे.

उत्तराखंड मा भी कोरोना कू कहर लगातार बढ़णु च. प्रदेश मा कोरोना संक्रमितों की संख्या 1836 ह्वे गी. वखि अब तलक 24 लौखुं मौत ह्वे गी. जबकि 1135 लोग ठीक होकर अपणुं घौर चलगिन.

उत्तराखंड मा आयोजित वर्चुअल रैली मा रक्षा मंत्री राजनाथ सिंह न लौखुं ते संबोधित करी. बोली कि भारत और नेपाल कू संबंध रोटी और बेटी कू च. क्वी भी ताकत द्वीयों ते अलग नि कर सकदी. राजनाथ सिंह भारत-नेपाल सीमा विवाद पर बोली कि द्वीयों देशों का रिश्ता पेहली बटिं मजबूत छिन. कुछ मामलों मा मतभेद ह्वे सकदिन लेकिन द्वीयों का रिश्ता हमेशा अटूट ही राला.

उत्तराखंड मा कोरोना संकट का बीच कांग्रेस कू सरकार पर हमला का बीच उत्तराखंड बीजेपी अध्यक्ष बंशीधर भगत न आज अजीब बयान. दे ऊंन बोली कि जन नदी मा बाढ़ का बाद सांप, छछूंदर और कौवा एक ही डाला मा चढ़ चेंदन. वन ही कोरोना संकट का बीच विपक्षी पार्टियूं ते सरकार पर हमला का बजाय एक होंण चेंदू. ऊंन अग्णे बोली कि कांग्रेस त कोरोना महामारी से भी ज्यादा खतरनाक च.

हरिद्वार जिला मा फर्जी मास्टरों पर कार्वे जारी च. अभी तक जिला मा करीब 25 मास्टर नप गिन. बीता चार दिनों बटिं यू कार्वे जारी च. आज रुड़की मा चार और मास्टर फर्जी मिलिन. जेका बाद चारों ते नौकरी बटि हटोंणो आदेश जारी ह्वे गिन. मामला मा एसआईटी जांच जारी च. उधर, लगातार कार्वे से शिक्षा विभाग मा हड़कंप च.

नारायणबगड़-परखाल मोटरमार्ग पर पालछूनी का पास पहाड़ बटि अचानक चट्टान गिर गी. मलबा मा कुछ लोग दब गिन. बते द्यां कि मोटरमार्ग पर सड़क कू काम चन्नू छो. लोग-बाग जाम खुन्नो इंतजार कन्ना छा. तभी ऊपर बटि चट्टान गिर गी. शाम पांच बजी तक मलबा मा द्वी लौखुं दबे होंण सूचना च.

पौड़ी का पाबौ ब्लॉक का पाली गौं मा युवों न खेती खुंण नई पहल शुरू करी. लॉकडाउन का दौरान गौं लौटिन युवाओं न सामूहिक खेती शुरू करी. युवाओं का मुताबिक, सामूहिक खेती मा लौंखु जरुरत कम पड़ली और बंजर खेती फिर खिलेली. उधर, गौं वलुं न इन युवाओं की तारीफ करी.