निर्भया गैंप रेप मामला मा भोल सबी दोष्यूं थै फांसी दिये जांण. यां से पैली पटियाला हाउस कोर्ट मा ये मामला सुंणवै का दौरान दोषी अक्षय की पत्नी पुनीता देवी बेहोश ह्वे गी. पुनीता देवी न कोर्ट मां अक्षय से तलाक लेंणै अर्जी डाली छै, लेकिन पुनीता ईं सुंणवै मां पौंछि नी छै, जैका बाद मणे जांणू च कि यु सब फांसी टालनौ किये गी
राज्यसभा मां 37 उम्मीदवार निर्विरोध चुंणे गिन
राज्यसभा चुनाव का नामांकन वापस लेंणे समय सीमा आज खत्म ह्वे गी. यां का बा एनसीपी का प्रमुख शरद पवार, केंद्रीय मंत्री रामदास आठवले और उच्च सदन का उप सभापति हरिवंश नारायण सिंह सहित 37 उम्मीदवार निर्विरोध निर्वाचित घोषित करे गिन. बथै द्यां कि 26 मार्च कु होंण वाला 17 राज्युं का 55 राज्यसभा सीटुं थै अब तक नामांकन दाखिल करे गिन
रंजन गोगोई न लिनी राज्यसभा सदस्यता की शपथ
गुरुवारौं कांग्रेस सहित विभिन्न विपक्षी सदस्युं का शोर-शराबा बीच देश का पूर्व चीफ जस्टिस रंजन गोगोई न राज्यसभा की सदस्यता की शपथ लिनी. ये दैरान कांग्रेस समेत कई विपक्षी सासंदुंन उंकु विरोध करी नारेबाजी करी सदन बटी वॉक आउट करी. विपक्ष का विरोध पर रंजन गोगोई न बोली जु लोग आज उंकुं विरोध कन्ना छन वु जल्द ही उंकु स्वागत करला
भारत मां कोरोना का मरीजुं की संख्या लगातार बढ़दी जांणी च. अब तक मरीजुं की संख्या बढ़ी 184 ह्वे गी. आज पंजाब मां भी कोरोना वायरस का एक और मौक ह्वे गी. छत्तीसगढ़ सरकार न भी दूसरा राज्यों से औंण वाली बसुं का प्रवेश पर तत्काल प्रभाव प्रतिबंधित लगये ली. ऑल इंडिया टूरिस्ट परमिट वाला सभी यात्री वाहनुं का परिचालन भी अगले आदेश तक रोके गेनी
कोरोना वायरस: मुख्य सचिव न करी वीडियो कॉन्फ्रेंसिंग
देश मां कोरोना वायरस से अब तक तीन लोखुं की मौत ह्वे गी. अब तक 15 लोग अस्पताल बटी ठीक ह्वे खै घौर भी वापस ए गिन. कोरोना वायरस का कारण देश का दगड़ि उत्तराखंड मां भी बैठकुं का दौर जारी च. यां कु थै मुख्य सचिव उत्पल कुमार सिंहै अध्यक्षता मां सचिवालय मा वीडियो कॉन्फ्रेंसिंग का माध्यम से एक अहम बैठक करे गी. बैठक मां सबी जनपदु का डीएम, एसएसपी, सीएमओ, जिला पूर्ति अधिकारी और अन्य संबंधित विभागीय अधिकारियुं दगड़ि कोरोना वायरसै रोकथाम समेत तमाम बिन्दु पर चर्चा करे गी.
उत्तराखंड मां कोरोना दगड़ि स्वाइन फ्लू कु अटैक
उत्तराखंड मां कोरोना वायरस का संक्रमण का बीच स्वाइन फ्लू न भी दस्तक दियेली. गुरुवार स्वाइन फ्लू न एक महिला की मौत ह्वे गी. प्रदेश मां अबतक स्वाइन फ्लू का 101 संभावित मरीज संमणी ऐ गिन. स्वास्थ्य महानिदेशक न स्वाइन फ्लू का आंकड़ा जारी करदां बोली कि यां पर नजर रखणै सख्त जरुरत च.
राज्य सरकारन भी कोरोना से बचणौं आज सचिवालय मां कैबिनेट बैठक बुलै. जैमा कोरोना से लड़नौ कई फैसला लिये गिन. राज्य सरकारन कोरोना थै लैकी 10 करोड़ का बजट बढै, यां से पैली सरकार न या थै 60 करोड़ रुप्या जारी करी छा.यां का अलावा प्रदेश का सभी मॉल भी 31 तारीख तक बंद रखणौं फैसला लिये गी. .
राज्य मंत्री न करी पेयजल योजना कु लोकार्पण
गुरुवारौ उच्च शिक्षा राज्य मंत्री धन सिंह रावत न प्रदेश की सबसे महत्वपूर्ण श्रीनगर-पौड़ी पेयजल योजना कु लोकार्पण करी. ये मौका पर जल निगम का सबी अधिकारी और कर्मचारी मौजूद रैन. इं पेयजल योजना कु श्रीनगरवासी पिछला 20 साल बटी इंतजार कन्ना छा. 13 करोड़ की लागत से बंण वाली इं पेयजल योजना से श्रीकोट, भक्तियाना, खिर्सू और पौड़ी का कम से कम द्वी लाख से ज्यादा आबादी वाला क्षेत्रुं थै फैदा मिललू
अंग्रेजी शराबै 31 दुकानुं कु लॉटरी प्रक्रिया से ह्वे आवंटन
पौड़ी मां अंग्रेजी शराब की बिक्री थै गुरुवारौ लॉटरी प्रक्रिया से दुकान आवंटित करे गिन. पौड़ी मां अबी करीब 43 दुकानुं थै लॉटरी प्रक्रिया करये गी. जैका बाद आवेदक आगामी एक अप्रैल बटी अपणी दुकानुं थै विधिवत रूप से खोल सकदन. ये दौरान जिलाधिकारी धीराज गर्ब्याल न बथै कि 43 दुकानु थै लगभग 130 करोड़ का अधिभार शासन की ओर से करे गी छौ. उन बथै कि अबी पांच दुकानु थै क्वी भी आवेदन प्राप्त नी ह्वे. जै थे 21 मार्चौ फिर से आवेदन प्रक्रिया रखी च.
सात तमंचों दगड़ि द्वी बदमाश गिरफ्तार
काशीपुर मां कुंडा थाना पुलिस न सात अवैध तमंचों और 12 कारतूस दगड़ि द्वी युवकुं थै गिरफ्तार करी. पुलिस न द्वी पर मुकदमा दर्ज करी जेल भेजेली, पुलिस का मुताबिक, यू द्वी आरोपी कुंडा भरतपुर गौं का रौंण वाला छन. यु तमंचा थै यूपी का मुरादाबाद का फरीदपुर का रौंण वाला एक आदीम से खरीदी लैके बेचदा छा.
