महासमुंद म विराजे हवय यम देवता, जानव का हे कहानी

जम्मों भारत देश म यमराज के मात्र 8 मंदिर हवय. ए 8 मंदिर मन म यम के एकठन मंदिर हमर छत्तीसगढ़ म हवय. महासमुंद ले 45 किलोमीटर दुरिहा खल्लारी के कर्मापटपर गांव म यमराज देवता विराजमान हवय. ए मंदिर के निर्माण दो साल पहली होय रिहिस. ए मंदिर के एकठन अनोखा कहानी हवय. एक बार तेंदुकोना के रहवईया नंदकुमार सोनी ह 2011 म फटफटी ले कहीं जावत रिहिस त मोड़ म ओखर एक्सिडेंट होगे. एक्सिडेंट म नंदकुमार के दुनों पांव ह टुटगे. जेखर बाद ओ इलाका म ओखर मरे के खबर फैल गे, लेकिन ओला रईपुर के अस्पताल म भर्ति कराए गिस अउ उहां नंदकुमार ह ठीक होगे, ओखर जान बांचगे. 2017 म नंदकुमार ह फैसला लिस की ए मोड़ म यमराज के मंदिर बनवाना चाही, तेखर बाद उहां यमराज देवता अउ यमुना मईया के मंदिर के स्थापना कराईस. तब ले आज तक जेन ओ डाहर जाथे यम देवता के दर्सन जरुर करथे.